Pages

رباعيات الممات

قلبي إللي كانت ضحكته بتطير بعيد

وكان سعيد أكتر من أكتر سعيد

ما أعرفش ليه الفرح جوّاه إنكسر

حواليه ملايين البشر لكن وحيد







من قلبي قلت خلاص للدنيا غووري

خدي معاكي المال وحبّة غروري

آخرتها حاأتشال كَفَن جوه التابوت

ما أنا في طابور الموت مستنّي دوري









عالعيشة مرغم والحياة جابراني جبر

والعمر عدّى والمرار شبّعني صبر

من صغري أنا مفتون ،، عايش غريب

مستنّي روحي تغيب بقى وتروح لقبر





أنا قلت مرّة للألم ما كفايه همّ

وتروح تشوف غير جتتي تملاها غمّ

ولا مرّة رد ولا حتى شاور بإديه لحد

طلع الألم من حظّي أنا أعمى و أصمّ










يا حبيبتي ما إنتي من زمان عارفة الحقيقة

لو كان بإيدي ما كنت عمري أبعد دقيقة

و العُمر دوُر ،، لابد يوصل منتهاه

أمّا الحياة موجودة في عنيكي البريئه




3 comments:

ياسمين حميد said...

يا أخي حرام عليك
بكيتنا معاك

فاتيما said...
This comment has been removed by a blog administrator.
الصحيفة الصادقة said...

و العُمر دوُر ،، لابد يوصل منتهاه

اسلوب مميز ورائع في انتظار المزيد