Pages

إستكــــان


إستكان

ولا هَمُّه مين من جنبُه سَبُّه

ولا مين في يوم على خدُّه لَــبّه

ولا مين أهان

ولا مين سمّاه ندل و جبان

ولا مين سقاه ذل و هوان

لمّا إستكان

بقى شيء ضعيف

الصمت أصبح يرعبه

بقى شيء مخيف

لو "فار" في شارع يرهبُّه

ويحبسه فوق الرصيف

مع إنه كان فاكر حايشعر بالأمان

لمّا إستكان

9 comments:

فاتيما said...

روووووووووووعة يا وليد

يا لهوى
ايه دا ؟!!!

صح
انتا ألف صح
كل ما الواحد ياخد ركن
ويقول محدش هيلمحه ولا ياخد باله منه ويأذيه
يلاقيه بيضيع أكتر ...

انا مش عارفة ارد ..
انتا اختصرت الكلام

طب بشطارتك دى
اخترعلنا كلمة جديدة
غير كل ادبيات الإعجاب المعتادة ..
عشان نعرف نقولهالك يا راعى الملك

بجد
انا مش بهزر
عاوزين كلمة جديدة ...
غير هايل وتحفة وروعة وتسلم ايدك
ويخربييييت كدا

إتصرف
:)

Anonymous said...

انا عايز اهدى الكلام ده لخيخة

انا حاسس انها هيا ده اللي استكان




الكلام رائع يا استاذ وليد
ولا كلام بعد تعليق فاتيما

KING TOOOT said...

فاتيما
ألف مليون شكرا و ألف مليون أخجلتم تواضعنا و الف مليون تسلمي يا أختي الغالية
دايما رافعة معنوياتي للسما ، وأنا أصلي بأتلكك و أصدّق تعليقاتك ووصفك لكتاباتي بأنها حلوة و روعة و كده ، رغم إن شهادتك مجروحة " مش أختي ؟ وشهادة الأخت لأخوها مجروحة " غير إننا زملاء ثورة واحدة و يدان واحد و مسيرة واحدة
أما بخصوص الكلمة إللي إنتي عايزاني أخترعها فأنا مش حاأخترع طبعا بس فيه كلمة بأحب أسمعها أوي لما حد يشوف حاجة جميله أو يسمع شيء يعجبه
الكلمة دي هي كلمة
الله
وبصراحة الكلمة دي كفاية
كنت بأفكر دايما لو حد علق على اي حاجة بأكتبها بتعليق من كلمة واحدة هي الكلمة دي ، حاأرد عليه أقول له أيه ؟! ودايما ماكنتش بلاقي رد على التعليق ده
تخيلي كتبتي حاجة و حد رد على إللي كتبتيه بالكلمة دي بس
مكن يكون فيه كلام مناسب أو يناسب إنه يكن رد على الكلمة دي ؟
شوفتي الموضوع بسيط إزاي
مبسوط جدا ان القصيدة عجبتك و مبسوط كمان بتعليقك
___________________
Anonymous
الحقيقة كان نفسي يكون لحضرتك أكونت على البلوجسبوت علشان نقدر نتعرّف أكتر
نوّرت مدونتي المتواضعة
وإسمح لي أختلف معاك في أن خيخة إستكانت ،، أنا رأي إن خيخة ما أستكانتش ، هي يمكن مخاصمة الدنيا شوية و زعلانه منها ، والخصام مش إستكانه ، الخصام حب في حالة غضب
شرّفتني بمرورك و أتمنى ماتكونش آخر زيارة
______________________
KING TOOOT

فاتيما said...

الله

:)

KING TOOOT said...

:-)

sony2000 said...

جميييييييييله بجد
ماسبتش حاجه الا لما قلتها

KING TOOOT said...

sony2000
أشكرك جدا على تعليقك و تشجيعك الدائم
وربنا يديم علينا نعمة القول
_______________
KING TOOOT

جارة القمر said...

كلماتك فكرتنى بجمال بخيت

فى كل الاحوال مش اول مرة اجى هنا ولكن اول مرة اعلق عندك

حروف كلمة استكانة بتعطينى احساس الموت البطئ و المختار فى نفس الوقت

اخر مراحل الحياة

ربنا يديم عليك ابداعك وافكارك يارب :)

KING TOOOT said...

جارة القمر
أتابع كتاباتك منذ فترة طويلة و مدونتك من المدونات القليلة الموجودة في التفضيلات على جهازي العتيق
سعيد جدا بتعليقك ، وبالطبع سعيد جدا بتشبيه أسلوبي بإسلوب الشاعر الكبير
أشاركك شعورك تجاه كلمة إستكانه
شرّفتي مدونتي و أرجو أن لا يكون هذا التعليق هو تعليقك الوحيد هنا
____________________
KING TOOOT