Pages

من غير عيون

أحضني قلبي الضعيف

وأفردي علي كتفي شال

خللي إسمي يتحسب ضمن الرجال

بددي صمتي المخيف

غرّقيني بالآمال

شيلي من روحي المجون

والجنون

أو أي زيف

على أي حال

إنتي جوّايا الخيال

إنتي زرع و نور و ريف

إنتي بيت في قصيدة م الغزل العفيف

إنتي جنة من جمال

إنتي نسمة عصر في فصل الخريف

إنتي كل مافيكي شيء غالي و شريف

بس أغلى مافيكي قلب رقيق حَنون

وبريء كما قلب العيال

ومالوش في شغل الكدب و أمور الأحتيال

ماسك إيدين قلبي الكفيف

بيعلّموا إزاي يكون

أقرب ما يمكن م الكمال

من غير مايحتاج العيون


6 comments:

ابراهيم رزق said...

اغبطك على تلك المشاعر الجميلة فى هذا الوقت العصيب

كلمات جميلة و معبرة

تحياتى

candy said...

تصفييييييييييييييييييييييييق حااااااااااااااااااااااد

صوت رومانسى رقيق عذب فى وسط ضوضاء السياسة المؤلمة المعذبة

ربنا يخليكم لبعض :)

KING TOOOT said...

ابراهيم رزق
أشكرك جدا على تعليقك الجميل
خالص مودتي
______________
candy
تعليقك مشجع جدا
الحب دائما موجود حتى في أقصى لحظات العنف الناجم عن معترك السياسة
أشكرك على التعليق
وعلى دعوتك لنا في نهاية التعليق
______________
KING TOOOT

فاتيما said...

متفقة مع ابراهيم

ومتفقة جداااا مع كاندى

ربنا يخليكم لبعض

انا من كتر قربى منك مبقتش بعرف أعبر ولا اوصف ولا الاقى كلام يا وليد ...

انتا حبك لهبة
عامل زى الحقايق الكونية الحتمية اللى ملهاش حل ولا فيها نقاش ...
زى الشمس لما تطلع
والقمر لما يبقى بدر ف نص الشهر
وزى ما النهر ميته عذبة
وزى الهوا اللى بنتنفسه كدا ..
ثوابت

ثوابت لا تتزحزح

أضف عليها
انكم ان شاء الله
هتحققولى امنيتى
اللى معرفتش اعملها
وهتعملوها بدالى
:D

انا هلطشها واحطها عندى
عشان الناس الحلوة
تقرى حاجة أحلى .. ومختلفة ورقيقة كدا ع الصبح

eskandarany said...

ايه يا عم كينج....وبتقوللي اللي انا بأكتبه.....يا عم بلاش احراج
أنا تعليقي الوحيد انك حقيقي قلم فريد
مش دايما بأقرا حاجة ومن اول شطر يشدني ويجبرني اني اخلصها ...انت فعلاً كينج

KING TOOOT said...

فاتيما
أنا طبعا مبسوط جدا بالتعليق بتاعك يا أختي الغالية , وخصوصا إنك فعلا من أقرب الناس لينا و لحياتنا و تعرفي عن قصتنا حاجات كتير مايعرفهاش ناس كتير
وأنا طبعا فاهم أد أيه أنتي تقصدي أن حبي أنا و هبة أصبح حقيقة ثابته لكل الناس إللي يعرفونا و قريبين مننا أوي " زيك كده " لكن عايز أوضح حاجة مهمة أوي يا فاتيما
من أهم الأسباب إللي خلت حبي أنا و هبة يكون قوي و حقيقي ويستمر إنعمرنا ما أتعاملنا معاه على إنه شيء مضمون أو إنه حقيقة ثابته و مسلّم بيها ، دايما عايزين نجتهد أوي علشان نفوز بيه ، كلمة يمكن يستغربها الناس بس دايما بنقولها أنا و هبة لبعض ، إننا "بنذاكر " بعض طول الوقت ،، أيوة بناكر بعض ،، زي الطالب ما بيذاكر درس مهم علشان الأمتحان ، و الجايزة في الآخر بتكون نظرة رضا من عنيها أو عنيّا
انا رأي ،، ورأيها هي كمان ، إن الحب الحقيقي زيه زي كل حاجة حلوة و مهمة عايزة مجهود دايما علشان تفضل و تبقى وتستمر
وأخيرا ليا ليكي سؤال
مالطشتيش القصيدة ليه ونشرتيها عندك علشان الناس الحلوة ؟؟إعترفي
______________________
eskandarany
يااااااااااه وحشتني جدا جدا يا صديقي الشاعرالجميل
أنا سعيد جدا ان القصيدة دي عجبتك و مبسوط أكتر انك معايا في المدونة من تاني
عايزاشوفك علىطول بقى واستمتع بتحليلك الممتاز لأشعاري و طبعا انا حاأبقى بإستمرار عندك زي زمان
نورت يا صديقي
_______________________
KING TOOOT