Pages

فزورة الطاووس


ريش الطاووس
كام ألف لون
أحمر و أخضر وموف و أزرق
وأصفر لمون
بس الطاووس
ولا ينفع آكله
ولا حتى فيه حيوان بياكله
ولا منه فايدة
غير بس شكله
ولاحتى عنده كام ريشة زايدة
تنفع مخدة
أو زينة على عروة جاكته
عم الطاووس
رافع ريشاته المفرودين
يفتن نفوس
وكتير بقوا م المفتونين
بالخوف ساعات
بالمال ساعات
وساعات كتير يفتن بدين
عم الطاووس
عنده الظلام أجمل فانوس
عنده الحقوق أفزع كابوس

عنده التاريخ مليان دروس

ورغم كل المعطيات

عالناس بيتعوّد يدوس

وفإيد فساد عمّال يبوس

عم الطاووس

لون ريشه زاد
لمّا إفتكر إن العباد
عَبيد
تيوس

ونسي الحقيقة المؤلمه
إن الشعوب مافيهاش عجوز

وإن الشباب الحالمه

متنظمّة

من غير فلوس

من غير مقابل تضحياتهم ممكنة

عرفتوا مين قصدي أنا

إنه الطاووس ؟


5 comments:

فاتيما said...

هههههههه

انا انا انا


الموكوسين مفيش غيرهم

اللى ربنا يجعل كلامنا تقيل
زى المرزبة فوق دماغهم
يناموا ما يقوموا
يا رب ....


انا هحل الفزورة من غير جايزة
ولا إييييييه ؟!!!!

طيب

عشان خاطر هبة وعمر

بسم الله الرحمن الرحيم

الاجابة : تونس


آه

أصلى امبارح كنت ف مسيرة لأ للطوارىء
و بنت ماشية قصادى
لون الغيشارب بتاعها حلو
فقولت هيافة اقولها انه حلو وكدا
راحت مصورانى بيافطتى
وبعدين بتكلم معاها
لقيتها تونسية !!!!

بتعملى ايه يا بنتى ف المسيرة دى ؟!!

قالتلى انها ف مهمة ف القاهرة تبع الشغل
بس عاوزة تشارك معانا
وماسكة يافطة هيا كمان ..لمصر
تخيل ؟!!

لسه بقى هقول بؤقين ف تونس وفضلها علينا ..
لقيتها بتقولى احنا باصينلكم
ونجاحكم هيشجعنا احنا وغيرنا
صحيح احنا سبقانكم ..
بس انتوا اللى هترسمولنا خريطة بكرة ...
تصوّر ...

انا عينى رغرغت والله
ايه الجمال دا ؟!!!


العدد مكنش كتير كما يجب
بس كان مشرف برضو
والحمدلله عدت على خير

اتمنى بقى المدرسين يشدوا حيلهم وعلى آخر الاسبوع يكونوا كلهم اختشوا على دمهم ...
ويبينوا كرامة ..
عشان نطلع وراهم
ونساندهم
...


انتا مروقنا الأيام دى
بحاجات حلوة قوى

ربنا يبارك
و تروقونا كمان وكمان

سلامى لأرق مخلوقات الله
وبوسة مخصوص لبيكا أفندى ...

KING TOOOT said...

يافاتيما
مصر مش وطن عادي ولا بلد عادي ولا أرض عادية
مشكلة مصر دايما إنها أكبر من إنها تكون لأهلها ، و أهلها دايما أصغر من أنهم يكونوا أهلها
علشان كده كلنا لازم نعرف قيمتها كويس و قيمتها دي تهزنا من جوانا و تخلينا نحس أد أيه هي غالية أوي أوي ، و أد أيه العالم شايفها كبيرة و إحنا بنصغرها في عيوننا
عاملين زي الطفل إللي أبوه جايب له أغلى حاجات في الدنيا و هو مش حاسس بقيمتهم و بيفكر أن حاجات أصحابه أحلى ، لأنه غبي و تافه و اناني و جبان
أهل مصر يا فاتيما مش عايزين يشوفوا إن بلدهم دي أهم بلد في الدنيا
هيرودوت قال لهم من ألاف السنين ، و أرسطو و أفلاطون قالوا لهم و نابليون قال لهم و هتلر قال لهم و تشرشل قال لهم
حتى الفنانين اللاسعيين زي سلفادور دالي
كل الناس دي و ملايين غيرهم شافوا أد أيه مصر مهمة و كبيرة و حلوة و غالية
لكن أهلها لأ
مصر مشكلتها يا فاتيما أنها أكبر مننا
أكبر مننا بكتير
،
،
نورتي المدونة يا أختي العزيزة
KING TOOOT

ليس فقيرا من يحب said...

السؤال صعب اوى يا مستر

ممكن تدينى اختيارات وانا اجاوب

جميله الفكرة والمغزى

ربنا يصلح حالنا ويسعدك

سلامى لبوبو وعمر وليك

^_^

candy said...

جميييييييييييييل قوى
:)

KING TOOOT said...

ليس فقيرا من يحب
صدقيني السؤال مش صعب خالص
الإجابة هي اللي مكن تكون صعبه على النفس
ربنا يسمع منك و يصلح الحال
نورتيني
___________________
CANDY
أشكرك جدا على مرورك
___________________
KING TOOOT