Pages

يا فرخة .. يا قلّة


خلاص يا جماعة

إتحلّت

يانقول نعم ونبقى فرخة

أو نقول لا ونبقى قلّة

!!!!!

يخرب بيت كده

إيه الحلاوة دي ، كأن خلاص كل مشاكلنا أصبحت الإستفتاء

هو ليه الإستفتاء اصلا ؟

آه .. علشان نوافق أو نرفض تعديلات الدستور

طيب وهو إحنا كنّا طلبنا تعديل الدستور أصلا ؟

إحنا طلبنا إسقاط الدستور

إسقاط النظام يا عاااااالم يعني إسقاط الرئيس و الحكومة و الحزب و الدستور و التركيبة السياسية كلها إللي في البلد

يعني إحنا رايحين يوم السبت نوافق أو نرفض حاجة مفروضة علينا

ومش مطالب الثورة خالص

رايحين و كل واحد فاتح بقه في بلاهة و بيضحك ضحكة عبيطة

ماسك بطاقة الرقم القومي و رايح يقول

أنا فرخة ولا قلّة

ياجدعان إحنا قمنا بثورة

مات فيها ناس ، الشهدا دول ليهم حق ، والمصابين ليهم حق ، والناس إللي رزقها وقف و شغلها أتقفل ليهم حق ، هو كل العالم مصدّق إننا قمنا بثورة إلا إحنا ؟

الثورة يعني تغيير ، مش حفلة سيما من سته لتسعة و خلاص نقوم نروّح، الثورة دي شغل وعمل متواصل أيام و سنين ، وإللي بيحصل ده هو تحايل علينا و على مطالبنا

إحنا ما نزلناش في الشارع في عز البرد ، وأنضربنا بالرصاص و القنابل والسنج و البلاوي الزرقا كلها علشان في الآخر نعمل زي ما مبارك كان عايز بالظبط

نعدّل الدستور ، و ست شهور فترة إنتقالية ، وبعدين مجلس شعب مش بيمثل الشعب و رئيس جديد الله أعلم حايبقى شكله إيه

لا

لا و ألف مليون لا

المجلس العسكري أو الحكومة أو المسؤولين المفروض يعملوا رأي الناس و الشعب ، لأن الشعب هو إللي قام بالثورة و هو إللي يقول إيه يتعمل و إيه لا ، ولما الشعب يقول دستور جديد ، ماينفعش هما يقولوا طيب طيب بعدين ، إلعب بعيد يا شاطر

أنا شايف الحزب الوطني و أعوانة بيطلعوا لنا لسانهم و بيلعبوا لنا حواجبهم و بيعملوا لنا حركات قبيحة بصوابعهم و بيقولولنا

يا شعب يا أهبل ، حد يعمل ثورة ، وبعدين يسيب مجلس عسكري يحكم بدل من الشعب ، يعني الشعب خلاص خلص ، مافيهوش رجّالة تنفع تحكم ، عمركم شوفتم ثورة تتحكم بالوكالة

الجيش على عيني و راسي ، بس المجلس العسكري مش الجيش ، و الشعب عمل ثورة و من حقة يجني ثمارها

ولو المجلس العسكري مش حايحقق مطالب الشعب يبقى يمشي و ييجي مجلس مدني يحققها

ولو حكومة عصام شرف مش حاتقف جنب الشعب لتحقيق مطالبة يبقى تروّح مع ألف سلامة و تيجي حكومة غيرها تعبّر عن الشعب و تقف جنبه

هو إحنا بنهرّج ؟ نعمل ثورة و نهز الدنيا و يموت منا مئات و يتصاب عشرات الآلاف ، و في الآخر ناخد فتافيت ، ينضحك بيها علينا

ياناااااااااااس دي حتى المحاكمات سايبة ثلاتربع النظام القديم زي ما هو ، مش بس بدون محاكمة ، لا دول كمان في مناصبهم و بيشتغلوا عادي جدا ، كأن إللي قامت دي كانت خالتي و قايمة من النوم مش ثورة شعبية

هو فيه كده بالزمّة ، فيه كده في الدنيا

لا و المضحك المبكي في نفس الوقت ، إن خلاص بقت الثورة هي إللي خربت البلد ، يعني كأن الإقتصاد بتاعنا كان آخر تمام ، و إداء بورصتنا كان ميت فل و أربعتاشر ، وكل الناس مبسوطة و بتاكل كباب و بيتزا من بتوع طنط عفاف شعيب ، و جت الثورة بقى ووقفت حال الناس

ولا كأننا كان عندنا فقر ، ولا مرض ، ولا بطالة ، ولا فساد ، ولا قمع و قهر ، ولا أمن دولة ، ولا أمن مركزي

يا عالم حسوا على دمكم شوية ، ده فيه أموات شهداء لسه دمهم مابردش ، وأمهات لسه دموعهم ماجفّتش من البكا على عيالهم إللي راحوا على إيدين بتوع الشرطة إللي ياحرام مشاعرهم بتتدايق خالص لما الشعب بيقول عليهم واطيين

بالزمة ده كلام ؟؟؟؟؟

وبعدين حبايبنا الحلوين إللي مغرقين الدنيا إئتلافات و أحزاب و حركات و داخلين في صراعات مالهاش اول من آخر

بتتخانقوا على أيه يا خايبين ، ده هوا ،، كله هوا ،، قبض الريح يعني يا أذكى خلق الله ، خلاص كلكم بقيتوا سياسيين و بتوع سُلطة ؟؟

لا ياحبيبي إنت و هو ماينفعش ، الشهيد إللي نزل الشارع و هو مالوش في السياسة نزل علشان سمع كلامكم و دعواتكم للتظاهر ، ومات وهو بيدفع ثمن دعواتكم دي ، علشان كده ماينفعش دلوقتي تقولوا

خلاص

بح

مش لاعبيين

إحنا بقينا سياسيين بعد ما كنّا ثوريين

لا يا حيلتها إنت وهو وهي و هما

دم الشهدا زي ما هو في رقبة إللي ضرب نار و إللي أعطى أوامر ضرب النار ، هو كمان في إيد إللي تراجعوا و هادنوا و نخّوا قبل ما كل مطالب الثورة تتحقق على أرض الواقع مش مجرد وعود

طمعان في إيه يا خايب إنت و هو وهي ، عايز تبقى وزير ولا سفير ولا مدير ولا رئيس جمهورية قادم ؟؟ جتكوا ستين نيلة ، الثورة بتروح مننا يا نااااس ، وفي الآخر مش حاناخد غير مقلب محترم وبدل ماتقعدوا على كراسي الحكم خانقعد كلنا على خوازيق ماركة إبقى قابلني

أنا أعرف إن لما ثورة تقوم ، يبقى على الأقل الحاكم القديم إللي قامت عليه الثورة ده على الأقل يتحبس أو تتحدد إقامته و إقامة عائلته ، يخضع لتحقيقات سياسية و جنائية عن قرارات أخدها و إتفاقيات وقعها ، و إجراءات نفذها ، ويتعصر بقى و يقر على كل حاجة ، وبعدين يخضع لمحاكمة عادلة و ياخد جزائة

إنما حسني قاعد في شرم الشيخ بيلعب رجليه على المية و جمال و أمة رايحين جايين بين القاهرة و شرم عادي جدا كأنهم في أجازة من الحكم و راجعين تاني بعد ما تخلص

والمصيبة إن المجلس العسكري مابياخدش اي إجراء معاهم

أو حتى مع غيرهم من وزراء سابقين مطورتين في قرارات سياسية تصل إلى حد الجرائم

أهم حاجة بتشغل المجلس العسكري إن ميدان التحرير يبقى من غير مظاهرات ، وإن المتظاهرين يروحوا بقى علشان السيما حاتشطّب و الباب حايقفل و صاحب السيما حايروّح ينام

بالزمة بقى ده إسمة كلااااام ؟؟!!!

5 comments:

فيلسوف زمانه said...

هههههههههه موضوع حلو اوى بس مهما اختلفت اراء اذا كان دلوقتى ولا بعدين هيتغير الدستور يعن هيتغير
وفرصة سعيدة وياريت تنورنا وتشرفنا فمدونة اهل الحب
http://lovecity2000.blogspot.com/

فاتيما said...

آه والنبى يا وليد

قول يا غالى وسمعنا

حكاية الفراخ دى انا موافقة عليها جدا
اصلى حاسة اننا بنخش العشة تانى وبيقفلوا علينا ويرمولنا فتافيت عيش
والمفروض نسكت

المؤلم ان فيه ناس موافقة على كدا
وبتقول كتر خير الدنيا وحلو قوى


اما حكاية القلة دى

فهذا وضه اكثر ايلاماً
ليه بعد ما الملايين كانت بتهز العالم كله بمنظرها وثباتها واصرارها
ترخرخ كدا وترجع لورا

ليه ؟


لو النتيجة بقت نعم
هنبقة فعلا
فرخة وقلة ولا عزاء للثورة

آه يانى

Anonymous said...

يا سلااااااااااااااا...
أول القصيدة كفر
ايها المستشار طارق البشري.
ايها الدكتور سليم العوا
ايها المرشد العام على كل المسلمين

قلتم لنا نعم معناها انه هيبقى فيه استقرار وهيتغير الدستور خلال ستة اشهر من انتخابات البرلمان.
الآن ولسه ما استفتحناش دخلنا في سنتين ، سنة على ما تتم انتخابات الشعب والشورى وستة اشهر على ما اللجنة تعد دستور جديد وستة على ما يدرس ونص شهر على ما يستفتى عليه .
امال فين الستة اشهر يا بركه انت وهو.
طيب خلال السنتين دول فين الريس ؟!!!!!!!
يبقى الجيش!!!!!!!!!!!
امال خوفتونا وقلتو نعم علشان الجيش يرجع ثكناته والحياة تمشي ليه؟!!!
طب المادة 189 بتقول ان تغيير الدستور بناء على طلب من رئيس الجمهورية وموافقة مجلس الوزرا - الي معينه برضه رئيس الجمهورية – نكته مش كده !!!- وموافقة نصف اعضاء محلسي الشعب والشورى.
فين رئيس الجمهورية الي هيتقدم بطلب وضع دستور؟!!!! .
حد يقولي؟!!!!
الله........ انتو نسيتوا اللي كتبتوه ولا ايه يا حجاج.
طيب.
لو اتعدل الدستور واتلغى حاجات كتير زي تعديل شروط الترشيح لرئاسة الجمهورية ونسبة العمال والفلاحين والكوته يطبق من أمته من تاريخ الموافقه عليه طبقا لقاعدة الاثر المباشر للقواني ، ولا بعد انقضاء الدورة البرلمانية .
اقولك يا حجاج يا بتوع ربنا.
لو من تاريخ الموافقة عليه يبقى انسى ان نصف المجلسين يوافق على التعديل من اصله .
عارف ليه .
لانه مفيش حد اهبل .
اغير علشان امشي الصبح ويتعمل انتخابات جديدة يمكن انجح ويمكن اسقط .
لو بعد انقضاء فترة المجلس .
يبقى انتو نصبتوا علينا .
وربنا هيوديكو النار .
علشان ضحكتو علينا وقلتوا التعديل خلال ستة اشهر .
نقعد خمس سنين او ستة مستنيين الشمس تطلع بالليل .
ياعم المستشار والدكتور والمرشد انتم عملتم ايه في دنيتكم ، احنا شايفينككويس .
بتختموا حياتكو كدى ليه.
يا عم المستشار انت ابوكان راجل طيب .
ويا عم الدكتور انت كنت املنا في الضلمة دي.
ويا عم المرشد العام هو انت مرشد للمسلمين ولا على المسلمين.
الظاهر كده دي من علامات الساعة .

واخونا العوا اللي بيقول لو اقتنعت براي مخالف هقول لأ لتتعديلات .
اقوله اقرا يا دكتوووووووووووووو... عوا نص المادة 189 ، 189 مكرر.
بالله عليك وانا راضي ضميرك لو دي قضيه وقلت الدفوع دي تفتكر القاضي هيديك اقل من اعدام .
يا اخوانا اتقو ربنا .
مرة تقولو الجيش حبيبنا وهو اللي نجح الثورة .
وبعدين تقولوا الجيش لو قلنا لا اكيد هيطمع في الثورة .
انتو شايفينا هبل ياعم الحاج انت وهو وهو .
ولا استغليتوا طيبة الناس الغلابة ابويا وابوك وامي وامك.
فرقتو ايه عن الحزب الوثني .
كل اللي عملتوه انكو اظهرتو الوجه الثاني للعمله .
المادة 189 يا بتاع القانون انت وهو صريحة وواضحة .
1- لرئيس الجمهورية ( يعني جوازي ) رحنا بعيد مين بقى الي هيمسك ابو بكر ولا عمر . اهو هييجي واحد نكون تحت رحمته نستنى كرمه اذا شاف يغير ولا لأ.
2 - بعد موافقة مجلس الوزراء.
وزرا مين يا عم الحاج هو انت منتخب رئيس مجلس وزرا علشان يتاخد رأيه ده متعين من عند سيده ، بزمتكو انتو التلاته فيه حد قال لسيده في التاريخ كله لأ. ولو عرف انه هيقوله لأ كان شغله .
3 - لازم موافقة نصف اعضاء المجلسين .
بزمتكو يا مؤمنين فيه حد يوافق على تعديل بسرعة بسرعة علشان يسيب الجنة اللي هو فيها .
الا اذا كنتو ناويين تجيبو لنا ابو بكر وعمر وبلال وخالد.
او تحيبولنا شوية هبل بريالة .
وحتى لو وافقو تفتكرو امته هيكون بعد ست اشهر زي ما ضحكتو علينا .

يا ايها البشري
ياياها العوا .
ياياها المرشد .
يا كل من غرر بالناس .
والله الذي لا اله غيره لنقفن نحن وانتم امام من لا يغرب عن علمه شئ .
وسيكون احدنا ابيض الوجه والاخر اسوده .
فاتقوا الله اتقوا الله .

Anonymous said...

يا سلااااااااااااااا...
أول القصيدة كفر
ايها المستشار طارق البشري.
ايها الدكتور سليم العوا
ايها المرشد العام على كل المسلمين

قلتم لنا نعم معناها انه هيبقى فيه استقرار وهيتغير الدستور خلال ستة اشهر من انتخابات البرلمان.
الآن ولسه ما استفتحناش دخلنا في سنتين ، سنة على ما تتم انتخابات الشعب والشورى وستة اشهر على ما اللجنة تعد دستور جديد وستة على ما يدرس ونص شهر على ما يستفتى عليه .
امال فين الستة اشهر يا بركه انت وهو.
طيب خلال السنتين دول فين الريس ؟!!!!!!!
يبقى الجيش!!!!!!!!!!!
امال خوفتونا وقلتو نعم علشان الجيش يرجع ثكناته والحياة تمشي ليه؟!!!
طب المادة 189 بتقول ان تغيير الدستور بناء على طلب من رئيس الجمهورية وموافقة مجلس الوزرا - الي معينه برضه رئيس الجمهورية – نكته مش كده !!!- وموافقة نصف اعضاء محلسي الشعب والشورى.
فين رئيس الجمهورية الي هيتقدم بطلب وضع دستور؟!!!! .
حد يقولي؟!!!!
الله........ انتو نسيتوا اللي كتبتوه ولا ايه يا حجاج.
طيب.
لو اتعدل الدستور واتلغى حاجات كتير زي تعديل شروط الترشيح لرئاسة الجمهورية ونسبة العمال والفلاحين والكوته يطبق من أمته من تاريخ الموافقه عليه طبقا لقاعدة الاثر المباشر للقواني ، ولا بعد انقضاء الدورة البرلمانية .
اقولك يا حجاج يا بتوع ربنا.
لو من تاريخ الموافقة عليه يبقى انسى ان نصف المجلسين يوافق على التعديل من اصله .
عارف ليه .
لانه مفيش حد اهبل .
اغير علشان امشي الصبح ويتعمل انتخابات جديدة يمكن انجح ويمكن اسقط .
لو بعد انقضاء فترة المجلس .
يبقى انتو نصبتوا علينا .
وربنا هيوديكو النار .
علشان ضحكتو علينا وقلتوا التعديل خلال ستة اشهر .
نقعد خمس سنين او ستة مستنيين الشمس تطلع بالليل .
ياعم المستشار والدكتور والمرشد انتم عملتم ايه في دنيتكم ، احنا شايفينككويس .
بتختموا حياتكو كدى ليه.
يا عم المستشار انت ابوكان راجل طيب .
ويا عم الدكتور انت كنت املنا في الضلمة دي.
ويا عم المرشد العام هو انت مرشد للمسلمين ولا على المسلمين.
الظاهر كده دي من علامات الساعة .

واخونا العوا اللي بيقول لو اقتنعت براي مخالف هقول لأ لتتعديلات .
اقوله اقرا يا دكتوووووووووووووو... عوا نص المادة 189 ، 189 مكرر.
بالله عليك وانا راضي ضميرك لو دي قضيه وقلت الدفوع دي تفتكر القاضي هيديك اقل من اعدام .
يا اخوانا اتقو ربنا .
مرة تقولو الجيش حبيبنا وهو اللي نجح الثورة .
وبعدين تقولوا الجيش لو قلنا لا اكيد هيطمع في الثورة .
انتو شايفينا هبل ياعم الحاج انت وهو وهو .
ولا استغليتوا طيبة الناس الغلابة ابويا وابوك وامي وامك.
فرقتو ايه عن الحزب الوثني .
كل اللي عملتوه انكو اظهرتو الوجه الثاني للعمله .
المادة 189 يا بتاع القانون انت وهو صريحة وواضحة .
1- لرئيس الجمهورية ( يعني جوازي ) رحنا بعيد مين بقى الي هيمسك ابو بكر ولا عمر . اهو هييجي واحد نكون تحت رحمته نستنى كرمه اذا شاف يغير ولا لأ.
2 - بعد موافقة مجلس الوزراء.
وزرا مين يا عم الحاج هو انت منتخب رئيس مجلس وزرا علشان يتاخد رأيه ده متعين من عند سيده ، بزمتكو انتو التلاته فيه حد قال لسيده في التاريخ كله لأ. ولو عرف انه هيقوله لأ كان شغله .
3 - لازم موافقة نصف اعضاء المجلسين .
بزمتكو يا مؤمنين فيه حد يوافق على تعديل بسرعة بسرعة علشان يسيب الجنة اللي هو فيها .
الا اذا كنتو ناويين تجيبو لنا ابو بكر وعمر وبلال وخالد.
او تحيبولنا شوية هبل بريالة .
وحتى لو وافقو تفتكرو امته هيكون بعد ست اشهر زي ما ضحكتو علينا .

يا ايها البشري
ياياها العوا .
ياياها المرشد .
يا كل من غرر بالناس .
والله الذي لا اله غيره لنقفن نحن وانتم امام من لا يغرب عن علمه شئ .
وسيكون احدنا ابيض الوجه والاخر اسوده .
فاتقوا الله اتقوا الله .

KING TOOOT said...

فيلسوف زمانه
سعيد بتشريفك مدونتي
وسعيد بتعليقك
وسعيد بزيارتي لمدونتك
تحياتي
___________________
فاتيما
أنا بأكتب الرد ده بعد نتيجة الإستفتاء ما ظهرت
شوفي يا ستي ،، كاك ،، أنا رأي ،، كاك ،، ،، إننا لازم مانسمحش ،، كاك ،، إننا ندخل العشة تاني ،، كاك ،، ليه بقى ،، كاك ،، لأن العشة ديقة و إحنا كتير ،، كاك ،، و بدل ما كان في العشة ديك واحد ،، كاك ،، حايبقى فيها ولا ميييييت ديك ،، كاك ،، فهمتي يا أختي العزيزة
___________________
KING TOOOT