Pages

ساكت الدهر .. بس بالشعر

رداً على تدوينة فاتيما بعنوان " ساكت الدهر "



السكوت

حقيقة من قبل الوجود

حقيقة

ليها ميت طريقة

للصمود

للخلود

ساعات بيكون مالوش حدود

وساعات بيبنوا له السدود

وساعات بيبقى طوق نجاة

وكمان حياة

وساعات بيبقى وفاة و موت

وساعات بيبقى دليل شرود

وساعات برود

وساعات يعبّر عن جحود

وساعات بيرسم ع الشفاة

بستان ورود

أوقات يكون أفكار لئيمة

وساعات يكون جُرم و جريمة

وساعات شتيمة

وساعات يكون أخلاق كريمة

وساعات يكون طيّب ودود

وساعات يطبطب ع الحبيب

وساعات يكون قاسي و رهيب

ساعات كئيب

وساعات يداري من الحسد

ومن الحسود

وساعات يكون له أعلى صوت

السكوت يا فاتيما تاه

مابين بشر عايشين معاه

وبين بشر

من ذل صمته و منتهاه

راحت تموت



4 comments:

فاتيما said...

:)


صباح الرقة يا وليد

ايه بقى
افهم من كدا ايه ؟!!!
دا كرسى ف الكلوب ف البوست بتاعى ؟!

أنا أحتج


اصلى كدا المفروض أمسحه
واحط كلامك بداله

طب كنت كتبته امبارح
ووفرت عليا وجع القلب
:)

منحرمش منك


وكالعادة
تحفة


والمشكلة ان
شهادتى فيك مجروحة
بس اخويا بقى ..هعمل ايه ؟


تسلم لإختك يا غالى

هبة وعمر .. انتا عارف
السلامات والتحيات
والبوسات والحضونات المعتادة


وعلى جنب
المرة دى كلامك
هوه اللى حضننى
وفاضل صفارة طويلة و تصفيق حاد
و تخيله انتا بيحصل دلوقتى

:)

نعكشة said...

حلوة الموسيقى

KING TOOOT said...

فاتيما
لا كرسي ولا كلوب يا فاتيما
وهو أنا أقدر يا أم يوسف
بس أصل البوست بتاعك كان مؤثر جدا
نورتي المدونة و التدوينة
وماتوصينيش على السلامات و التحيات و الخضونات و البوسات بتاعت بوبو و عمر
دا أنا ما بصدق
ههههههههههههههه
نورتي
___________________
نعكشة
مبسوط إنها عجبتك
___________________
KING TOOOT

Anonymous said...

جميلة فعلا وشاعر جميل