Pages

يا تاريخ شياطين أمن الدولة

على كل حيطانك وشم الموت

على باب زنازينك

صرخة ظلم بعلو الصوت

خرجت من إنسان ممقوت

والشعب لا قوّة ولا حولَ

يا تاريخ شياطين أمن الدولة

كان هنا حُرّاس

وحزام و مداس

أُمنا و ظبّاط

وسلاح و حاجات

من صنع الوسواس الخنّاس

وكلاب بتشلّح عِرض الناس

و الشعب لا قوة ولا حولَ

يا تاريخ شياطين أمن الدولة

كان خارج منكم نصل كئيب

وماسابش هلال

و ماسابش صليب

حنّا و محمود وحسن و حبيب

التهمة تخابر أو تخريب

مش كانوا واقفين بعد القُدّاس

أو جنب الجامع بالجلاليب

بدليل مالهوش ولا أي اساس

إترموا وإتحبسوا في سجن رهيب

والشعب لا قوّة ولا حولَ

يا تاريخ شياطين أمن الدولة

حوالين رقابيكم حق و دم

و دموع و قلوب سقيتوها الهم

إزّاي لحياتكم شيء بيطيب

كام زوجة و أم و أب و عم

أولادهم ماتوا من التعذيب

والشعب لا قوة ولا حول َ

يا تاريخ شياطين أمن الدولة


0 comments: