Pages

حكومة الأونطجية

والله بلدنا دي ليها العجب

يعني قامت فيها ثورة فجأة و بدون سابق إنذار

وخلعت واحد من أقدم الطغاه في العالم

و مع ذلك سايبه حكومته قاعدة تحكم

و كأن شيء لم يكن

وبعدين رئيس حكومة سابق خرب الدنيا

وجاب عاليها واطيها و ماحدّش حاسبه

ولا حتى حد شكله ناوي يحاسبه

و جيش بيحكم بإسم الشعب

ورغم كده مأجل أغلب مطالب الشعب ده

هو فيه إيه بالظيط

كل واحد يطلع لنا من أي بلاعة يعمل فيها عاقل

ويقعد يحط في وداننا طين من نوعية

أعطاء الفرص و التمهل و التعقل

ماترحمونا بقى من النغمة دي

البلد دي بتاعتنا و إحنا عارفين مصلحتها فين

لأن مصلحتها هي مصلحتنا

وإللي على الكراسي سواء كانوا

رؤساء

أو

وزراء

أو مجلس عسكري

أو أي حد

المفروض ينفذوا مطالب الشعب

الشعب و بس

الغريب إن فينا ناس لسه بيضّحك عليها

وبياكلوا من مهرجانات الطبطبة و النق الرخيص

عاملين إحتفال للشهداء

من الشعب و الشرطة

وكأن إللي خرج من بيته يهتف علشان الحرية

زي إللي خرج يضرب قنابل و رصاص علشان يحمي الحرامية

و كأن إللي مات و إيده فاضية أو فيها طوبة أو خشبة

زي إللي كان ماسك رشاش و طبنجة و قنابل مسيلة للدموع

و كأن إللي كان بيجري على رجليه في الشارع علشان يحمي نفسه

زي إللي كان راكب عربية مصفحة مليانه خروم مفتوحة للإغتيال و الموت

و كأن إللي مات وهو بيهتف شهيد

وإللي مات و هو بيقتل برضو شهيد

يا سلااااااااااااااااام

و بعدين الحكومة الغريبة إللي موجودة دي

أحمد شفيق رئيس الحكومة كل ما يطلع علينا

مابنسمعش منه أي حقايق

كل إللي بناخده وعود

لأ و عايز يضحك علينا

م أحنا شعب طيب

قلع البدلة و لبس قميص و بلوفر

و بيتكلم بتواضع و بتاع

وبيقول للصحفيين يا فندم

و كل ما حد يحاول يسأله عن تاريخ أو رقم محدد

يلف و يدور و ماناخدش منه عقاد نافع

دا رئيس وزارة مش عارف عدد المعتقلين السياسيين كام

ولا عارف همّا في أنهي سجن

ولا عارف كمية المطالب الفئوية للشعب

ولا عارف عدد المعتصمين

ولا عارف يلاقي حتى وزراء يرضوا يشتغلوا معاه

بس الحكومة دي إللي مش عارفة حاجة خالص

عرفت من تاني يوم للتنحي إن قطاع البترول خسر كام مليار

بسبب المظاهرات

و إن قطاع البنوك خسر له كام مليار هو كمان

بسبب المظاهرات

و إن قطاع السياحة طبعا هو كمان خسر مليارات لا تعد ولا تحصى

بسبب المظاهرات

و المتظاهرين الوحشين إللي معطلين عجلة الإنتاج

و إن يا حرام

الحكومة بتحاول تعمل كل ما في وسعها

علشان تصلّح إللي المتظاهرين بيبوّظوه

نفس النغمة القديمة بتاعت مبارك و أعوانه

إننا شعب جاهل و مش عارف مصلحته

وهما كتّر خيرهم إنهم مستحملنّا

طيب يا كذّابين

عرفتوا إزاي تحصروا الخساير دي كلها

إللي محتاجة قوايم تدفق نقدي

و بيانات إحصاء

و حسابات تحليلية

وتقارير تقييم

و تقارير حصر خسائر

وتقارير أمن

وتقارير متابعة حركة بورصات العالم

و في نفس الوقت مش عارفين تحصروا عدد المعتقلين

في معتقلات إنتم بتشرفوا عليها

و مش محتاجة منكم أي جهد

مافيش أي حاجة تثبت بيانات الخساير الكاذبة

ولا حاجة تأكد إنكم ماتعرفوش عدد المعتقلين و أماكنهم

الموضوع ببساطة إنكم بتلعبوا علينا لعبة مكشوفة

و سازجة و هبله

لأنكم ماتعرفوش تعملوا غير كدة

ولا إتعلمتوا عمركم غير كده

كلكم بتخونوا الثورة إللي قامت علشان تنتزعكم من كراسيكم

إنتم و إلاهكم الأعظم

إللي لسه بتبعتوا له تقارير عن بلدنا و شعبنا

و بتضللوا الجيش بإجراءات وهمية علشان في الآخر

يبقى الجيش في وش الشعب

وتخرب خالص

لكن ده بعدكم

وبعده هو كمان

مصر ليها لسان و إيد

ورجل لو لزم الأمر

وعندنا إستعداد نقدّم شهداء لحد ما نخلص

شهداء بجد

مش زي شهداء الشرطة

لا مصر حاترجع تاني لعصر القهر

ولا إنتم ليكم مكان في الأيام الجاية

يا حكومة الأونطجية


5 comments:

فاتيما said...

الله يفتح عليك يا وليد

البوست رائع
هعمل لينك من عندى
بجد ..لا فوض فوك يا غالى


أه
فبل ما أمشى
بوسة لبوبو و حضونة لبيكا
لو سمحت

:)

VÖltaa said...

والله الواحد زهق

احنا وحشتنا ريحة القنابل

م. على حسين الفار said...

جميل اوى

لكن للاسف انا شايف ان مفيش عند حد خبرة انه يعمل اصلاحات حقيقية وكل العايزين الشعب يقتنع به ان الدوله بتلم نفسها
وبتبنى اقتصادها

ام لو قامت حرب فى مصر لمده طويله ايه موقفها
على كلامهم مفيش اقتصاد يكفى ذلك

انا قلت من الاول يا رب استر

بجد حرااااااام

باين ان الجهاد الاصغر خلص وهما كده بيجبرونا على الجهاد الاكبر

KING TOOOT said...

فاتيما
الله يخليكي يا أجدع أخت في الدنيا
أصلي مقهور قوي من إللي بيحصل
خايف الدنيا تخلص على كده و تبقى العملية نامت تاني زي زمان
طبعا طلباتك بخصوص بوبو و بيكا مش عايزة توصية
ههههههههههههههه
ومش محتاجة لو سمحت
نورتيني
____________________
Voltaa
ربنا يستر و ماندمنهاش
خالص تحياتي
____________________
eng. timuchin
الحقيقة أنا مش فاهم قصدك إيه ؟
ولا فاهم إيه موضوع الجهاد الأصغر و الأكبر ده
إنما أنا معاك في جملة واحدة
ربنا يستر
خالص مودتي و ترحيبي
____________________
KING TOOOT

اسكندراني said...

بقالي كتير ما قريتش حجاتك الحلوة
عنوان بيتنا زي ماكان
http://ya-masr.blogspot.com/