Pages

قول آلوه .. و إكذب براحتك


المشهد الأول

نهار خارجي

قهوة في وسط البلد وقت الظهيرة ، أجلس و يجلس بجانبي شحص ممتلىء يرتدي بدلة ضيقة نوعا ما و رابطة عنق بشعة ، ترتكن بجانب قدمة اليمنى حقيبة أوراق جلدية سوداء ، يتحدث هذا الشخص في التليفون المحمول ، يتضح من الحديث أنه محامي

والله يا باشا أنا قاعد دلوقت في المحكمة

دا أنا كان عندي قضية في محكمة عابدين " فرقعتها " ورحت مدينة نصر علشان أحضر الجلسة بتاعتك

لا إضراب أيه و بتاع إيه ، إحنا شغالين يا باشا

لسه مستنيين الرول

بالتوفيق إن شاء الله

سلام يا باشا

يغلق الخط و يسحب نفس عميق من الشيشة التي تقول أحجارها الأربعة أنه يجلس هنا منذ ساعة على الأقل

________________________________

المشهد الثاني

نهار داخلي

أقف في طابور التذاكر في سينما داخل مول كبير ، أمامي آنسات محجبات الحجاب الحديث ، بادي كارينا و بنطلون جينز محزق و طرحة مربوطة على طريقة إسبانيش حول رأس لا تحمل أي ثقافة أو فكر أو رأي ، إحداهن تبتعد قليلا عن المجموعة مما يجعلها تقترب أكثر من موقعي ، وتتحدث في هاتفها المحمول

أيوة يا ماما

طيب يعني أعمل إيه

ما أنا أصلي واقفة برة المدرج بتاع المحاضرة

هي مخاضرات بعد الظهر بتتأخر شوية

لأ أصل الدكتور ده بيطوّل شوية

حاضر

حاضر ياماما بقى

لأ رباب حاتروحني معاها بعربيتها

طيب

باي

تعود مسرعة إلى صديقاتها لتسأل متى يبدأ الفيلم

_________________________________

المشهد الثالث

نهار خارجي

أجلس في محل أحد التجار في منطقة القلعة ، أمامنا جامع الرفاعي ، منتظرين وصول بضائع ، يتحدث التاجر في هاتفه المحمول ، قائلا

والله يا حاج "عرفة" أنا بأحضر لك البضاعة بأيده أهه ، بأمرك يا رب

ماهو أنا شغال يا حاج "عرفة" بإيديا و سناني ، وكله بأمرك يا رب

بأمرك يا رب قبل صلاة العصر يكون الواد عندك بالبضاعة ، بأمرك يا رب

من عنيا يا حاج "عرفة" مافيش تأخير دقيقة واحدة بأمرك يا رب

يغلق التاجر الخط و أنصرف أنا لصلاة الظهر و بعدها العصر و بعدها المغرب ، وأعود لأجد بضائعي قد وصلت متأخرة سبع ساعات كاملة ، وينطلق من هاتفه المحمول رنة عبارة عن دعاء بصوت شيخ ذو لكنه خليجية واضحة ، يرد هو على الهاتف قائلاً ، والله يا حاج عرفة قبل صلاة العشاء كل البضاعة حاتكون عندك

بأمرك يا رب

13 comments:

мαησηα said...

اهو ده بقه اللى انا مش قادرة اعمله

ومش عارفة اعمله رغم بينى وبينك انا

كنت كدابة محترفة وانا صغيرة

ههههههههههه

ده اللى بيقصدوه لما حد يقولك مشى

حالك يا ابنى

الزمن ده عايز كده اكدب وقول كلمتين

حلوين وشوية محلسة خلصت الحكاية

وبقيت حبيب الكل

مش عارفة والله يا ابو عمر

احنا اللى صح ولا هما

ربنا يريحنى من الصداع اللى ف دماغى

ويهدينى لحل اللغز ده

انا صح ولا هما ؟؟

لو تعرف قولى

ينوبك ثواب ف اختك

لــــ زهــــــراء ــــولا said...

كالعادة استاذ وليد كنج توت مبدع على طووووووووووووووووول ...كأني اقرأ جزء من سيناريو...اقرأ باستمتاع وتخيل وتحليل... عجبتني وصفك للحجاب الحديث جدااااااا بشوفه كتير قوووووووي وخايفة عيني تنام واصحى وماشوفش غيره...

لولا

لــــ زهــــــراء ــــولا said...

عندياستفسار حضرتك عرفت ازاي ان حجر الشيشة بيقول انه قاعد بقاله ساعة؟. مفهمتهاش

سواحة said...

:-)))
فكرتنى بموقف حصلى

كنت راكبه اتوبيس و مسافرة لاهلى مطروح و قعدت قدامى شابة من لبسها بنت ناس و بدات بعد طلوع الاتوبيس كمية مكالمات على الموبيل
:-) و الله غصبن عنى ركزت فى الكلام قوى هى اصلها كانت بتهمس قوى :-)

المحصلة من الى فهمته
الشابة (مش حقول انسة) مسافرة ل... نقول حبيبها فى مارينا
و متفقة مع صاحبتها الى فى مطروح انها لما توصل يعملوا مكالمة زى فيديو كوفرونس علشان ام الشابة تتطمن ان بنتها عند صاحبتها و تسمع صوت الصاحبة فى الخلفية او تكلمها كمان

انا جالى بصراحة اذبهلال لتفكيرات الشيطانية لاستخدامات الموبيل الحديث
فى وقت انا مكنتش اعرف عنه الا انه بيوصل مكالمات و يستقبل رسائل و بس
اتارية بيعمل افلام :-)

اللهم احفظنا منه و من مخرجينه

adel said...

هههههههههههههه
ايه الاحراج ده
بس سبب كرهي للموبايلات اني بكره الكدب
وبكره ان حد يسالني انت فين ويقول تعالي حالا و يطلع بيستعبط
لذلك بنفض اغلب الوقت
بس عمري ما عملتها و قلت اني في مكان غلط او تاخير

رغم ان كل اصحابي يبقي بيكلم باباه مثلا و يقوله انا راجع البيت و هو قاعد بيلعب معانا لسه
:):))

فاتيما said...

ماهو بغض النظر عن الموبايل
اللى بكرهه عمى
و انه زى ما عادل قال
بيجبر السخص يتهرب او يتنظبط زى مجرم و حد متتبعه ..لكن

الكدب طبيعة انسانية بحتة
محدش بيعرف يتملص منها يا وليد
مهما عمل و سوى

الفيصل الوحيد متهيألى
هوه الضمير

حد ضميره يبهدله
فيقلل فى مساحة الكذب

او حد ضميره متبنج
دائما ابدا
فبيكدب و كأنه يتنفس


كان نفسى اشوفكم قوى
بس عارفة ان اكيد الظروف لم تسمح
عندنا كام لقاء الأيام الجاية
و اتمنى اشوفكم و لو مرة فيهم

سلامى الخالص ليك
يا غالى
و بوساتى لبوبو
و حضوناتى لعمورى

حاجات جوايا said...

الكذب للاسف عادة مكتسبة مش عادة فطرية
بمعنى ان اللى بيكذب بيكون مضطر انه يكذب عشان اللى حواليه مش هيقبلوا الا الكذب
والصدق ممكن يعمله مشاكل

وفيه ناس للاسف حتى لو الصدق مش هيعملهم مشاكل الا انهم بيكذبوا من غير داعى ولا مناسبة وسط كلامهم عادى جدا .. لدرجة انهم ممكن ميكونوش واخدين بالهم انهم بيكدبوا .. يمكن من كتر ما اتعودوا عالكذب :(

المشكلة ان الكذب بقى سهل ومتداول بغض النظر ان كان فى موبايل او حتى وجها لوجه

وده معناه خطير
ان معدش فيه تربية دينية سليمة
تعرفنا ان الكدب من اكبر الكبائر
وان المسلم ممكن نقبل انه يكون فيه اى عيب الا الكذب


ربنا يرحمنا ويحفظ اولادنا

تحياتى وتقديرى

Tamer Moghazy said...

بجد احنا عندنا قدرة (اكتشاف استخدامات) هايلة لاي اداة من ادوات التكنولوجيا ويا ريتها استخدامات صح..!!

على فكرة تصميم مدونتك اكتر من راااااااائع .. من زمان مش شوفت استايل حلو وجديد كده :)

egypt-panorama.com said...

شكرا على الوضوع المميز

mohamed mohiy said...

مدونتك رائعه جدا جدا واعطيها مذيد من الاهتمام
وادعوك لزيارة مدونتى


تعليم التعامل مع جوجول ادسنيس من الف الى الياء

http://wwwfriendpluscom.blogspot.com

وابداء رايك فيها

وان اردت يمكننا تبادل الروابط معا لتبادل المنفعه

شكرا

www.Egy2Fire.com/vb said...

شكرا على الموضوع الرائع
منتديات ايجي فير
www.Egy2Fire.com/vb

فاتيما said...

كل سنة و انتا طيب يا ولييييد

عيد ميلاد سعيد يا أجمل ناس عرفتهم
اختك جاية و كلها خجل بسبب تقصيرها ناحيتك
و بتقولك اسفة جداااااا
و كل سنة و انتا طيب جدا
و اخويا جدا
و ربنا يحفظلك هبة و بيكا جدا جدااااا
و يديم الود ما بيننا جداااا
و عيد ميلاد سعيد
ان شاء الله
جدا جدا جدااااااااا


---------------------------
http://www.glitter-graphics.com/graphics/952863
---------------------------
http://4.bp.blogspot.com/_W3wysV9ekzo/S7Trv9veVFI/AAAAAAAAATY/KHcGhmE015Q/s1600/happy-birthday-roses-wtrmk.jpg
---------------------------

Adnan said...

كلام جميل