Pages

على دمع الفرح


على دمع الفرح الساكن جوة عيونك

نازلة رموشك تتحنى

فرحانة كأنها بتبوس أعتاب الجنة

وكأن ماكانش في يوم أحزان

ولا خنجر دايس على ظهري

مسعور و جعان

وكأن ماكانش في يوم حيوان

داير ع الشر بيتمنى

يتشفّى كمان

من نظرة وضحكة جوة عيونك

كل النار صبحت دخان

قلبي خلاص إتطمّن جدا

ماباقاش خايف أو قلقان

أصل الخوف يا حبيبتي طريق

يبتدي لما يكون لي صديق

خاين أو أصلاً خوّان

وأنا دلوقتي ماليش يا حبيبتي

غيرك في الدنيا دي خلاّن

يبقى حاأخاف من إيه بالزمّة

وإنتي ملاك بهدوم ولسان

بديعة من صنع الرحمن

إللي تكوني معاه يتهنّى

علشان حضنك هوّ الجنة

وفي قلبك مليون رضوان

7 comments:

بوبو said...

ف قلبي مفيش غير انسان واحد بس هو انت.. سندي بعد ربنا سبحانه وتعالى وانت كل دنيتي ونور عنيا وفرحة قلبي.. ربنا يخليك ليا ويباركلي فيك وف حبك وفي الواد بيكا

لــــ زهــــــراء ــــولا said...

وليد
بسم الله ما شاء الله
البوست تحفه والعنوان رائع اما الصوره بقى فحدث ولا حرج
الله اكبر عليك عندك ذوق عالى فى كل كلمه بتقولها وكمان فى كل صوره انت بتختارها

طيب اعلق اقول ايه
تقريبا لسه ما درستش فى النقد الفنى اى حاجه تنفع تتقال بعد كلامك وبعد اول تعليق كمان ....
ربنا يحفظك لك بوبو ويسعد ايامكم مع بعض
كان نفسى اجى بؤجة الخير علشان اتعرف بيك وبها ان شاء الله تتعوض المره الجايه


"أصل الخوف يا حبيبتي طريق

يبتدي لما يكون لي صديق

خاين أو أصلاً خوّان "

لا تعليق على الروعه دى



"وإنتي ملاك بهدوم ولسان "

كنت باقول من الغباء انك تعيش زى الملاك بين البشر كنت باقول ان مافيش ملايكه على الارض لكن كلامك ده غير وجهة نظرى وتاكدت ان هناك ملايكه بهدوم ولسان كمان ....





"علشان حضنك هوّ الجنة

وفي قلبك مليون رضوان "

اجمل ما قيل فى الرومانسيه مهما سمعت او قرات دى هتفضل اجمل جملة غزل عفيف قراتها فى حياتى كلها




مافيش كلام يتقال
خلص الكلام
عجزت الحروف
بقى الدعاء لك ان ربنا يرزقك من حيث لا تحتسب ويبارك لك فى زوجتك وابنك

زهـراء

ســـهــــر said...

أصل الخوف يا حبيبتي طريق

يبتدي لما يكون لي صديق

خاين أو أصلاً خوّان

وأنا دلوقتي ماليش يا حبيبتي

غيرك في الدنيا دي خلاّن


وااااااااااااااو تحفة تحفه بجد
كلام جدا مرتب
اول زيارة واكيد مش الاخيرة

أنا - الريس said...

اسلوبك جميل
مشاعرك تحفة
شعرك غنائي
القافية رائعة

نقدي شيئن وارجو انك تتقبلهم بصدر رحب واستحملني :
اولا وانا يا حبيبتي مليش غيرك في الدنيا دي خلان حاسس انها تقيلة شوية -
ثانيا تشبه الملاك ونفي عنه صفة الملبس أو التكلم ,,

الزجل رائع ، تكرم الأنامل

فاتيما said...

يا لهوتينى ى ى ى ى
عليك يا وليد


يا إخوانا حرام عليكو
اللى بينكتب دا


راعوا مشاعير اخوانكم الغلابة
اللى غرقانين حب أو اللى خاليين حب
و مش عارفين يقولوا و لا يسمعوا
واحد على عشرة
من الحاجات الحلوة دى ؟؟!!

لكم اخوة ف الصومال عندهم حرمان عاتشيفى و نقص حاد فى الرومانسيات دى ..براحة علينا شوية و النبى احسن خايفة عليكو تتنشوا عين
ربنا يخليكم لبعض و لينا

انتا عندك الف مليون حق يا وليد
هبة مخلوقة مش م الدنيا
شبه الملايكة كدا ..بجد

ربنا يخليكم لبعض

الله اكبر
الله اكبر
الله اكبر

ربنا يحفظكم من كل شر
و يصلحلكم الاحوال دايما يا رب

بحبكم يا جمااااااااااااعة

sony2000 said...

الله الله
بجد مشاعر حلوه جدااااااااا
ربنا يحميكو يارب
ويبعد عنكو العين
الله اكبر
ياااعم علق خرذه ذرقا
لحسن تنطسو عين
الله يحفظكو ياااارب:)

KING TOOOT said...

بوبو
الرد حايكون مباشر
وجها لوجه يا قمر
تسلميلي يا غالية
____________________
زهراء
والله أنا مش عارف أشكرك إزاي ؟ تعليقك في كل مرة مشجع جدا و بيديني ثقة في النفس رهيبة
آمين آمين على دعواتك لينا
نورتيني
____________________
سهر
أشكرك جدا على التعليق
وطبعا على الزيارة
وأتمنى فعلا ماتكونش آخر زيارة ليكي هنا
تحياتي
____________________
MR.PRESIDENT
منور المدونة يا فندم
هي الجملة دي تقيلة شوية فعلا
إنما إعتراضك على موضوع الملاك أنا مش فاهمة
خالص تقديري
_____________________
فاتيما
هبة دي عندي مش أجمل إنسانة في الدنيا
لا
دي هي الدنيا
ويارب نكون مع بعض أنا وهي في الآخرة
في الجنة طبعا
يارب
سلامي ليكي و ليوسف
ولفارس الصومال النبيل
_____________________
sony2000
نعلق خرزة زرقاء و خضرا كمان
وخمسة و خميسة كمان
خالص إحترامي
_____________________
KING TOOOT