Pages

أجمل حاجة إن إنت جمال


راجل جيت من ظهر الريس

شكلك طيب و إبن حلال

أجمل حاجة في شخصك إسمك

أجمل حاجة إن إنت جمال

بس إسمح لي شوية أتجرأ

وأسألك المرة دي سؤال

لجل أتطمن لما سيادتك

تبقى الريس ع الأحوال

هل فيه واحد زيك ممكن

يعرف حاجة عن التقسيط

أو يسمع عن وصل أمانة

بيودّي الواحد في حديد

هل ممكن تخدمنا سعادتك

و توفر لولادنا وظايف

لو حاتقول آه .. إبقى الريس

و أنا أوزع شربات و قطايف

قول لي إزاي حاتحل مشاكل

الفلاح أبو قلب نظيف

وإنت في قصرك شارب واكل

وعمر عنيك ماشافتش الريف

قولي إزاي حاتحس بفاطمة

أو بزخاري أو عواضين

وإنت صحابك رامي و هيثم

أو مايكل ونادين و شيرين

قول لي إزاي حاتخللي اللقمة

تنزل تملى عينيّا و بطني

وأنا محروم ماباشوفش اللحمة

إلاّ في عيد الحزب الوطني

لو فيه شاب عايز يتجوز

قول لي منين حايجيب الشقة

عمر في يوم ما الحظ نده له

وهو وأهلة بياكلوا بدُقّة

طيّب قول لي إزاي حاتحارب

لو أولاد صهيون هاجمونا

مع أمريكا في عهد أوباما

ونتنياهو إبن المجنونة

أنا مش عارف جد صراحة

تبقى رئيس ولاّ ماتبقاش

وإزاي تحكم شعب بحاله

لسه حياته ماتعرفهاش

قول و إشرح لي إزاي الراعي

يرعى ف أرض ماشافش نباتها

قول و إشرح لي إزاي الريس

يحكم دولة ماعاشي حياتها

26 comments:

كيكى عوووووو said...

أستاااااااااااااااااااذ

فاتيما said...

تحفة يا وليد
تسلم ايدك

ستيتة said...

يفرق ايه حسني وجمال
ما الأول عاش في الطين
وجه م الكفر و الفلاحين
وكان موظف بيقبض عشرين
حس باللي من غير مال؟
يفرق ايه حسني وجمال

لــــ زهــــــراء ــــولا said...

وليييييييييد

عجبتنى الفكره
طريقة الطرح تحفه بجد

دمت متالقا

زهراء

عاشقه الرومانسيه said...

ياريته يرد عليك
بجد اسلوب البوست اكتر من راااائع
تحياتى ياوليد باشا
(:

adel said...

عاجبتني جدا
بس الاهم هو بيقرأ مدونتك ؟؟

shimaa elkholy said...

اولا جميله اوي بجد
تصفيق حاج هنا يا قوم

بس يعنى حضرتك احنا بقالنا خمسين سنه الى بيحمنها سافينها من على التراب وجايين من قاع المجتمع

وبرضه مافيش حاجه اتغيرت
بقينا للاسوا

اعتقد ان الازمه ازمة ضمير
مين عنده ضمير يجى يرحمنا من الي احنا فيه يا ناس

مييييييييين


عمر بن الخطاب كان بيحكم امبراطوريه مترامية الاطراف

بيحكم شعوب ما بتتكلمش بلغته وما بيتكلمش بلغتهم
ومع ذلك ملأ الارض عدلا

حسبنا الله ونعمل الوكيل

Unknown said...

تسلم الأيادى ياأبو عمر
دمت بكل الخير و ربنا يحفظ لنا مصر
تقديرى

Che said...

نفس تعليق عادل يا كينج ... حلوه بس يا ترى الحليوه بيقرا ؟؟

شاب فقرى said...

أجمل حاجة إن إنته حبيبنا
إن حبيبنا وإبن الغالى
دايما دايما دايما عالى
لا مسطرننا ولا مكيفنا ولا مظبنا ولا مهيسنا
أجمل حاجة يا جوجو إن إنته هتبقى رئيسنا :D

------------
مقتنع بموهبتك منذ المرة الأولى التى زرت فيها مدونتك
خالص تحياتى وإحترامى لك ولكلماتك
شاب فقرى

سواحة said...

متفرقش
بجد متفرقش

الرك مش على الى عاش
الرك على الاحساس

اكيد مقعدش على طبلية
و لا غمس بوذن قطة ماية فولية :-)
بس هو عايز المسئولية

مش خايف منها و بيسعى لها
و ديه حسابها فى الاخرة مسئولية

يعنى البرادعيى بينتحر
بس راجل عاش عمره و حاسس انه لازم قبل ما يودع يتنحرر

و يغير
او يزوق الدولاب علشان التغير يقدر

و لنا الله قادر
و ياريت لو كمان حق الاختيار و القرار

لــــ زهــــــراء ــــولا said...

وإزاي تحكم شعب بحاله
لسه حياته ماتعرفهاش
قول و إشرح لي إزاي الراعي
يرعى ف أرض ماشافش نباتها
قول و إشرح لي إزاي الريس
يحكم دولة ماعاشي حياتها



قال -صلى الله عليه وسلم-: (إن الله سائل كل راع عما استرعاه: أحفظ أم ضيع؟ حتى يُسأل الرجل عن أهل بيته)

وكذلك يُسأل الحاكم عن رعيته وكيف رعاها وحفظها واذا كان ضيعها ..فهي امانة


مرة حدث ابا الدرداء رسول الله صلى الله عليه وسلم فقال
فقال له : يا رسول الله صلى الله عليه وسلم ولني فقال له عليه الصلاة والسلام : يا أبا الدرداء إنها لأمانه وإنها يوم القيامة لخزي وندامة


لـــولا

Ms Venus said...

كلمات جميلة اوى

وعبرت عن كل الشعب المصرى بجد

تحية ليك ولقلمك الراقى

Baskouta said...

حلوة اوي
وحقيقية اوي
تحياتي البسكوتية

KING TOOOT said...

كيكي عوووووو
أششششششششكرك جدا جدا جداااااا
____________________
فاتيما
تسلمي يا أم يوسف
إنتي و يوسف
____________________
ستيته
إيه الشعر الجميل ده يا دكتورة
إحنا نخاف بقى على نفسينا كده
أوعي تركزي في الشعر لتغطّي علينا كلنا
تحياتي و تقديري
____________________
لولا وزهراء
أشكرك جدا يا زهراء على التعليق
والمتابعة
والمرور
والتشجيع
____________________
عاشقة الرومانسية
يرد إيه بس
مابلاش لا ييجي الرد مايعجبناش
ونبقى جبناه لروحنا
____________________
adel
بالتأكيد مش بيقراها
و بجد نفسي يقراها
وبعدبن كفاية إنت بتقراها
يعني هو أحسن منّك ؟
____________________
ندى الياسمين
شوفي يا صديقتي القديمة ذات الإسم الجديد
الموضوع مش إن يحمنا واحد من قاع المجتمع أو من فوق كريمته
المهم إنه يحس بالقاع ده
وكمان يشوفه
ويلمسه
علشان يفهمه ويعرف يتعامل معاه
_____________________
أحمد عبد العدل
اللهم آمين
ويحفظها لنا من الفتن
لأن دي أهم حاجة يا صاحبي
_____________________
che
أقعدوا إسألوا و قولوا
ياترا الحلو بيقرأ
ياترا الحلو بيقرا
لما نلاقي حبايبنا الحلوين كلهم بيقروا و عازمينا عندهم على حفلة طراقيع
آه
ماهو سلومة الأقرع مابيعرفش أبوه هناك
_____________________
شاب فقري
والله أنا بأشوف تعليقك
بأحس إني مبسوط جدا
مش عارف ليه
بس بجد أشكرك جدا على تشجيعك الدائم ليا
خالص مودتي و إحترامي و تقديري وكل الحاجات الكويسة إللي بتتكتب دي
نورت المدونة يا صديقي
_____________________
Wanda
طيب عايزين واحد عنده ضمير ينتحر
وبعدين إللي من وسط الناس بيكون عنده إحتمالين
إنه يكون كويس ويحس بالناس
أو إنه يطلع زي الطين و مايحسش غير بنفسه
إنما إللي مش وسط الناس
مش ممكن يحس بيهم لأنه مايعرفهمش
يعني ماعندوش غير إحتمال واحد
سايبها لزكائك بقى علشان تعرفيه
_____________________
لولا و زهراء
عندك حق يا لولا
السلطة فخ
لا يسعى له عاقل
بس ده للي يعرف إنها تكليف مش تشريف
لكن مين يسمع و يشوف و يفهم
بس سيبك إنتي
العز حلو بردو
ههههههههههه
______________________
Ms Venus
أشكرك جدا على متابعتك
وعلى تعليقك الرقيق
وعلى تشجيعك الدائم
ويارب أكون دايما موفق في تدويناتي
علشان تعجبكم
خالص تقديري و إحترامي
______________________
Baskouta
منوراني في مدونتي المتواضعة
ومبسوط إن البوست عجبك
تحياتي الكينجية
إشمعنى إنتي
ههههههههههه
_______________________
kING TOOOT

صمت المشاعر said...

كلمات جميله جداااااااااااا


دمت بخير

sony2000 said...

انا اول مره اعلق هنا وبأذن الله موش هتكون الاخيره
بجد بوست راااااااائع ومن كتر ماعجبني موش عرفه اعلق عليه
تقبل مروري وتحياتي

KING TOOOT said...

صمت المشاعر
أشكرك جدا جدا
خالص تحياتي
__________________
sony2000
أنا كمان بأتمنى إنها ماتكونش الأخيرة
نورتي مدونتي المتواضعة
تقديري و إحترامي
__________________
kING TOOOT

Unknown said...

تــؤتؤ لأ
مـــالاكش حق
ماشافش الريف أزاى؟
شــافه فى السيما والافلام
أو شافه فى سويسرا أو اليونان
مش لازم ريفنا اللى كل أمراض
وفقر وغلب وهوان.

Tears said...

و هل ركب اتوبيس عشان يعرف معناه المواطن؟...لعب كورة فى الشارع عشان مش لاقى نادى و لا سمع عنه؟ وقف فى طابور عيش؟ دخل قسم شرطةة و جرب الاهانه؟

و الاهم من ده كله عمل ايه و هو رئيس لجنه السياسات السنين دى كلها؟

كونه تربى فى بيت رئاسى ده ضده مش معاه لان معناه انه لم يتثنى له معرفه اى شىء عن البلد بل هو فضل التعليم فى جامعه اجنبية لان التعليم فى بلدنا خربان ثم فضل والده العلاج فى دولة اوروبية لان العلاج عندنا هباب و كل ده محصلة فشلهم

-_- said...

من اجمل ما قرأت

احييك بشده

رائعة جدا

KING TOOOT said...

norahaty
وهو الريف السويسري ده ريف
ريف إيه ده إللي من غير طين و تراب و حمير و جلّه و سوق مواشي و توكتوك
ههههههههههههه
نورتي المدونة ، فينك من زمااان
_________________
Tears
إحم إحم
ليه بس الكلام إللي يودّي في حديد ده
يالله
نخليها على الله بقى و نرد
ماهو سبب رئيسي في موضوع التوريث ده هو إنهم يداروا على فشلهم ده
لأن أي حد جديد مش تبعهم حايمسك البلد حايطلّع المستخبي وتبقى فضايح بجلاجل
ربنا يرحمنا
__________________
Sharm
يارب دايما يكون إللي بأكتبه يعجبك
خالص تحياتي
نورت المدونة
__________________
kING TOOOT

Unknown said...

موجودة يافندم
لكن يمكن تقصير
فى كـــتتابة
التعليقات

محمد فؤاد (صاحب عمود النور) said...

الله عليك ياكبير
كلامك فعلا صح جدااااا
نفسى اعرف ليه كل لما بيروح حته فى مصر يجيبوا فى الجرنال صورة فلاحين او صاعيده بتبوس فيه؟؟؟ على اساس ايه؟؟
الجرايد الحكومية بتعمل تمهيد للشعب نفسيا ان دا الرئيس القادم
كل اللى انا اعرفه عن انجازات جمال مبارك جمعية جيل المستقبل!!!!!!!!!!!

هموس said...

King Tout,

ما اجمل ما اوجزت عن مطالب شعب مقهور فقير غلبان,,,أثقلوه بالدين والهم والضيم ,,, وكم رائعة كلمتك " لو حاتقول آه .. إبقى الريس و أنا أوزع شربات و قطايف,,, محسومة سيدي فمن قالوا لمصر آه كثر ومن نفذ بعد لم يولد,,,حتى قائد كل ثورة على مر التاريخ من ماركس وروسو وميكافللي...الخ دوما ما يصبح دكتاترورها,,,دعني اهمسك ( فاكر أغنية شادية ألو ألة احنا هنا؟ لما قالت ان حضر زيد أو ذهب عمرو وانا بأكملك لاضامن الا ما تخبئه أقدار) من عاش همك؟ ومن كان بين أبناء وطنك ؟ البرادعي ؟ ولا ولا ولا دعنا ننتظر ,,, وان كان لأحد منهم ضمان فاليقدمه لنا فورا واحنا نوزع شربات ودندي وقطايف وكله,,,بجد يعجبني أسلوبك,,,تقبل مروري

KING TOOOT said...

norahaty
إن شاء الله دايما موجودة و منوّرة المدونة
__________________
صاحب عمود النور
صديقي و أخويا محمد
الموضوع مش تمهيد
ده تهديد
لو ماإقتنعتش نهارك مدوحس
وبعدين هي جمعية جيل المستهبل ( قصدي المستقبل ) دي تعتبر إنجازات ؟؟!؟؟
عال و الله
ماكنتش أعرف
نورت مدونتي يا باشا
___________________
هموس
أشكرك جدا على تعليقك الرقيق
وكلامك صح
شعب مقهور و له مطالب كل الحكام عارفينها و لكن عاملين نفسهم مش فاهمين
وكأن المطالب دي من رابع المستحيلات
مع إنها في بلاد تانية من الأساسيات
سعيد جدا بزيارتك لمدونتي
وأتمنى ماتكونش آخر مرة
نورتيني
___________________
KING TOOOT