Pages

لقاء السعادة .. غير سعيد


إجتمع المدونون ، و أنفضّ الإجتماع دون أدنى شك عن صداقات و تعارف محترم و جميل ، لكني أرى في هذا الإجتماع روح مفقودة و بهجة مفتعله ولا أعرف لماذا .

حضرنا أنا وزوجتي في الموعد لنجد العديد من المدونين و المدونات ينتظرون على باب النادي ، رحبت بنا فاتيما و غمرتنا بمشاعرها الجميلة كعادتها في كل الأوقات ، نظرت إلى عيون زوجتي لكني لم أرى في عينيها تلك الفرحة الطفولية التي أراها في كل إجتماع للمدونين ، ومن هنا بدأت مشاعري بالإطراب و عدم الإرتياح ، بريق مفقود في عيون الجميع ، ستيتة تفسر ذلك بحالة إكتئاب جماعي أو إحباط جماعي ، لا أرى ذلك ولا أعرف له تفسير آخر ، لكن ربما كما تقول ستيتة ، إكتئاب جماعي بدون أسباب ، لم تأخذ فاتيما على عاتقها تنظيم الأمور و توجيه الجموع – كما تفعل دائما – رغم انها حاولت بإستماته أن تكون كعادتها في تلك اللقاءات ، وبعد فترة وجيزة تركت الدفه و الشراع لستيته ، التي حاولت هي الأخرى بإجتهاد وصبر تحسد عليه أن تُخرج الناس من حالة الثبات العميق والإحباط العام المختفي وراء الإبتسامات الباهته وكلمات الترحيب المجامله ، ومع الوقت تحولت نظراتها التي كانت تحاول إنتزاع البهجة لترتسم على وجوه الجميع إلى نظرة تقول للجميع " أنا بأنفخ في قربة مقطوعة أو بأذن في مالطة "و إنصرفت ستيته لأحاديث جانبية مع عادل وشيماء و آخرين ، تاركة دفة المور للا أحد حتى سقطت الدفه و غابت ، وأصبح المشهد سريالي جدا ، مجموعة من المدونات في الخلفية مجتمعات على الجانب الأيمن و أخريات مع آخرين على الجانب الأيسر ، و المجموعة الرئيسية جالسون على شكل حدوة حصان و منهمكين في أحاديث جانبية بشكل ثنائي أو ثلاثي ساعدت في إضفاء روح عزلة على الناس جميعا ، عندها نظرت إلى عين زوجتي مرة أخرى فقرأت فيهما التململ و الديق ، فلم يكن مني إلاّ أن قلت لها " تحبي نقوم " ، وببرائتها المعهودة إبتسمت بما يعني " ياريت " ، عندها تحركنا نلملم حاجياتنا المبعثرة ونلملم معها أمانينا ، فلقد كنّا نحلم بيوم مميز ، نقابل فيه الكثير من الأصدقاء المدونين ، الذين لا تساعدنا الحياة و المشاغل و الظروف المتباينة أن نقابلهم دوما أو بشكل منتظم ، و بالتأكيد فقد كان يوما جميل ، وكانت الصحبة ودوده و لطيفة ، لكنه لم يكن بالتأكيد يوما مميزا على الإطلاق ، و حقا لا أعرف أي روح لنا قد إختفت ، وإلى أين غابت .

15 comments:

عاشقة القمر said...

يارب دايما تكون متجمعينا علي الخير

عاشقه الرومانسيه said...

ليه كده ياابو عمر؟
(:
اليوم كان جميل والله
بس سبب الشعور اللى وصلك ده الزحمه
للاسف

فاتيما said...

والله يا وليد
انا هشارك دودو فى رأيها
بأن السبب فى احساسك دا
غالباً هوه الزحمة


مشيها الزحمة
عشان خاطرى


و بعدين انتوا على فكرة
مشيتوا بدرى
و يئستوا مننا بسرعة قوى

المرة الجاية
نكون على قدر توقعك
انت و هبة إن شاء الله
و يكون الجو الطف من كدا


المهم اننا شوفناكم
يا جدع
هيا دى برضو شوية



على فكرة
و كلمة ف سرك
و محدش واخد باله


انا بالى
مبقاش طويل
زى زمان يا وليد

و يبدو ان قلة صبرى دى
أثرت على ردود افعالى
و انا مش واخدة بالى
و لا حاجة

يمكن


تتعوض المرة القادمة

سلامى لبوبو
وعمر بيكا
الشيا بيكا حبيبى

صبرني يارب said...

هو بجد الزحمه مميته شويه

بس يمكن هبه تكون اتقفلت من حاجه عادي بتحصل

والزحمه بجد كانت مربكه

وبعدين انا بقى كنت ملاحظه انك انت الى مقفول اكتر من اول اليوم

وبعدين ايه ده طب جاملنا وقول رؤياكم بالدنيا
هههههههههههههههههههههه

هناء محمود said...

أنا محترمة صراحتك ووجهة نظرك وأكيد الزحمة من أهم الأسباب

KING TOOOT said...

عاشقة القمر
أشكرك على دعائك الثمين
نورتي مدونتي
______________________
عاشقة الرومانسية
يمكن يكون رأيك صح
على فكرة عرفت إنك كنتي موجودة لكن ماأسعدنيش الحظ بالتعرف عليكي
معلش بقى فرصة تانية
تحياتي
______________________
فاتيما
نمشيها الزحمة علشان خاطرك بس
بس النهارة كان الإجتماع محتلف بجد
وعايز أسألك سؤال خبييييييث
هو إنتي ليه ماكتبتيش عن الإجتماع بتاع المرة دي بالذاااااااااات ؟؟
هه هه ليه هه ؟؟؟
خليها في سرك بقى
وعارف إنك معايا في كل إللي أنا كتبته في البوست ده
على فكرة
حاأعدي لك منافستي في الهداية بتاعتك لبوبو إلّي في الخباسة دي
خالص مودتي و إحترامي
أنا و بيكا و أم بيكا
_______________________
صبرني يا رب
طبعا رؤياكم بالدنيا و ما فيها
بجد مش مجاملة
بس أنا بأرصد حالة من الإحباط العام و التغير السلبي للمزاج السائد
على العموم كفاية إنك و زوجك المحترم جدا كنتم موجودين علشان يكون اليوم أكثر من رائع
تحياتي لكي و خالص تحياتي لزوجك المحترم و سعدت بمقابلته جدا جدا
________________________
أم بوبة
يمكن زي ما بتقولوا ، الزحمة هي السبب
رغم إننا كنا في لقاء المنصورة تقريبا نفس العدد أو قريب من عددنا النهاردة وكان الأحساس مختلف خالص
نورتي مدونتي المتواضعة وسعيد بزيارتك
________________________
KING TOOOT

ghada mOhsen said...

اول زياره ليا فى مدونتك ...

وللاسف ماتعرفت على حضرتك امبارح وعلى اكتر الناس الحلوه ...

هو المفروض فعلا كان يكون فى برنامج معين عشان ماتتلخبط الامور
بس بجد عشان كان فى ناس كتيييير ماشاء الله ... وكان اكتر الناس جايه تتبسط وتفك خنقتها ...

بس مايمنع انه كان يوم حلو كتير
وبتمنى المره الجايه تبقى احلى واحلى اكيد .. وتبقى مراتك موجوده برضو وتنبسط ياااااااارب

سعدت بتواجدى بين كلماتك ...
وان شاء الله سوف يستمر

تحياتى ...
... ;) ,,, ;) ...

فاتيما said...

يا وليد
انت بتهرج بجد

يعنى انت متصور يا فندم
انى ممكن
اعدى على الراجل بتاع الفندام
و فى جيبى فلوس
و فاكرة كويس جدا
ان هبة بتحبه
و ابقى عارفة انى هشوفكم قريب
و معملش كدا ؟


مينفعش
قلبى لا يطاوعنى يا عزيزى
هوبى اختى الصغيرة
و لو ماجد اخويا بيحب حاجة
و شوفتها هجيبها علطول
و بعدين دا مش تعدى على اخوتصاصتك
و لا حاجة
دنتا الخير و البركة كلها
ربنا يخليكم لبعض
و يديم الود بينا
يا رب


و انا مكتبتش عن اللقاء
لأن فعلا فيه حاجات قليلة كدا
ضايقتنى فيه
و بالتالى لما اجى اكتب
كان لازم هقولها
مينفعش اكدب
و أجملها

و لانى مش ناوية اكدب
و لا اتجمل
و مش عاوزة كمان ازعل حد منى
و لا اسمع كلمة
انتى مالك ؟
لأن مش كل حد
لازم هيمشى على الخط
اللى رسماه فى مخيلتى
و لأن الحرية مكفولة للجميع
محدش بيجبر حد على شىء


وكل واحد حر فى اللى بيعمله
فانا كمان قررت مكتبش بوست
و اكون حرة
و استمتع بما اسعدنى فى اليوم
و ارمى الباقى ورا ضهرى


و ان شاء الله المرة الجاية
هيكون انطباعك جميل
و بلا شوائب
ان شاء الله

خالص ودى يا راعى الملك
و سلامى لبوبو و عمر بيكا حبيبى ى ى

قوس قزح said...

انا كمان شايفة ان السبب هو الزحمة
و سبب تانى كمان وهو ان كتير ميعرفوش بعض
و يمكن ده المختلف فى اللقاء ده
كل لقاء بيكون شخص او اتنين جداد
لكن المرة دى مجموعات مختلفة و كل مجموعة جاية علشان تشوف بعضها و تشوف الناس اللى نفسها تقابلها

بس هى فرصة عموما المدونين يشوفوا بعض حتى لو كانت النتيجة فى الاخر مجرد سلام و تحية من كل مدون للاخر

تحياتى لك و بوسة لبيكا و ام بيكا

KING TOOOT said...

ghada mOhsen
أشكرك جدا على تعليقك و على زيارتك لمدونتي المتواضعة
و إن شاء الله نتقابل في لقاءات تانية تكون أفضل من اللقاء ده
وطبعا زوجتي بوبو و إبني عمر حايكونوا موجودين كالعادة
تحياتي
________________________
فاتيما
مش معقول ، تعليقين مرة واحدة من فاتيما على نفس البوست
ده أنا محظوظ بقى
على العموم أنا حاأعدي لك موضوع الفونضام ده المرة دي
ومش بس كده
داأنا حاأسرب لك سر من أسرار بوبو الحربية كمان
وهو النبق
نياهاهاهاهاها
شوفتي كل الحاجات إلذي بوبو بتحبها في متناول الجميع إزاي
فونضام و نبق و حرنكش و كشري
زوجة موفرة جدا
ههههههههههههههههههه
خالص مودة راعي الملكة
وملكة الدنيا
وبيكا
__________________________
قوس قزح
يمكن فعلا إن ناس كتير مش عارفة بعضها كان عامل من عوامل الإرتباك للجميع و طبعا العدد الكبير
مع إني ( والكلام في سرّك ) مش مقتنع أوي إن دي هي الأسباب الرئيسية
خالص إحترامي و تقديري
__________________________
KING TOOOT

همس الاحباب said...

امممممممممم
بالرغم من عدم الحديث مع حضرتك كثيرا وبالرغم من مقابلتنا فى لقاءات سابقة
لكن متفق معك ان اللقاء كان مختلف كثيرا عما سبق
نظرا لكثرة العدد والزحام الشديد اضافة الى اسباب جانبية اعطت اللقاء طابع سلبى فى بدايته اثرت على الكثير
لكن فى نهايته كان مثمر ودار حوار شيق بين المتواجدين لان العدد اصبح محدود
وعلى اى حال فاللقاءكسابقه من الل به جوانب ايجابية واخرى سلبية
تحياتى لحضرتك

شمس النهار said...

الحقيقة انا مااتعرفتش عليك
وصلت متأخرة بعض الشئ بسبب اني كنت في المقابر صباحا مع والدتي نحي ذكري ابي

وعندما وصلت وجدت ناس كتير مااعرفهاش خالص وقفت وقلت السلام عليكم ماحدش رد او خد باله من الزحمة
قلت انا شمس النهار واسفة علي التأخير ماحدش سمع
وبعد دقيقة اللي يعرفوني ابتدوا يجوا يسلموا عليا ولما مدونين شافونا واقفين سألوا مين قالوا شمس وفي ناس لطيفة مشكورة جم سلموا عليا ووقفنا نتكلم شوية
وابتديت انا اتنقل اتعرف علي الناس بنفسي واسألهم انت او انتي مين
وفي ناس كانت موجودة من احب المدونات عندي وماشوفتهمش بسبب كده

العدد الكبير مافيش تنظيم
ليه
المفروض نقعد كلنا مع بعض في مكان واحد
وكل واحد يقدم نفسه ومدونته ويتكلم عنها
الناس هتتعرف ويصير حوار
والكلام ده مش من فراغ
عملنا قبل كدة ثلاث اجتماعات
وكنا برضة كتير وعملنا كده
واللقاء كان جميل والناس مشيت مبسوطة
بس بصراحة اللقاء في الاخر ابتدا يتظبطت شوية
وفي النهاية كان لطيف اننا اتعرفنا علي بعض

شكرا لك واسفة علي التطويل
وان شاء الله نتعرف في ظروف احسن

سلامي

KING TOOOT said...

همس الأحباب
مع الأسف أنا ماكنتش محظوظ إني أقعد لآخر اللقاء لكن معلش خيرها في غيرها
سعيد جدا بتعليقك و مرورك على مدونتي
خالص تحياتي
______________________
شمس النهار
الحقيقة ناس كتير قالوا في تعليقاتهم إن اللقاء في الآخر كان جميل
معلش المرة الجاية نستنى للآخر و مانتسرعش
وإن شاء الله أتعرف عليكي في لقاءات قادمة بإذن الله
خالص مودتي وتقديري
______________________
KING TOOOT

عاشــــــ النقاب ـقــــة"نونو" said...

السلام عليكم
يارب دوما في الخير متجمعين
هحرص المرة الجاية اتواجد
اذا كنت حسيت باختفاء تميز للقاء هقولك ابحث عن الجزء المليان من الكوب
تحياتي

KING TOOOT said...

عاشقة النقاب
أوعدك إني أبحث عن نصف الكوب المليان
وأشكرك جدا على زيارتك لمدونتي
خالص تحياتي
__________________
KING TOOOT