Pages

القلب ذهب .. و الفعل خسيس

في بلدنا يا ناس

الناس بتغيظ

جوّاها ملاك

و كمان إبليس

وساعات بنكون

كلنا تلاميذ

وساعات ماعاناش

حتى الكراريس

وساعات أغنيا

فشر الأوناسيس

وساعات ضاربين

كلنا تفاليس

وساعات قافلين

جيبنا بدبابيس

وساعات فاتحين

ع البحري الكيس

وساعات ماشيين

وساعات واقفين

وساعات راكبين

علبة سردين

و بنكذب

ونسميها أتوبيس

وساعات راكبين

عتبه ورمسيس

وساعات عربية

موديل حديث

في بلدنا الشيخ

جنب القسيس

و أذان و جرس

وصلاة و قداديس

ومحمد ساكن

جنب موريس

و البت سنية

مصاحبة إيزيس

وعيال على سيرة

العيد بتهييص

و عيال شغّالة

على البلاديس

وبيوت من طين

و بيوت واقعين

وبيوت ولا تلقى

أختها في باريس

عندنا ستات

لابسين متاريس

جنبها ستات

ماشيين بلابيص

وبنات حاتموت

على ظفر عريس

وبنات غاويين

شغل الكواليس

في بلدنا كمان

وزارات و بوليس

ووسايط تنفع

في التكويس

وقروض و فساد

و ذقون و جهاد

أناجيل و مصاحف

للتسييس

في بلدنا يا ناس

الناس بتغيظ

القلب ذهب

و الفعل خسيس

9 comments:

حلم بيعافر said...

اناجيل ومصاحف للتسييس
حكاية الاتجار بالدين دى تاعبانى اوى
تقبل مرورى

Cute Kitty **sookra said...

ههههههههههه
كلامك حلو بس لاذع اوى
تحياتى

Anonymous said...

مظبوط ياكنج تووت
كله غلط

بس أكيد أنته ملاحظ إن المقال مش مقالي
أنا بس عجبني السياق فنقلته

يسعدني مرورك في مدونتي

أتمنالك التوفيق دائما

KING TOOOT said...

حلم بيعافر
صدقني و تعباني أنا كماااان أوي
تقبل تحياتي
___________________
sookra
ماهي دايما الحقيقة مؤلمة
تحياتي
___________________
blackshwak
أسعدني تعليقك
بجد مدونتك شكلها مميز جدا
بالتوفيق
___________________
KING TOOOT

صبرني يارب said...

حلوه حلوه حلوه

بجد تحفه
فضلت اعد الحاجات الى هاقولك عجباني لقيتهم كتير بقى


دايما جوايا صرخه بتقول ايييييييييه التناقض ده يا ناس


جميله اوي بجد تسلم اديك

شكرا على الزياره يا فندم

Unknown said...

كلامك دا ياكنج؟
دا ولا جاهين فى زمانه
كلام جميل بصحيح لازم يتنشر
على مدى اوسع من المدونة.

Unknown said...

هو ياترى ممكن أنشرها
فى المدونة التانية
بتاعتى وأكتب اللنك
بتاع حضرتك؟
لو موافق
ابلغنى
وشكراً

KING TOOOT said...

صبرني يا رب
التناقض ده بالذات هو إللي أنا أقصده بالظبط
أشكرك على تعليقك المشجع جدا جدا
زيارتك أسعدتني بجد
________________________
norahaty
يافندم طبعا ده شيء يسعدني جدا
وبعدين أيه موضوع جاهين ده
جاااهين مره واحدة ؟؟!! هو إحنا نطول نبقى ربعه حتى
شكرا على المجاملة الكبيرة جدا جدا جدا
تحياتي
________________________
KING TOOOT

موقع نادى الزمالك تيم said...

مدونتك ممتاه ورائعه يا مان