Pages

عمر . . عمري


خد بإيدي يا أبني وعدي كل سور

و إفتح الجناحات وطير ويّا الصقور

و إبقى ليّا دراع يمين بدل يميني

لو في يوم دراعاتي كلّت ع الجدور

-----

وإبقى ليا عيون قوية غير عيوني

وإبقى صاحبي ماأنت لونك نفس لوني

وإبقى جنبي وبعد ربك كون في عوني

قوم بدوري لو حاسيب في الدنيا دور

-----

إبقى بهجة وفرحة بتنوّر حياتي

وإبن صالح يدعي ليّا يوم ماماتي

ولجل قلبي عليك يكون مبسوط وراضي

أوعى بَعدي في يوم على أمك تجور

-----

ياحبيبي خد من الدنيا الحلال

دا الحرام أحماله أثقل م الجبال

و الطريق الصح راحة لكل بال

مهما كان مليان ديابة أو نسور

-----

حقق الأحلام بعلمك و إجتهادك

و إعرف إن مافيش مخلوق حايعيش حياتك

و إن ربك حطّ لك قدرات في ذاتك

وإبقى طول الوقت لنعمه عليك شكور

-----

و إعرف إن الدنيا حلوة بس حاسب

أوعى يوم تتغر نفسك بالمكاسب

و أوعى تبقى في يوم لعين الحق غاصب

مهما رزقك كان بسيط خلّيك صَبُور

-----

و إن في يوم إخترت قلب رقيق يضمّك

خد نصيحتي وهاتها طبق الأصل أمك

خللي دينها هو أول شيء يهمك

ياأبني طرح الفرع اصله من الجذور

-----

شد ظهري بخلفتك زيّن لي إسمي

و إرسم الأحلام عيال من نفس رسمي

و إهدي للأحفاد يا واد من أصل جسمي

نطفتك علشان نزوّد في الطابور

-----

كون حليم بزيادة لجل تزيد كرامة

كون حكيم حاتنجّي قلبك م الندامة

و إعرف إن السر كله في الإستقامة

زي ما سر السنابل في البذور

3 comments:

ياسمين حميد said...

ربنا يخليه لك
ويجعله ولد صالح يسر قلبك

بوبو said...

الله عليك

KING TOOOT said...

ياسمين حميد
آمين
أشكرك جدا على مرورك
فينك من زمان ما زرتيش مدونتي الغلبانة دي
تحياتي و إحترامي
______________________
BoBo
الله عليكي إنتي ، و عليه هو كمان ، الواد العفريت الصغير بتاعنا ده
______________________
KING TOOOT