Pages

فرحة تحرس باب عيوني

لما أغمض عيني صدفة

ألقى صورتك تستخبى

بين جفوني

أفتح الجفنين شوية

ألقى فرحة واقفة تحرس

باب عيوني

و أما بأنطق مرة إسمك

روحي تسبق نور حروفه

ع الشفايف

و ألقى قلبي نبضه يجري

رغم أنه مالوش عيون

بس شايف

يا حبيبتي أنا ظل سارق

كل نور الدنيا ليكي

يا حبيبتي أنا بحر غارق

موجي سابني وراح عليكي

يا حبيبتي أنا نيل و طمي

لما تبقي نخيل وورد

يا حبيبتي أنا نور و ضي

لما تبقي ليل و برد

يا حبيبتي أنا ملك إيدك

بالمشاعر

و إنتي شعري لو في يوم

بقى إسمي شاعر

9 comments:

Anonymous said...

بجد.. يا بخت مراتك بحبك ليها..ااااااااااه.. مبقاش فيه رجالة تحب زوجاتها كدة.. هو انت ملكش اخ عاوز يتجوز؟
تحياتي بجد وتسلم ايديك

اميرة الأحلام أماني said...

حبيبي كينج كل يوم بحس بكلامك اكتر وكلامك يقربك اكتر من الاول كنت شايفاك حاجه غير اللي جواك فإلى الامام يا روميل واظهر مواهبك الدفينه وربنا يخليلك بوبو وعموره حبيب قلبي

dodda said...

ايه يا كنج توت اللى مكتوب فى التعليقات ده

البنات قاعده تحب على نفسها
ربنا يخليكوا لبعض انتز التلاته

طولت الغيبه اوى

لا جديد ولا زيارات لعله خير

ربنا يكرمك ويعينك

قلب ينبض بالحب said...

وليد يارب تكون بخير دلوقتي حاولت اكلمك واكلم هبة الا اني التلفونات بتتدي جرس وبس اتمنى من الله ن تكونوا بكل خير

جريدة مصر الجديدة said...

إزيك يا مولانا أحييك على الكلام الجامد

el7osiny3 said...

مجهود رائع

http://www.tay4tech.com
http://www.mezatech.com
http://www.e-comegypt.com
http://www.arabinter.com
http://www.arabinter.net

shady said...

باق إن شاء الله

اقدم عاصمه فى الحب said...

كلامى يا سيدى لا يفى بغرض التحيه امامه الابداع والكلام الصادق فقط اكتفى بالوقوف اماه والتصفيق
.. دمت ودام قلمك منيرا وساحرا فى سماء هذا الصرح العظيم


انا مررت من هنا:)

KING TOOOT said...

Anonymous
ههههههههههههههههههههه
بجد يا بختي أنا بيها
معلش بقى أخويا أتجوز خلاص
تحياتي
__________________
أميرة الأحلام أماني
ياريت ماحدش يفهم كلمة حبيبي دي غلط يا جماعة
دي أخت مراتي والله
هههههههههههههه
يا موني هو أنا إللي عندي مواهب دفينه لوحدي ، ما أنتي كمان طلع لك مواهب دفينه جامدة جدا في مدونتك
سلامي لأمير الأحلام ، الفارس الأسمر
__________________
dodda
الغيبة طالت فعلا بس مش بإيدي
كنت خارج البلاد لفترة مش قصيرة و كنت مشغول جدا
إن شاء الله مافيش غيبة تاني
__________________
قلب ينبض بالحب
معلش كنا مش في مصر و ظروف شغلي كانت ملغبطة شوية
__________________
جريدة مصر الجديدة
أسعدني مرورك و تعليقك
__________________
el7osiny3
تحياتي و ألف شكر
__________________
shady
أخيرا ظهرت يا نيله
إنت فين يا واد من 200 سنة
_________________
أقدم عاصمة في الحب
أشكرك على تعليقك الرقيق و تشجيعك و ثنائك على كتاباتي المتواضعة
أتمنى دائما أن أكون عند حسن ظنك
تحياتي
___________________
bedo
أشكرك على زيارتك
نورتني
___________________
KING TOOOT