Pages

و رجعت شوفت

ثلاث سنين

من يوم ما شوفتك و إتخطفت

من يومها ( خفّيت ) م العما

و رجعت شوفت

قلبي إللي كان عايش مريض

كان في الحياة مسكين شريد

كان مستخبّي من الفشل

ورا عقل مليان بالجدل

ولسان سليط

مجروح و تاهت دمعته

و كأن جفن العين حديد

و القلب صوف

محشور في صدري وسط جوف

من غير عروق

من غير وريد

حبك بيغزل من خشانة الصوف حرير

و حديد عيوني خلاص مابقاش من حديد

و بدأت أشوف في عنيا شوق

و بدأت أحس في قلبي خوف

و كأني مولود من جديد

من يومها في إيديا الدفا

يحكي لأيدك ألف قصة عن الجليد

إللي كان

بس دلوقت إختفى

3 comments:

فاتيما said...

أبدعت يا راعى الملك
و الحب يخلى الكلام يحلو كدا
و اكتر
الله اكبر
و ربنا يخليكم لبعض
و تفضل نور عينك و مدفية قلبك
يا وليد
يا بختك بيها
و يا بختها بيك
و الله اكبر بقى من عيونى

KING TOOOT said...

فاتيما
و الله وحشتني تعليقاتك جدا
و إنشاء الله ربنا يسمع دعواتك لينا و يستجيب لك
و بخصوص موضوع العيون ده ، فماتقلقيش ، إحنا عارفين إن عينك باردة مابتحسدش
تحياتي و إحترامي
KING TOOOT

dodda said...

اللهم لا حسد

ربنا يبارك فيكو يخليكوا لبعض