Pages

أبريق الشاي

حد فاكر أغنية أبريق الشاي ؟؟

أنا أنا أنا أبريق الشاي

إيدي كده

بوزي كده

أصب الشاي

و أرجع كده

و أعرف بردو يا كتاكيت أحكي حواديت

أغنية أتربى عليها كل جيلي ، هي و أغاني أطفال كتير كانت بتيجي في التليفزيون ، أيامها كان التليفزيون قناتين بس ، الأولى و الثانية ، و كانت برامج الأطفال قليلة ، و لكن رغم إن الأمكانيات ايامها كانت قليلة جدا بالنسبة لإمكانيات الفضائيات الحالية ، إلا أني شخصيا بأعتقد إنها كانت أفضل من حيث التربية ، لأنها كانت بتزرع البراءة في نفوسنا كأطفال ، البراءة دي أنا حاسس إنها إختفت من الأطفال حاليا ، و حتى أغاني الأطفال ، أعتقد أنها اصبحت قليلة جدا و معانيها رديئة ، على أي حال ، أنا لما بأسمع الأغنية دي أو اي أغنية تانية من أغاني الأطفال بتاعت زمان إللي أتربينا عليها بأحس أن الزمن ده كان بعيييييييييد جدا ، و كأن عمري ميت سنة

ياريت كلنا نسمع الأغنية دي و نفتكر أيام الطفولة الجميلة


style="text-align: center;" align="center">

مافيش غيرك مدينتي

من بين كل القلوب

أنا قلبي إختارك إنتي

و من كل المدن

مافيش غيرك مدينتي

إنتي الهوا و الشمس

و النسمة و الأشجار

إنتي إللي جاي و الأمس

و الحب و الأزهار

إنتي الدفا و البيت

و غطايا لو بردان

و الحق لو ضليت

و الضي و الألوان

و الضحكة في الأفراح

و الدمعة في الأحزان

و الحضن لو مرتاح

و الحضن لو تعبان

إنتي الحياة و الكون

ومشاعري ليكي إنتي

مافيش في الدنيا غيرك

في قلبي يا حبيبتي

و عجبي ،، أول مرة

من بين كتير أوجاع .. قلبي أتولد

من غير زواد و متاع .. ظهري أنفرد

زي الجمل و الخيل أنا شيلت شيل

لا يوم نخّيت ولا .. سيبت البلد

و عجبي

________________________________________

مشيت يوم المطر غرقان و مرصرص

و البرد في عظامي بياكل و بيمصمص

لقيت ولد فرحان وسط المطر يجري

حافي و مش بردان ، عريان و معصعص

و عجبي

________________________________________

عمارة مليون دور صاحبها م التجار

قدّامها بيه بيركب عربية ست أمتار

معدي واد عربجي على كاررو ، يتخانقوا

البيه يقول " سيترو" و الواد يقول يا حمار

و عجبي

________________________________________