Pages

مش كفاية


مش كفاية

عنيا بس لوحدها إللي تشوف عنيكي

مش كفاية

إيديا تنبض في الشتا و تحضن إيديكي

مش كفاية ألف كلمة

حب أقولها مش كفاية

مش كفاية لساني يحكي

عننا مليون حكاية

مش كفاية

عيني تسهر و إنتي عينك جنبي نايمة

مش كفاية

روحي فيكي تبقى طايرة ،، تبقى هايمة

مش كفاية نكون حقيقة

واحدة من ضمن الحقايق

مش كفاية عمري كله

مهما كان فيه من دقايق

مش كفاية

ياحبيبتي قلبي يبقى مِلك قلبك

مش كفاية

إني عايش كل لحظة في عمري جنبك

مش كفاية الدنيا مهما

غالية كانت أو بعيدة

يا حبيبتي أهم حاجة

تبقى فرحانة و سعيدة


8 comments:

... said...

كل يوم وأنتم طيبين وفي صحة وسعادة دايمة ان شاء الله
باحس هنا ان الحياة حلوة
ربنا يسعدكم

المـــفـــــــقــــــــوعـــــة مــرارتـهــا said...

انا باحب ازور مدونتك جدا لاني باشوف فيها وليد العاشق
بصراحة الانسانة اللي انت بتحبها كلنا بنحبها معاك
ربنا يخليكم لبعض
هاتوحشونا جدا جدا جدا
سلامي لهبة اللي مش عارفة اوصل لها لأنها بجد من الشخصيات الجميلة اللي نفسي تفضل من صديقاتي علي طوووووووووووول

رئـــــيسـة حزب الأحلام said...

بجد كلمات تحفة لانسانة اكثر من رائعة
وادام الله عليكم الحب
فالحب اعظم شئ ان اخلصنا فيه
تحياتى لك ولبوبو

KING TOOOT said...

بثينة
و أنتي بالصحة و السعادة دايما إن شاء الله
نورتيني يا بثينة
_________________
المفقوعة مرارتها
صدقيني أسعدتني زيارتك جدا جدا
و الحقيقة هي تستاهل حب كل الناس فعلا لأنها بجد بتحب كل الناس و ماتعرفش تكره حد
صدقيني أنتوا حاتوحشونا كمان قوي ، و كل زملاء المجلة
نشوف وشكم بألف خير يا رب
و تحياتي وسلامي لزوجك العزيز
__________________
رئيسة حزب الأحلام
أشكرك جدا جدا
تحياتي و إحترامي
___________________
KING TOOOT

عالم صوفي said...

الله عليك لسه حد ممكن يقول لحبيبته كده؟

حاجــ عيال ــات said...

السلام عليكم
بسم الله مشاء الله ربنا يخليكم لبعض
وعلى فكرة القصيدة هايلة والوزن مضبوط جدا والكلمات والتناول والحالة كله جميل

وكل سنة وانتم طيبين ياقمرين

جهاد مشالي

dodda said...

ازيك؟؟
واضح انك مشغووووول اوى من زمان مش يتكتب!!!

KING TOOOT said...

عالم صوفي
لما تكون حبيبته زي حبيبتي ممكن يقول لها أكثر من كده
بكتيييييييييييير
تحياتي
_______________________
حاجات عيال
أشكرك جدا جدا بجد
و حقيقي مدونتك ممتازة و عجبتني جدا
فكرتها جديدة و مميزة
نورتيني
_______________________
dodda
مش حاتصدقي مشغول أد أيه بس كتبت حاجة جديدة
أول بوست من خارج مصر
و آسف على التأخير
تحياتي و إحترامي
_______________________
KING TOOOT