Pages

أنا و إنتي

أنا المولود في حضن عنيكي من بدري

أنا المفطوم في مهد هواكي من صغري

أنا العاشق ، أنا المشتاق

أنا بأفطر حنين ليكي

و بأتعشى هوى و أشواق

أنا طيرك و غيري طيور ما بتطرش

أنا حصانك و غيري خيول ما بتشوفش

وليد الحب من شمسك

بتشرق بالحنان ليـّـا

وصوتي بأجيبه من همسك

و عينك نورها في عنيا

أنا الولهان بأكون نفسك

باكون يومك

و أكون أمسك

أنا المحبوب في صدري الشوق مايخلصش

و عيني في وقت ماتشوفك ما ترمشّ

أنا جناحك في يوم تصحي

و تتمني تطيري لفوق

و لو فكرتي تشتاقي

أقوم و أجري و أجيب الشوق

أنا شاعر بإلهامك

أنا الحالم بأحلامك

لساني في حُبه قدّامك

مايسكتش

8 comments:

بوبو said...

مينفعش مكونش انا اول تعليق .. بجد كنت هزعل لو حد لحق يعلق قبلي.. مش قادرة اصدق ان ربنا بيحبني لدرجة انه يبعتلي زوج جميل يحبني كدة.. ربنا يخليك ليا يا حبيبي وميحرمنيش منك ابدا.. بجد كل الكلام بيقف عاجز مش عارف يعبر عن حبي ليك.. يا ريتني كنت بعرف اكتب شعر حلو كدة زيك.. بحبك

فاتيما said...

وليد الحب من شمسك
بتشرق بالحنان ليـّـا
وصوتي بأجيبه من همسك
و عينك نورها في عنيا
أنا الولهان بأكون نفسك
باكون يومك و أكون أمسك
----------------
دى اكتر حتة عجبتنى
يا عيال لموا الدور بقى لحسن تتحسدوا
الله اكبر عليكو
يا وليد يسلم لسانك
و على فكرة القصيدة دى ممكن تتفهم على مستويين
الحبيبة
و الوطن
إنت مش مستنى رأيى
يا راعى الملك
عشان اكيد إنت عارفه من غير ما أقول
الله يفتح عليك كمان و كمان
و ربنا يسعدكم يا هبة
و تخاوى عمر بسبعة تمانية كمان
زى ما بتتمنى
تحياتى ليكى و لزوجك العزيز

انين الحزن said...

جميله جدا جدأ

عايزة اقول حاجه نفسي اقولها من زمااااااان

بس مكنش بيحصل نصيب

بيعجبني اوي تعليقتك في المدونات

اصل انا بحب صلاح جاهين اوي

فبجد انت جميل اوي بجد

فابس


وزة

dodda said...

ربنا يكرمك يا وليد ويبارك لك فى كل ما تملك

الحب اللى دايما بيسكن كلماتك بجد بيسعدنى جدا
وخاصة ان صاحبته تستاهله
واكتر حاجه بتفرحنى انها مراتك مش اى حب يعنى
ربنا يديمم عليكو نعمته ويبارك فى ذريتكوا

KING TOOOT said...

bobo
يا أغلى الناس
بجد أنا إللي محظوظ جدا لأن ربنا رزقني بأجمل و أرق , و أجدع زوجة في الدنيا
ربنا يبارك لي في عمرك و حياتك يا رب
و يخليكي ليا أنا و عمر
بحبك
______________________
فاتيما
ماتخافيش أحنا حاطين في المدونات بتاعتنا خمسة و خميسة و خرزة زرقا و حدوة حصان نحاس
صحيح القصيدة ممكن تتفهم على مستويين بس ده لأني بجد بأحس إن بوبو ليا مش زوجة و بس ، لا ، هي كمان وطن
ويسمع منك ربنا و يرزقنا بسبعتاشر ثمانتاشر أخ لعمر
تحياتي
_______________________
أنين الحزن
مش عارف أشكرك إزاي على تعليقك الجميل ده
وحاولت أدخل عندك بس مدونتك محجوبه إلا لناس محددين بس
تحياتي
_______________________
dodda
ما هي طالما هي حبيبتي يبقى كان لازم تبقى مراتي
بصراحة في رأي أي حب بين راجل و ست خارج نطاق الشكل المحترم للزواج يبقى شيء مش مظبوط و أكيد مش ممكن يستمر
إنما بقى دعاوى الحداثة و إن المشاعر مالهاش دعوة بالزواج ، و إن الحب كقيمة أهم من كل البتنجان و الكلام المسقعة ده ، أنا مش بأقتنع بيه خالص
تحياتي
و ربنا يسمع دعائك لينا يارب
___________________________
KING TOOOT

مدحت محمد said...

كلمات كلها رقة ورومانسية
انا خايف عليكم تتحسدو والله

هههههههههه

ربنا ميحرمكوش من بعض ابدا يارب

ياسمين حميد said...

هل فكرت أن تدع أحداً يلحن لك قصائدك؟
عندما أقرأها أجد نفسي أغنيها لا شعورياً. أعتقد أن تلحينها من ملحن جيد سيكون رائعاً
!

KING TOOOT said...

مدحت محمد
زميلي و صديقي العزيز
ماتخافش علينا من موضوع الحسد ده
إحنا مشغلين البخور على طول عشان العكوسات
ههههههههههههه
نورتني بجد
______________________
ياسمين حميد
و الله أنا ماعنديش مانع
بس مين حايغنيها
المهم ماتكونش روبي ولا هيفاء ولا دوللي شاهين
أشكرك على التشجيع الدائم
تحياتي
______________________
KING TOOOT