Pages

يعني إيه ؟؟


يعني إيه مثقف من بتوع اليومين دول ؟؟

تبقى شاب بتكتب أي حاجة ، و عندك مدونة ، و بتقعد ع التكعيبة ، و بتروح الساقية تشوف عروض مش فاهم فيها حاجة ، و بتسمع فريق وسط البلد رغم إن صوتهم مش ولابد ، و تمثل طول الوقت إنك متيّم بوجيه عزيز مع إنك بترتاح لعمرو دياب و تامر حسني و حمائي أكتر ، و على الكمبيوتر بتاعك أغاني زياد رحباني و فيروز مع إنك مش فاهم بيقولوا إيه ، و تكون قليل الأدب حبتين لزوم حرية الفكر ، وبتشرب سجاير ( و ممكن تشرب حاجات تانية لزوم الثقافة ) ، و ماحدش طايقك في بيتكم .

يعني إيه فيلم كوميدي من بتوع اليومين دول ؟؟

هو بتاع بيقعد ع الشاشة ساعة و نص ، مافيش فيه اي قصة ، البطل أهبل و عبيط ، و البطلة موزّة زي القمر و بتحب البطل من غير مناسبة مع أن فيه أحسن منه كتير ، و في أحداث الفيلم لازم البطل يلبس ست ، و ينضرب علقة جامدة و يتخرشم ، و كام موقف مؤثر ، على أغنية أو أغنيتين ، و طبعا ماننساش ، لازم يكون فيه حسن حسني .

يعني إيه تبقى واد من بتوع شارم الشيخ ؟؟

تنسى عيشة أهلك ، و تلبس تي شيرت كَت و شورت كاجوال ، و تطول شعرك ديل حصان ، و تشيل شنطة على كتفك علشان تبقى شبه الأجانب بالظبط ، الأنسيال العاج إللي بثلاث تعريفة بقى في أيدك ، و اللبانه في بقك ، و الخاتم أبو جمجمة منور في صباعك ، و مافيش مانع من حلق في ودانك لو حضرتك بايع القضية خالص يعني ، و تصاحب أجانب ( ستات بس طبعا ) ، وأنت بتتكلم لازم يكون في وسط كلامك شتايم كتير بلغات العالم المختلفة ، و تقعد في الشمس لغاية ما راسك تتقور و جلدك يتحرق ، كده تبقى أخذت الختم بتاع شارم .

يعني إيه تبقى متدين الأيام دي ؟؟

تربي ذقنك و تحلق شنبك و تلبس قميص و تخرجة من بره البنطلون و تلبس في رجلك شبشب ، و تستخدم ألفاظ دينية بقى زي " بأحبك في الله " و يا جماعة الخير " و " أخوكم في الله " و الكلام ده ، و طبعا السواك في جيبك على طول و معاه المصحف ، علشان لما تقعد في اي مكان كل الناس تشوفك و إنت بتقرأ فيه ، و لما تيجي تصلي لازم تسأل أي حد عن مكان القبلة بصوت عالي علشان الكل يعرف إنك بتصلي ، و ماتنساش تحك راسك جامد في الأرض علشان تطلع لك زبيبة صلاة بسرعة .

يعني إيه تبقي محجبة ع الموضة ؟؟

أول حاجة تلبسي بادي محزق جدا جدا جدا و لونه فاتح علشان يبقى كأنك مش لابسة حاجة ، و بعدين فوقيه بلوزة أصلا عريانه بس أنتي ناصحة بقى ولابسة تحتيها البادي إياه ، و بنطلون جينز لابساه بالصابونة من كتر ما هو ديـّق ، و عليه حزام لونة فاقع و توكته كبيرة لزوم لفت الأنظار التام ، و في رجليكي جزمة بكعب عالي و فوقيها سلسة زي الخلخال بتاع زمان ، و على راسك حتة قماش و مافيش مانع تقولي عليها طرحة ، و تلفيها إسبانيش علشان حلقك و سلسلتك يبانوا ، و طبعا ماتنسيش على وشك كيلو بودرة و مكياج .

13 comments:

Anonymous said...

والله عندك حق-زي ما تكون هوجة وانتشرت في البلد ، بالذات.. والله مش حاجة واحدة بس هو كل اللي قلت عليه منتشر فعلا
تسلم ايدك بجد انت مبدع
تحياتى

فاتيما said...

أهو كدا يا وليد
أنا بحب البوستات اللى بتعرفنا فيها حاجات عنك و أراء ليك
طبعاً أنا معاك فى كل اللى كتبته دا
لأنى واحدة من الناس دى
و بصفتى منهم بقى
أحب أقول لسيادتك إنه دا مش أكليشيه متبع و لا حاجة عشان الواح د يتحسب على فئة المثقف أو المتدين أو المحجبة
لا
دا زى أى حاجة الإنسان بيعملها
الأول بيتلخبط و يمشى واحدة واحدة و يبص حواليه يشوف اللى قبله عاملين إزاى
و بعدين يبتدى يحذف حاجات و يتمسك بحاجات
و فى الآخر بيستقر على ملامح لشخصيته الخاصة
يمكن إنت بتقابل الناس دى فى مرحلة عدم الإستقرار و البدايات
فدا بيبقى حكمك عليهم
إنت صح فى نظرتك
و هما كمان صح فى خطواتهم
أظن ذلك يا راعى الملك
و لا تنس إن شهادتى مجروحة و واخدة دلوقتى وضع دفاعى بحت
تحياتى يا أبو عمر
و عاوزين بوستات من دى كتير

Ahmed Shokeir said...

Post of the day
:)

أحمد سلامــة said...

بص يا عمنا
مبدئيا بعيدا عن النقد القادم ،البوست مسلي وممتع جدا
وكمان يا ريته كان اطول لاني حسيتة قصير جدا ومشبعتش منه
نيجي بقى للجزء اللي ماقنعنيش
انت دلوقت اتكلمت عن المثقف المصطنع وبينت ملامحه كويس جدا وده سليم واتفق معاك فيه
وضربت مثل للحالة البائسة للمفهوم الكوميدي في السينما باثتثناء ان حسن حسني بيبقى في التراجيدي بردو
موضوع شارم اشطة عليك جدا وربما كنت تعمل لينك لفيلم سنة اولى نصب كنوع من الايضاح
المحجبة اللي عالموضة ده موضوع شاركتك فيه الراي الى حد ما ومرة قلت :

خلينا في المزة ام تحجيبة
وجيبة
وبلوزة سمنى محزقة
مش ده اللي عاوزينه الكلاب
نفضل كده في وسط البلد
نخنق في انفاسنا العتيقة الضيقة

مضوضع التدين بقى ؟؟ انت عرضت اللي ضايقك او خنقك في كل لون ، بس ايه اللي ممكن يكون ضايقك او تعارض مع ممارسة يومك كيوم طبيعي معاه ، يعني انت مذكرتش انه بينعتك بالفسق والفجور مع ان ده ممكن يكون بيحصل ، ماشرتش لأنه بيبص للناس احيان بنظر دونية ، ملمستش فيه ان كان بيعترض على حرية ممارستك لرأيك او لاء
انما لو كان هو ده المتدين من بتوع اليومين دول فقط ، كما انت ذكرت ، فده مش شايف انه ممكن يكون بيعوق الحياة او بيأثر علي بشكل سلبي اطلاقا ، وهو واقع مش مجرد راي ، هو زميل لي في الكلية أحينا نتشارك المذكرات أو حضور الكورسات - مفيش محاضرات طبعا دي الموضة حتى مع المتدين - ، ممكن يكون جاري بيسلم عليا عالسلم ويسألنى عن احوالي في رفق ، احيانا بيكون بائع في سوبر ماركت او عامل في سنترال ، واحيان اخرى دكتور جامعي ، على هذا الوصف فقط ، فهو لا يضرني اطلاقا واهلا وسهلا به في مجتمعى طوال اليوم
اسف للإطاله وتاني هقولك بوست جميل احيك عليه
وبردو تاج وعجبي
والكبير مش مستكنيش
ان تشاعر جميل ، سلامي لك

Khalid said...

صوت تاييد لتعليق احمد سلامة

الوصف اللي وصفته حضرتك للمتدين اليومين دول، هو صفة و هيئة سنة النبي عليه الصلاة و السلام، او على الاقل
غير متعارضة مع الدين ابدا بل محببة و بعضها واجب
الحتة الوحيدة الكوميدية و مكروهةالحتة اللي حضرتك ضفتها انه بيعلي صوته عشان الناس تسمع انه حيصلي
لا يعني دي الحتة المنتقدة الوحيدة
مع ان باقي البوست بديع و حبيته، انا اول مرة ادخل عندك
بس شايف ان ادراج حضرتك للمتدين بهذا الوصف (اللي هو وصف جيد عدا الحتة اللي ذكرتها) يعني يحزنني و يصب في النظرة الخاطئة و ترسيخ الستيريو تايب ضد الناس اللي يحبوا يكون مظهرهم مطابق للصالحين و لسنة النبي عليه الصلاة و السلام
و حقيقي مش نائصين يا راجل همه المتدينين نائصين طعن و همز و لمز؟ كون محضر خير ربنا يكرمك و عشان محدش ينط يئول هم ظاهرهم كويس و بس انا حئولك احسن الظن بالناس و حئولك بقول سيدنا عمر علينا بالظاهر و على اللع السرائر او ما قال و حئوللك كمان ان اللي باطنه كويس و ظاهره مش كويس مقصر و اللي ظاهره كويس و باطنه مش كويس مقصر و الجميل ان يجتمع الصلاح في الباطن و الظاهر
اسمع معي كده قول النبي عليه الصلاة و السلام: الا ان في القلب مضغة اذا صلحت صلح الجسد كله... الا و هي القلب. او كما قال، و لاحظ انه قال صلح الجسد كله، ك ل ه، باطن و ظاهر
فيعني انا اسف على المداخلة الطويلة و ارجو تتقبل تعليقي بس يكون جميل لو اني و حضرتك و الناس نعمل على تحبيب مظهر السنة للناس بدل ما نكرّهم فيه بالزايد بالستيريوتايبس دي و جزاك الله كل خير يا اخي ( و فيها ايه يا اخي باه؟ يعني احسن منها "يا مان"؟:) ) ه

توقيع: معلق غير مصري

Foxology said...

بوست اشد من طلقات الرصاص

تعريفات قمة فى الواقعية والمصداقية

تحياتى ودعائى بانتهاء ازمة الضمير اللى بنعيشها كلنا واللى بتدينا مظهر الأزدواجية والتناقض فى جميع تصرفاتنا

Khalid said...

الله*

محمد حمدي said...

بجد بوست اكتر من رائع واستمتعت بيه جدا

تحياتى لك .. استمر

Dr. Tantawy said...

بصراحه بوست معلم :) يمكن فى حاجات كتير تقليدية و معروفة :) بس مضحكش عليك لما قريت الجزء الاول منه شدني جدا انى اكمله و طلع زي ما توقعت هو احلى جزء فيه .. تعريف الشاب المثقف .. لأنك بصراحه جايبه م الاخر وبالنص ههههههه

ناس كتير كانت بتزعل مني لما اقول التعريف ده وكان بيقولو عليه رجعى و متخلف و بتاع مصاطب ههههه لكن الحمدلله اخيرا لقيت حد متنبى نفس وجهة النظر .. بس يا خوفى لتكون بتعمل كده انت كمان :))))

تحياتي و بجد بوست جميل



أخوك فى الله .. د. طنطاوي
ههههههه

KING TOOOT said...

anonymous
ألف شكر على تعليقك المشجع جدا
تحياتي
___________________
فاتيما
أولا أنا مبسوط جدا لأن زياراتك لمدونتي اصبحت دائمة و مستمرة
منوراني بجد
شوفي بقى يا ستي
انا مش حااعرف اعمل زيك و أمسك العصاية من النص و اقول انا صح و هما كمان صح ، لأني مش شايفهم صح خالص
الموضوع هو المظهرية في كل حاجة و هي الشيء الطاغي دلوقت على حياتنا
يعني بقى مش مهم اكون مثقف بجد او متدين بجد او اعمل فيلم بجد او البنت تبقى محجبة بجد او حتى اكون مؤمن بالفكر الغربي بجد
المهم حاليا هو ان يكون شكلي كده
الناس ماعادتش حقيقة يا فاتيما و انا رأي ان دي مشكلة جامدة جدا جدا
تحياتي يا ام يوسف
وسلام كبيييير قوي ليوسف
_______________________
أحمد شقير
أشكرك و أنا بأعتبر ده شرف كبير ليا
خالص إحترامي
_______________________
أحمد سلامة
أشكرك جدا على تعليقك الجميل
و كويس انك متفق معايا في اغلب إللي انا كتبته في البوست
و بخصوص موضوع المتدين فأنا ماقصدتش التريقة او رفض المظهر ده
انا مؤمن إن كل انسان من حقه يلبس اللي هو عايزة لكن إختلافي و هو الشيء إللي أنا حاولت أبرزه في البوست هو المتدين المدعي إللي بيقرأ القرآن علشان يبان قدام الناس إنه متدين و إللي بيزعق و هو بيسأل عن القبلة علشان الناس تاخد بالهم إنه بيصلي و إللي بيحك راسه في الأرض علشان تطلع له زبيبة صلاة بسرعة
هو ده المتدين إللي أنا بأعترض عليه
المتدين غللي بيهتم بالمظهر فقط مش بالجوهر ، لكن المتدين الحقيقي أنا بأحترمه و أقدره بغض النظر عن ملابسة سواء كانت جلابية أو قميص و بنطلون أو أي حاجة هو يختارها
أرجو أني أكون وضحت وجهة نظري
تحياتي و إحترامي
_________________________
khalid jarrar
ألف شكر على تعليقك ، و الحقيقة أنا بوافقك في ان سنة النبي صلى الله عليه وسلم هي امر محبب اتباعة جدا و لكني كنت اقصد ان الأهتمام بالمظهر فقط و انا شايف ان اغلب الناس حاليا بيهتموا بالمظهر بس مش بجوهر الدين
تحياتي
___________________________
foxology
و الله انا معاك ، و ياريت ازمة الضمير دي تنتهى بقى
نورتني
____________________________
khalid jarrar
الله*
____________________________
mohamed hamdy
ألف شكر على تعليقك و تشجيعك
و على زيارتك الغالية
____________________________
Dr.tantawy
و الله أنا كمان كنت بأقول التعليق ده و كانوا بيقولوا عليا رجعي
واضح اننا احنا الأثنين رجعيين
و انا الحقيقة سعيد برجعيتي
نورت مدونتي المتواضعة
____________________________
KING TOOOT

dodda said...

ههههههه
بوست بوب
لذيذ وخفيف..
بس ناقصه رباعياتك اللى شكيت فى يو انك تكون بتتكلم بيها فى البيت
:O)

Anonymous said...

السلام عليكم

انا اول مرة ادخل المدونة دي ..بس ان شاء الله مش هتبئي المرة الاخيرة
لان فعلا فيها افكار وبوسطات جميلة جدااا .
بجد تسلم ايديك .
بالتوفيق انشاء الله

Anonymous said...

وبتمني زيارة حضرتك في مدونتي
طرئعة دماغ
http://tra3tdemagh.blogspot.com/