Pages

تاااااااااااااااج الأحـــــــــــــــــلام

تااااج الاحلام.....

وصلتني دعوة للتاج ده من Dodda

و حتى يسود السلام كنت لازم ألبي الدعوة و أحضر للأستلام

أذكر خمسة أحلام تخص ماضيك

أول حلم

كان زمان هو إني أكون وكيل نيابة ، و مش عارف ليه وكيل نيابة بالذات يعني ، بس تقريبا كنت متأثر بمسلسل مش فاكر إسمة ، كان بيتعرض في التليفزيون و كان فيه ممثل اسمة مجدي وهبة عامل دور وكيل نيابة ، و بيدور بقى على حقيقة الجرائم و كده ، و كنت وقتها كل ما أفكر في مستقبلي أو حد يسألني السؤال المعتوه بتاع نفسك تطلع إيه لما تكبر ، أرد و إبتسامة بلهاء على وشي و أقول " وكيل نيابة " ، و طبعا الحلم لم يتحقق ، و كويس إنه ما أتحققش لأني حاليا مقتنع إني ماكنتش أنفع و كيل نيابة خالص .

الحلم الثاني

إني اسافر و أشوف بلاد كتير ، و الحمد لله الحلم ده إتحقق و سافرت بلاد كتيرة و عشت فيها فترات مش قليلة ، و عرفت فيها حاجات كتير ، فعلا في السفر سبع فوايد ، يمكن السفر فيه سبعين فايدة كمان مش سبعة بس .

الحلم الثالث

كان بدأ عندي و أنا كبير شوية ، يمكن 14 أو 15 سنة و هو إني أكون باشتغل في شغلي إللي أنا فيه دلوقت ، و لأنها نفس مجال والدي فأنا كنت منبهر بيه و كنت بأروح معاه في كثير من الأحيان علشان أتعلم منه و أشوفه بيشتغل إزاي ، و الحلم ده علشان يتحقق كان لازم أتدرب بشكل معين على العمل و أجتهد عدد كتير من السنوات علشان أقدر أكون ناجح فيه ، بس فعلا إن الله لا يضيع أجر من أحسن عملا ، لأني بعد كده و في وقت قليل قدرت أكون ناجح ، و أحقق حاجات كويسة جدا في شغلي ،

الحلم الرابع

إني اكون بأعرف أعزف آله موسيقية ، أي آله موسيقية ، ماكانتش فارقه معايا قوي نوعية الآله وقتها ، بس كنت عايز أبقى بأعرف أطلع الموسيقى بنفسي من آله و خلاص ، و فعلا أتعلمت في الكونسير آله الكمان و بقيت بأعزف عليها كويس و كنت صغير في السن جدا لدرجة إني كنت أصغر واحد بيدرس في الدراسات الحرة في معهد الكونسيرفاتوار إللي في أكاديمية الفنون .

الحلم الخامس

بقى هو حلم فانتازيا ع الآخر ، من وأنا صغير باحلم إني اقدر أخترع آله أو مادة أو اي حاجة تخللي الصيف مايجيش خالص ، و تبقى الدنيا كلها شتا في شتا ، و طبعا الحلم ده ماأتحققش و مش حايتحقق أبدا ، بس حاولت أني أحققه جزئيا ، بوجود التكييف في كل مكان بأروحه تقريبا ، لدرجة أني ماباقتش بأقعد ع القهوة علشان مافيهاش تكييف ، مش ألاطه يعني ، بس لأني فعلا بأكره الحر كره العمى

------------------------------------------------

أذكر خمس أحلام تخص مستقبلك و ما تتمناه منه

أول حلم

للمستقبل ، هو أني لما أموت أدخل الجنة ، صحيح أنا أفعالي زي النيلة ، و الملاك الشمال باني مكتبة عشرين دور ، بس كمان عندي حاجات كويسة كتير ، و بأطمع طول الوقت في رحمة ربنا و مغفرته ، و إنه يتقبل مني أعمالي الصالحة و تكون في ميزان حسناتي .

ثاني حلم

مرتبط بالحلم الأول ، و هو إن مراتي تكون معايا في الجنة لو أنا عتبتها أصلا يعني ، لأني بيتهيألي أن الجنة من غيرها مش حاتبقى جنة ، و على العموم هي قريبة قوي من ربنا و شكلها كده هي إللي حاتخش و أنا إللي حاألبس في الحيط

ثالث حلم

، إني أربي عيالي كويس و يبقوا ناجحين في حياتهم سواء كانوا ولاد أو بنات ، و إنهم لما يختاروا في زواجهم تبقى إختياراتهم ناجحة كلهم ، و كمان يبقوا ناجحين في حياتهم و مستقبلهم يكون ممتاز .

رابع حلم

إن مصر تتغير من كل الفشل و الخيبة إللي إحنا فيها دي و تتحول دولة من دول العالم المتقدم ، و ترجع تاني تكون هي قائدة المنطقة و يختفي منها الفساد و الظلم و تغور الحكومة دي من وشنا بقى و يتغير الحكم إللي كاتم على نفسنا ده للأبد .

الحلم الخامس

يمكن حلم يزعل الحكومة بس هو إني يكون عندي عشر عيال ، أولاد أو بنات مش مهم ، المهم عايز يكون عندي عيال كتير ، بالعند في الحكومة ، و كمان لأني بأحس أنهم عزوة ، و ماحدش يقول لي بقى التربية الحديثة و تنظيم الأسرة و هرش المخ ده ، لأن النغمة دي مش موجودة غير عندنا بس ، في الدول المتقدمة بيشجعوا الناس على انهم يجيبوا عيال كتير ، لأنهم فاهمين إن دي ثروة بشرية ضرورية للتنمية ، و مابيعملوش وقفة مصرية و بتاع و الكلام الخايب بتاعنا ده .

----------------------------

أذكر شخصين - على الأقل - متواجدين فى حياتك كنت تتمنى وجودهم من قبل

أول شخص

كنت أتمنى يكون موجود في حياتي من قبل كده هي مراتي ، لأنها مراتي و أختي و أمي و بنتي و حبيبتي و صاحبتي و كل شيء ليا في الدنيا فعلا ، بجد كنت بأتمنى أنها تكون موجودة معايا من أول لحظة في عمري ، لأني فعلا حاسس إن أي لحظة مرت عليا قبل ما أعرفها كانت وقت ضايع من عمري ، كمان لأن وجودها أكيد أكيد كان حايمنعني من أخطاء كتير الواحد ممكن يكون وقع فيها في الماضي .

ثاني شخص

هو صديقي المميز جدا ماجد ، الأنسان ده فعلا لو في أثنين منه في الدنيا كان حال الدنيا أتعدل ، قمة الشهامة و الجدعنه ، مثال حي على الصداقة إللي بجد مش كلام وخلاص ، و هو أكثر أنسان وقف معايا في حياتي و مازال بيقف جنبي دايما ، ورغم أننا أصحاب من 16 سنة إلا أني كنت بأتمنى أننا نكون أصحاب من قبل كده بكتير .

--------------------

أذكر شخصين - على الأقل - غير متواجدين فى حياتك و كنت تتمنى وجودهم مستقبلا فى حياتك و حياة أولادك

الشخص الأول

الحقيقة مش بس كنت باتمنى يكون موجود في حياتي و حياة أولادي ، ده أنا كنت بأتمنى أنه يكون موجود في حياة كل مصري و عربي ، و هو الرئيس الراحل جمال عبد الناصر ، لأن الراجل ده هو الرئيس المصري الوحيد إللي بأحس أنه كان بيحب مصر بجد

الشخص الثاني

هو جدتي رحمة الله عليها ، لأن الست دي رغم كبر سنها ، و تعليمها المحدود ، كانت تمتلك حاجة مهمة جدا ، و هي " الفطرة السليمة " ، كنت بأحس و أنا قاعد معاها بأنها نقية و شفافة جدا لدرجة كنت بأتعجب لها و كانت كل كلمة بتقولها دائما تحمل حكمة معينة ، و كأن عصارة خبرة السنين ، حولت كلامها العادي لحكمة و درس .

----------------------------------------------

اخيرا لمن تهدى التاج

طبعا بوبو أول المدعوات

و بعدها أي حد يحب يجاوب على التاج يتفضل


6 comments:

dodda said...

تاج جميل زى صاحبه
ربنا يرضى عليك ويحقق احلامك
ومبسوطه اوى انك مررته لبوبو

بجد عايزه اشوف ردها عليه بسرعه لانها
مقله جدا
وربنا يبارك فييكوا وفى ولادكوا وتكونوا من اهل الجنه
امين

فاتيما said...

وليد
يا راعى الملك
أنت المفروض الواحد طول العمر يوررلك تيجان
عارف ليه ؟؟
لأن التاج دا لما لبسته نور وشك قوى و خلانى أشوف ملامح حلوة كتير معرفتهاش من خلال الأشعار بتاعتك
حاجات حلوة قوى قوى
زى حبك لهبة
ربنا يسعدكو و يهدى سركو يا رب
و أحلامك الجميلة الغريبة بتاعة وكيل النيابة دى يعنى نظام شرلوك هولمز و حل الألغاز يا جاااامد
بتحب المزيكا حلم كل محب لها و أنت بتعزف مزيكا بأشعارك
حلم الأختراعات دا حلم يوسف كمان !!
أحلامك المستقبلية ربنا يا رب يحققهالك و أكتر
و تكون بوبو عروستك فى الجنة
و تحياتى الخالصة يا راعى الملك

Anonymous said...

انت انسان رائع فعلا.. شعر وموسيقى وكمان رومانسى
بجد يا بخت المدام بيك
تحياتي
امل

KING TOOOT said...

dodda
اولا بأشكرك على تمرير التاج ليا لأنك أتاحتي لي فرصة أني أجاوبه و طبعا ماكانش ممكن يمر من غير ما يعدي على بوبو
و هي فعلا ردت بس عندنا مشكلة في النت و مش عارفين نرفعة على البلوج بتاعها
و كمان أشكرك جدا جدا على دعواتك يارب آمين
_____________________
فاتيما
أشكرك جدا على التعليق الرقيق ده ، و مبسوط قوي أن التاج ده خلى الناس تعرفني أكثر ، لأن فعلا الشعر مش بيبين الشخصية بشكل كامل
حبي لهبة ده أجمل حاجة في الدنيا بجد ، مش بس لأنها مراتي و كل حاجة ليا في الدنيا ، لكن كمان هي أنسانة أكثر من رائعة بكتيييييييييييييير
مبسوط جدا إن يوسف عنده أحلام الإختراعات هو كمان ، معنى كده إن روحي مافقدتش لمسه الطفولة إللي فيها ، طمنتيني
و أشكرك بجد على دعائك ليا أنا بوبو إنها تكون عروستي في الجنة اللهم آمين
تحياتي
_______________________
Anonymous أمل
الحقيقة يا بختي أنا بيها
أشكرك على مجاملتك الرقيقة و نتمنى نشوف مدونة بإسمك قريبا
تحياتي
_______________________
KING TOOOT

بسمه عبدالباسط said...

يا سلام على الأجابات

بجد عجبتنى قوى

ربنا يخليلك هبه يارب ويارب تجيبوا عشر عيال زى ما انت عايز وقابلنى لو عرفت تنام
ههههههههههههههههههههههههههههه

KING TOOOT said...

bos bos
ننام مييييين
ده عيل واحد بس و مش مخلينا عارفين ننام يبقى عشرة عيال حانعرف
بس بردو عايز عشر عيال بالعند في الحكومة
تحياتي يا زميلتي العزيزة
KING TOOOT