Pages

أيوة خـُـنـتـِـك


أيوة خُنتك يا حبيبتي

رغم إن الكون فداكي

لما يوم بكيتي و إنتي

طفلة ، و ماكنتش معاكي

لما نمتي زمان لواحدك

مش في حضني يا ملاكي

أيوة خُنتك يوم ما عشت

أي ثانية قبل منك

أيوة خُنتك يوم ما كنت

في اي حته بعيدة عنك

أيوة خُنتك لما شقشق

فجر من غيري في سماكي

لما كنت في لحظة بأعشق

أي حاجة غير هواكي

أيوة خُنتك لما عيني

قبل ما تقابليني شافت

أيوة خُنتك لما روحي

يوم زمان على حد خافت

ايوة خُنتك قبل ما أعرف

إني ممكن يوم أقابلك

و إن عمري معاكي يمحي

أي عمر عَدّى قبلك

أيوة خُنتك قبل ما أفهم

إن كل حياتي ليكي

و إن أنا و الله أعلم

نبض قلبي بيناديكي

أيوة خُنتك و الخيانة

عمرها ماكانتش بيننا

بس حاأعمل إيه في عُمر

عدّى قبل ما أتقابلنا ؟


9 comments:

dodda said...

طب يعنى هو ينفع كده بقى؟؟؟؟
ما شاء الله يا رب ما تعرف تخون تانى
وكل اللى عملته قبل كده هى اكيد مسامحه فيه
ربنا يخليكوا لبعض


حتيجى ندوة مدونات مصريه ؟؟؟
انت بتقول انك كنت فى الكتب خان يوم طارق امام طب ليه مشيت بدرى؟؟؟؟
كنت قاعد قريب منى بينى وبينك واحده لابسه احمر
يا ريتنى كنت عارفاك وقتها
بجد حكون سعيده لو اتقابلنا فى اى فرصه قريبه انت وهى وعمر

KING TOOOT said...

doddo
أنا ماعملتش حاجة خالص و الله قبل كده
دي كل الخيانة إللي عملتها قبل ما أعرفها إني عشت عمري بعيد عنها لغاية ما أتقابلنا
بس
أنا مش عارف إيه ندوة مدونات مصرية دي
ياريت تعرفيني ايه الموضوع ضروري
على فكرة
في الكتب خان أنا كنت موجود في المكتبة و باتابع من بعيد ماكنتش قاعد في الندوة
بس كنت لازم أمشي ساعتها لظروف شغلي
تحياتي
KING TOOOT

HERO said...

ايه يا عم ده
عنتر ابن شداد
قيس
روميو

يابختها بجد لو بتحبها قوي كده

تحياتي

dodda said...

ما انا عارفه انك برىء
بس الاعتراف بالخيانه ادانه..
ههههه
الأربعاء 21 مايو
دار العين ودار مزيد
دول فيهم احمد فؤاد نجم وخالد الصاوى
وفى يوم الخميس فى عمر بوك ستورز
لما اعرف تفاصيل اكتر حبلغك
سلامى لبوبو ةالعكروت

dodda said...

بمكتبة عمر - عمر بوك ستور
شارع طلعت حرب من ميدان التحرير فوق مطعم فلفة
الموعد الخميس 22/5/2008 ـ
الساعه 6.30 مساء

la3lahakhier said...

لا جامدة جدااا

shady said...

و إن أنا و الله أعلم

كان صعب تيجى نانا
واخد بالك من قصدى يا كينج


متلمع ومتبدع ومتألق كالعادة
هههههه

KING TOOOT said...

hero
الحقيقة أنا بأحبها أكتر من كده بكتيييييييييييير
يا بختي أنا
_______________
dodda
مش دايما الإعتراف بالخيانة إدانه
ساعات كتير بيكون تعبير عن الحب و الله
أشكرك على المعلومات الجامدة
_______________
dodda
إحنا رحنا قابلنا فاتيما بس مع الأسف ماشفناكيش هناك
معلش حظنا وحش
_______________
la3lahakhier
أشكرك جدا جدا
_______________
shady
يااااااااه
إنت فين يا أبني
إيه الإختفاء الفظيع ده كله
منوّر مدونتي يا زعيم
وحشتنا بجد
_______________
KING TOOOT

dodda said...

زعلانه اوى كان نفسى اقابلك انت وبوبو!!

والله سألت عليك

مفيش نصيب المره دى

هو انتو من المعادى؟؟؟
ده عشان كنت فى الكتب خان بالصدفه