Pages

تاج .. وعجبي


وصلني تاج من بسمة الروح

و طبعا هي بتحاول تنتقم مني لأني رئيسها في المجلة

و لكن نحن لهااااااااااااااا

التاج بجد هو السهل الممتنع

هو طلب واحد بس

إتكلم عن نفسك في عشر نقاط

حاااااااااضر

و رباعيات كمان

__________

1

إسمي و ليد و إسم الجد كان جودة

ثلاثة و ثلاثين سنة في العمرمفروده

خريج سياحة و كمان دبلومة في الأعلان

الجرافيك شغلتي و تصاميمي موجودة

___________

2

عشقت أجمل بنت و قلبي بقى مشغول

من يومها بأكتب قوافي و فيها شعري بأقول

عنيها من سحرها السحر غار منها

و هي صبحت مراتي و حاتفضل كدا على طول

___________

3

أربع شهور و كمان فوقهم عشر ايام

لا عرفنا يوم نخرج ولا يوم عرفنا ننام

من يوم ماشرف لنا البيه "عمر" و إحنا

لا رحنا يوم سيما و لا شفنا يوم أفلام

___________

4

بأحب آلة الكمانجة و بعرف أعزفها

و أميل مع الألحان و ساعات بألفها

درست في الكونسير على أيد أساتذة كبار

و ست زي العسل ياما كنت بأقرفها

___________

5

مزاجي طول ما الجيب عمران متظبّط

لكن لو يوم حايفضى تلقاني متلغبط

لا نفسي في البيزنس ولا نفسي في الملايين

ولا نفسي إيد الفقر فوق كتفنا تخبّط

___________

6

بحب بلدي بجد و بأخاف عليها كتير

من ناس بتهوى الهد و تقبل التدمير

سافرت بره لقيت ملامحي ممسوحة

رجعت شوفت شفايفي و عنيا و المناخير

___________

7

بشجع الكورة مع أني مش غاوي

تلقاني من منبتي في الأصل أهلاوي

لو يوم في ماتش بأروح على راسي كاب أحمر

لا يغلطوا و يقولوا عني زملكاوي

___________

8

أنا مصري زي الناس كلها في وطني

ساكت لاكن مليان إحساس كبير وطني

بأحب صوت الحق و العدل و الحرية

و أكره أكيد حكومتنا و حزبها الوطني

___________

9

أبويا ليه في حياتي أفضال ماتتعدش

و أمي عمري بحاله لجميلها مايردش

و أخويا هو الذكرى و شقاوة الصبيان

و أختي لو تطلب ، طلبها مايتردش

___________

10

مابأخافش م السلطان ولا اي صاحب جاه

ولا يوم نسيت جرئتي ولا سابني قلبي وتاه

ولا خفت يوم من عسكر أو نسر أو دبابير

لكني طبعا بأخاف م الآخرة و من الله


10 comments:

la3lahakhier said...

تصفيق حار
ادام الله عليكم السعادة يارب ويفرحكم بعمر باشا
وبكرة تروحوا كلكم تتفسحوا ههههههههه
بجد غير عادى

Anonymous said...

أنتقم منك وده كلام برضة هو فيه واحدة هتنتقم من أخوها
أكيد عمره ما يحصل

والتاج جميل قوى بجد
تحياتى

... said...

مش قادرة غير إني أقول مش ممكن سلاسة رباعياتك
وهمية فعلا
ربنا يتم عليكم نعمه ويفرحكم بعمر اللي ممكن تسيبوه عندي ومع أولادي وتروحوا سينما عادي بجد مش عزومة
حلو أوي ردك علي التاج من أجمل ما قرأت مؤخرا
دعواتي باستمرار الإبداع

ياسمين حميد said...

أجمل رد على تاج قرأته في حياتي
ربنا يخليكم انت وزوجتك وعمر لبعض

dodda said...

ولا كل من ركب الحصلن خيال
ولا كل من لبس التج ملك

ما شاء الله موهبه رائعه
واحلى اجابه شفتها للتاج اللى تم تمريره لكتير من المدونين

عموما لما تنوى تروح سينما قولى انا عازماك انت وهبه

مدونتك بتفرحنى اوى
نضافه..وموهبه ولا اخشى ان يخدش حيائى فيها
ربنا يبارك فيك ويباركلك
تحياتى

مدحت محمد said...
This comment has been removed by the author.
مدحت محمد said...

ايه العسل ده

يارب يخليلك عمورة يارب

ولد زى العسل و يارب يحفظهولك من العين

ياوليد باشا

ده انا طلعت مبعرفش اقول شعر على كدة ياعمونا

ههههههههههه



تحياتى وتقديرى لشخصك الكريم

رئيس جمهوريه نفسى said...

شفت التاج ده اتجاوب كتير بس بالاسلوب الراقى والمبدع ده بصراحه مشفتش
ربنا يخلى ليكم عمر ويفرحكم بيه يارب

KING TOOOT said...

la3lahakhier
أشكرك على تشجيعك الدائم
نفسنا أنا و بوبو في فسحة بجد و الله
________________
bos bos
أنا باهزر معاكي اي بوس بوس
أشكرك على التاج بجد
________________
بثينة
ألف شكر على كلكاتك الرقيقة و كمان عرضك السخي
بس خدي بالك إحنا مابنصدق
تحياتي
________________
ياسمين حميد
ألف ألف شكر يارافعة معنوياتي
آمين يا رب العالمين
________________
dodda
مش عارف أرد على تعليقك الجميل ده غير إني أتمنى إني أكون دايما عند حسن ظنك و تفضلي زائرة عزيزة على مدونتي المتواضعة
نورتيني
________________
مدحت محمد
شرفتني و نورتني يا زميلي العزيز
إحنا على قدنا يا باشا ،، و آدينا بنحاول يعني
________________
رئيس جمهورية نفسه
و الله تعليقك أسعدني جدا ، و خصوصا إني باقدرك جدا يا صاحبي
تحياتي و إحترامي
________________
KING TOOOT

Anonymous said...

seriously.... allah 3leik. the entire poem is beautiful.. A BEAUTIFUL RESUME OF U.
I wrote before in a previous comment that u should put ur poems in a book, . but then again may be u already did that.

I love that part

بحب بلدي بجد و بأخاف عليها كتير

من ناس بتهوى الهد و تقبل التدمير

سافرت بره لقيت ملامحي ممسوحة

رجعت شوفت شفايفي و عنيا و المناخير

I live in another country but i never feel "Home" except in egypt where i see شفايفي و عنيا و المناخير