Pages

عمر و أنا .. و أشياء بيننا



لما يكون في أيديك إنسان

لسه مالوش في الدنيا كتاب

لسه مالوش في الأرض مشاكل

لسه لا صادق ولا كذاب

لما تشوف قدّامك روح

تسرق منك كل دقيقة

تنسى المرفوض و المسموح

تلقى إيديك الناشفة رقيقة

فجأة يهب في قلبك حس

فجأة تحس إنك مش نفسك

تبقى كأنك عايش بس

علشان توهب إبنك نفسك

فجأة الطيبة

حاجة رهيبة

تفرض نفسها فوق أفعالك

فجأة تلاقي

كل الباقي

منّك ، صورة بعيد في خيالك

تلقى الدمع في عينك تاني

بعد ماكانت عينك صامت

تلقى لسانك بحر أغاني

بعد ماكان من غلبك صامت

تلقى شفايفك تعرف تفرح

تبقى سعيد .. و تبطّل تسرح

تسمع نبضة قلبه و تضحك

وتشوف ضحكة عينه تطير

يبقى بفرحه بيحضن فرحك

و أنت مابين أحضانه اسير


7 comments:

ياسمين حميد said...

نص جميل وإحساس رقيق
ربنا يخليه لك

بسمه عبدالباسط said...

اخيرا عمر
ياه والله وحشنى قوى ولما هشوفه هقول له بابا بيبخل علينا بصورك يا عمر
ربنا يخليه ليك ولهبه القمر

وعلى فكرة ليك تاج عندى روح أستلمه

تحياتى لك

Anonymous said...

الله
بجد انت المفروض تجمع اشعارك دي ف كتاب.. خسارة تسيبها كدة
ربنا يخليلك عمر

la3lahakhier said...

السلام عليكم
اول زيارة لفيت فى المدونة كلها عجبتنى اوى خاصة موشوع مجدى علام وتناوله
كل التحية

KING TOOOT said...

ياسمين حميد
أشكرك على تعليقك الرقيق و على دعائك الثمين
______________
bos bos
لو عمر وحشك صحيح كنتي جيتي و شوفتيه
عموما إستلقي وعدك بقى لما نشوفك من عمر و مامت عمر كمان
أشكرك ع التاج و إعتبريني إستلمته خلاص
تحياتي
______________
anonymous
أشكرك جدا على تشجيعك ليا
و أتمنى أن يكون مستوى كتاباتي زي ما أنت بتقول
______________
la3lahakhier
أشكرك و نورتني في أول زيارة وياريت ماتكونش الأخيره
______________
KING TOOOT

dodda said...

ما شاء الله ربنا يحميه
ربنا يبارك فيه وف ابوه وامه
ربنا يكرمك يا وليد بالذريه الصالحه ويسترها معاك دنيا وآخره
تحيه وورد لبوبو

اميرة الأحلام أماني said...

ربنا يحميه ويصونه ويبارك فيه ويحميه من كل عين يارب العالمين .ززأجمل احساس يا وليد انك تحب واللي تحبه يجيبلك حد تحبه اكتر (فزوره) ربنا يخليكم لبعض باحساسكم الجميل بحبكم