Pages

حاجاااااات غريبة ريبة ريبة ريبة

مجدي علام ، صحفي مصري المولد إيطالي الجنسية ، يحمل من السنوات ما فوق الخمسين ، تناقلت الشاشات في كل أنحاء العالم حدث ، وصفته بالهام ، ألا وهو ، عمادته في كنيسة القديس بطرس عشية عيد القيامة ليخرج من الدين الإسلامي و يتحول إلى المسيحية بإرادته الحرة .

هو حر ،، يشوف الدين إللي يريحه و يتفضل يدخل فيه

و لكن يبقى هنا سآل هام جدا و حيوي ، طيب ليه الأخ ده بالذات يعني تتنقل أحداث عمادته على كل شاشات العالم ، ما هو يمكن هناك مسلمين في حتت كتير من العالم بيعملوا كده و مافيش حد بياخد بيهم خبر غير اوساطهم الإجتماعية و عائلتهم ، لكن ليه الأخ ده بالذات يعني إللي قررت الفاتيكان و بدون سبب واضح أو منطقي إنها تعمدة أمام عيون كل البشر من كل الدنيا ؟؟

مش حاجة غريبة شوية ؟


طيب حاجة كمان ،،، ليه أصلا يعمده البابا ؟ يعني ليه ماحصلش الموضوع ده زي ما بيحصل عادة في الأحوال إللي زي كده ، إنه يروح الإبراشية المحلية التابع ليها مكان إقامته و يقوم الاب الكاهن هناك بإجراءات و طقوس العمادة له ؟ ، عادي يعني زي باقي الناس إللي بتختار التحول للديانة المسيحية .

مش حاجة غريبة تانية دي ؟

طيب ، إيه أهمية الحدث ده أصلا علشان يتزاع ؟ يعني أكيد المسيحيين مش حايزيدوا إيمانا لو شافوا مسلم بيتحول للمسيحية ، ولا حايقل إيمانهم لو شافوا واحد مسيحي بيتحول للإسلام ، يعني المسأله مش توعية ولا هي عظة ولا درس للإخوة المسيحيين , و طبعا أكيد الفاتيكان مايقصدش يدعوا المسلمين إنهم يعملوا كده و يبقوا مسيحيين ، لأن الفاتيكان لو عايز يقوم بنشاط تبشيري ، فهو أعلم بآلاف الطرق الأخرى ، الأنفع و الأجدى من تصوير واحد مسلم بيتنصر على شاشات التليفزيون ، طيب يبقى إيه لزومه بقى ؟.

آدي كمان حاجة غريبة .

الأخ ده بقى ،،، أيوة ،،، إللي إسمة مجدي علام ده ، ماكانش مثلا مفكر إسلامي ، أو راجل من رجال الدعوة ، علشان تحوله للمسيحية يبقى فيه غطاء إدانه ضمني للدين الإسلامي مثلا أمام أعين الغرب ، لا ، الحقيقة الراجل ده ماخلاش حاجة وحشة ماقالهاش على الإسلام ، و كل كتاباته بتهاجم الأسلام و بتصفه بالأرهاب و العنف و القائمة إياها بتاعت أخواننا المستشرقين و المتأمركين و المستغربين و المتصهينين ، يعني تحوله عن الاسلام أمر شبه منطقي ، بعد كل الهجوم إللي وجههه للإسلام في كتاباته ، طيب يبقى ليه الضجه دي بقى ؟

حاجة غريبة رابعة أهه .

طيب ، سؤال بقى يطرح نفسة و يجمع نفسه و يضرب نفسه و يقسم راسنا كلنا ، ليه بقى في التوقيت ده بالذات ؟! ، يعني رسومات مسيئة في الدنمارك و فيلم مسيء في هولندا و آدي كمان الفاتيكان بتدلو بدلوها في الموضوع ، السؤال هو ليه محاولات الإستفزاز الغربية دي لمشاعر المسلمين ، و طبعا ياريت ماحدش يكلمني عن حقوق المواطن و الكلام ده لأني مش باقصد بالأستفزاز مسأله التحول الديني ، لا ، أنا بأقصد بالإستفزاز نشر العملية دي على نطاق واسع و بتحريك تام من الفاتيكان بما يتنافى مع أصول التعامل إللي وضعها الفاتيكان نفسه كقواعد ليتعامل بها مع العالم الإسلامي منذ عقود ، ولا يغيب طبعا عن الفاتيكان أن مثل هذا البث حايأثر على مشاعر المسلمين لأنهم حايشعروا إن الفاتيكان متواطيء مع مخطط لإستفزاز مشاعرهم الدينية ، و طبعا الأخوة المسيحيين مش حايبقوا مبسوطين أبدا إذا الأزهر مثلا قرر في يوم و جاب وكالات الأنباء العالمية علشان تصور الناس إللي بيتحولوا من المسيحية للأسلام بإعتبار إن ده من حقوق الإنسان ، طيب ليه التوقيت ده بالذات ؟

مش حاجة غريبة دي كمان ؟

الحاجات الغريبة دي بقى حاتترجم لرصيد ضخم في البنك للصحفي مجدي علام ، ليه بقى ؟ لأن السبوبة حاتفتح ع البحري، و مبيعات كتبه القديمة حاتزيد ، و طبعا حايكتب كتب جديدة ،، حريقة بقى قبل ما الناس تنسى الموضوع ، و كل كام يوم حايطلع في تليفزيون شكل يتكلم عن تجربته الفريدة و كأنه المسلم الوحيد إللي تحول للمسيحية ، كمان الأمر مايسلمش ، كل مايلاقي الأضواء إنحسرت عنه شوية ، إنه يصوت و يقول إلحقوني ، جالي جواب تهديد و فيه ناس عايزين يموتوني ، و البليه تلعب معاه بقى و الآشية تبقى معدن ، طبعا مش عايزين ننسى إن الترتيبة الجامده دي ممكن انها ماتكونش من دماغة هو لوحدة يعني ، خصوصا إن حبايبة في إسرائيل ماعندهمش أعز منه ، و بيحبوه موت من ساعة ما كتب كتابه ، تحيا إسرائيل

9 comments:

بطوط حبوب said...

ايه الغريب فى الاربع خمس حاجات الى قلتهم
اظن غريب مات محروق
مبقاش فى حاجه اسمها غريب
الراجل ساب دينيه عادى من واحد زيه
الفاتيكان اذاعت الخبر عاى وهى هتخاف على مشاعر مين
الراجل هيكسب فلوس كتير عادى بيزنس از بزنس

بطوط حبوب said...

يأخذون سفهاءناو نأخذ فضلائهم
كما قالها الشعراوى

فاتيما said...

وليد
يا راعى الملك
بص ... الموضوع واضح و انت فرزته من ساسه لراسه
الشخص دا انتهازى و أظن اللى بيقروه و يعرفوه سهل يحكموا بدا ..
و المسيحية خسرت بدخوله فيها ...
أنا اعرف أصدقاء مسيحين على طول حياتى كلهم رقى و اخلاق ...
و واحد منهم قاللى مرة ...
اللى يسيب دينه و يدخل دين تانى عشان اسباب دنيوية ...يستاهل الحرق ...
لكن مسألة اعلان دا على الملأ كما لو كان الشخص دا يعنى مجبتوش ولادة ...فعندك حق ...هوه نكرة و لا يعز المسيحية فى شىء ...
الشخص دا لا ملة له و لا دين ...
و آخرته معلومة دنيا و اخرة
تحياتى يا راعى الملك

مواطن مصرى نايم said...

اولا محدش يضغط على الرابط اللى فى الرسالة اللى فوق لانة فيرس
ــــــــــــــــــــــــــــــــ
اما بقى حبة الحاجات الغريبة دى مش غريبة خالص
================
خلى اللى يغور يغور
مجدى كلب و الا طور
لاحس تراب اليهود
لبسوه اليوم عمود
بكرة يطلع عالعمود
يدفن و يكلوا دود
و افتكر يوم الحساب
كلب وحيدفع حساب
كل كلمه فى حق دينا
و احنا نتجازا ثواب
ـــــــــــــــــــــ
بجد بوست منظم وتحفة

Gannah said...

شكرا لك اخى الكريم على مناقشتك الوافية للموضوع. الامر و ما فيه ان البابا الجيد عنده مخطط معين و بينفذه بطريقة منهجية و مش هامه حاجة لانه عارف الدرجة اللى وصلنالها من العجز و قلة الحيلة و يا ريت محدش يقول ان انا متخلفة و باتبنى نظرية المؤامرة لان المسألة واضحة و احنا نستاهل اكتر من كده لاننا مش بنستغل الاعلام بنفس شطارة اليهود و فالحين بس نفتح قنوات للسحر و الكليبات و الظاهر ان ده العصر اللى اصبح فيه اليهود اكثر نفيرا و صوتهم مسمع للعالم كله و تحالفتهم متشعبة و المصلحة واحدة محاربة الاسلام و المرة دى اختاروا واحد مسلم بالميلاد واستغلوا جهلة و عمى بصيرته و الف مبروك عليهم سى مجدى و ياريت كان عندى قلة كنت كسرتها وراه على باب الفاتيكان اصلى مفروسة من الموضوع ده و شكرا لانك اعطتنى الفرصة اخرج اللى جوايا. يا ريت نشوفك فى مدونتنا و جزاك الله خيرا

KING TOOOT said...

بطوط حبوب
شرفتني بالزيارة ، و زعلت جدا لما عرفت إن غريب مات محروق
:)
____________________
فاتيما
هذا ما كنت أقصده ، يعني لما هو شخص عادي يبقى الإهتمام الإعلامي ده وراه شيء غير عادي و ده سؤال مهم
شرفتيني يا ام يوسف
____________________
مواطن مصري نايم
عندي شكر و عتاب
أولا بأشكرك على تنبيهنا من الرابط إللي كان موجود و أنا قمت بحزفه فورا اول ما قرأت التعليق بتاعك
و ثانيا العتاب ، رغم إختلافي جملةً و تفصيلا مع مجدي علام لكن أنا مش مع السب أبدا مهما كان ،، يعني الحوار العاقل أفضل بكتير علشان نحافظ على مشاعر كل الناس
و بعدين يا راجل الكلمة دي بالثاء مش بالطاء
مش تكتبها عدل
تحياتي
_________________
gannah
كلامك أنا موافقك عليه لأن الدين و السياسة حاليا مندمجين في كل مكان حتى في الفاتيكان و كل شيء موصل لبعضه و اتفاق المصالح ممكن يعمل أكثر من كده
سعيد إن موضوعي حقق لك مجال لعرض رايك
بس ليه تكسري قله ،، خسارة القلة
تحياتي
_________________
KING TOOOT

مدحت محمد said...

الفاتيكان
الحقيقة يبان عداءه
من الاسلام لما بابا الفاتيكان اتكل كلام وحش عن الاسلام
وعن سيدنا النبى
والحقيقة هى حرب شرسة ضد الاسلام والمسلمين

KING TOOOT said...

مدحت محمد
ما هو إللي إنت بتقوله ده بالظبط هو الحاجات الغريبة
ريبة
ريبة
ريبة
مش باين من عنوان البوست ولا إيه ؟
تحياتي يا زميلي العزيز
KING TOOOT

أسما عواد said...

انا عرفت الخبر ده الاسبوع قبل اللي فات وكنت في اسيوط بزور دير العذرا
دير رائع وجميل جدا
شعرت برهبة لا مثيل لها وانا في داخله لم اشعر بها في دير آخر
وخرجت ببعض الرؤى التي طهرت نفسي من افكار كثيرة كانت بداخلي
المهم اني أظن ان هذه الرؤى الجديدة لم يكن مصدرها الدير الذي زرت مثله كثيرا
ولا سائق التاكسي الذي صودف وأن كان مسيحيا
ولكن ربما من الحوار والشرح الذي شرحه لي أحد الرهبان الذين في الدير والذي شرح لنا كل مكان فيه بتصور تصوفي وبمنطق فلسفي ليس مهما هل اتفقت معه ام اختلفت المهم ان حديثه كان له مرجعية يستند اليها
في النهاية اقول لك ان كل هذا لم يخرجني من ديني ولن يخرجني بالطبع ولكني اتذكر الآن ان هذا الأخ قال لي انه لا يوافق على ما يحدث من ضجة اعلامية حول انتقال احد من دين لآخر
المسألة يا صديقي كيف نتعامل مع ما نؤمن به
هل نجعله فكرنا الذي نفكر به
اين روحنا مما تؤمن به عقولنا؟
الروح .. الروح
تحياتي ولك شكري