Pages

و عجبي ،، أول مرة

من بين كتير أوجاع .. قلبي أتولد

من غير زواد و متاع .. ظهري أنفرد

زي الجمل و الخيل أنا شيلت شيل

لا يوم نخّيت ولا .. سيبت البلد

و عجبي

________________________________________

مشيت يوم المطر غرقان و مرصرص

و البرد في عظامي بياكل و بيمصمص

لقيت ولد فرحان وسط المطر يجري

حافي و مش بردان ، عريان و معصعص

و عجبي

________________________________________

عمارة مليون دور صاحبها م التجار

قدّامها بيه بيركب عربية ست أمتار

معدي واد عربجي على كاررو ، يتخانقوا

البيه يقول " سيترو" و الواد يقول يا حمار

و عجبي

________________________________________

5 comments:

Anonymous said...

من بين كتير أوجاع .. قلبي أتولد

من غير زواد و متاع .. ظهري أنفرد

زي الجمل و الخيل أنا شيلت شيل

لا يوم نخّيت ولا .. سيبت البلد

و عجبي

---------------------------

طيب أقول ايه
أنت حر بقى
كل اللى أنت كتبته عجبنى بس اللى نقلتها أنا هنا هيا اللى حستها جدااااااااااااا أكتر من التانين

تحياتى لك

ياسمين حميد said...

الله
حلوة

على باب الله said...

جميلة بشكل وحش

---

أنا أول مرة لي أزور مدونتك لكن شكلي ها أكون زبون دائم

---

خالص تحياتي

t3ban said...

عجبي عليك يا زمن و انت مألمني
بليل مصحيني و بالنهار منيمني
اخاف اقول انسان تعذبني
و اخاف اقول حمار عربجي يشتمني
anwer

KING TOOOT said...

bos bos
ماتقوليش حاجة
كفاية زيارتك و بس يا زميلتي العزيزة
تحياتي
____________________
ياسمين حميد
ألف
شكر
____________________
على باب الله
جميلة بشكل وحش
ده مدح؟؟؟؟؟؟؟؟؟
ولا زم ؟؟؟؟؟؟؟؟؟
شرفتني بجد
مستنيك
____________________
t3ban
طيب و بالليل مصحيك ليه ؟
لازم بتحب
جميلة رباعيتك
نورتني
____________________
KING TOOOT