بأحب شكله

بأحب شكله

و ما أحبش أكله

و أحب أشاكله

و أعيش مشاكله

قلبي إنشبك له

وراح شبك له

رسم بدمي

في قلبي

شكله

يا حبيبتي ماتخافيش

يا حبيبتي ماتخافيش

عيني مش بتشوف سواكي

جوه قلبي ماتلاقيش

غيرك إنتي يا ملاكي

غِيـري

أوعي ماتغيريش

ثوري

أوعي ماتثوريش

كوني حب بيبتدي و ما بينتهيش

كوني للأحلام سما

جناحات و ريش

شقشقي فجر النهار

من عيونك

خللـّي نور الدنيا يشرق

بين جفونك

يبقى قلبي في صدري شايفك

و النغم من بين شفايفك

يحكي عن حبك ،، يقول

يبقى واصل للمشاعر كلها

من غير رسول

يبقى قصر من الحروف

أحلى من كل القصور

و إنتي ملكة

فوق عروش الكل عرشك

قلبي أرضك

روحي فرشك

تبقى عيني البوابات

و جفوني صور

همّا همّا المجرمين

في الشوارع مقتولين

تحت أشجار الزتون

ستميت أيلول حزين

و الدموع ملو الجفون

في الشوارع مفرودين

ع الجتت جرانين بريئة

تخفي موت العطشانين

للحقوق قبل الحقيقة

في الشوارع دم سال

م النسا و من العيال

و الدماء تكتب تاريخ

للنبي يحي الجريح

قتله كان عربون خيانه

بعده كان صَلب المسيح

هما هما المجرمين

الصهاينة الملعونين

فكرهم شر و خيانة

قلبهم مالهش دين