Pages

ناس بلدنا


في بلدنا ناس تكسب فلوسها بالدموع
و ناس بتقضي حياتها تشبع
و ناس تجوع
وناس تموت
و ناس يموّتها السكوت
أو الخنوع
وناس بتشرق زي شمس
و ناس ظلام و ظلال ويأس
وناس بتحلم ييجي بكره
و ناس بتحلم ييجي أمس
و ناس بتتكلم حقايق
بس همس
و ناس تعيش وسط الخلايق
و ناس تدايق
و ناس بتتدايق دقايق
و ناس تعيش العمر تكره
و ناس تشعللها الحرايق
من أي فكرة
و ناس تروّح م العصاري
و ناس بتسهر أحلى سهرة
و ناس حكومة و ناس أهالي
و ناس رعاع
و ناس بيحترفوا الخداع
و ناس بيتمنوا الُلقا
و ناس بيستنوا الوداع
بس كل الناس في بلدي
على قد ما فيهم خلاف
كلهم على رأي واحد
أننا نبطل نخاف
و بدال ما نحلم بالتابوت
نتجمع أحنا بالآلاف
و ساعتها مش حانخاف نموت
ولا حاتقبض قلبنا
صورة الجنود

7 comments:

يا مصر اكتب إليكي رسائلي said...

تحياتي الأخ العزيز وكل عام وانتم والأسرة الكريمة بكل خير ...وكل ناس بلدنا بخير يارب ..

shady said...

اى والله
ربنا يخلي كلامك البسيط الواضح اللى ما بيعرفش اللوع

FATMA said...

جميل جدا يا وليد زي ناس بلدنا

islam yusuf said...

جميله جدا
و تحليل شيق للبلد و الناس

لكن.........

انت بتظلم الجنود اوى ,الجنود دول غلابه
انا واحد منهم و منتظر الإفراج

KING TOOOT said...

يا مصر أكتب إليكي رسائلي
و أنت و الأسرة الكريمة بخير و تحياتي لك و لناس بلدنا فردا فردا
____________
شادي
ربنا يخليك أنت لينا يا باشا
____________
توتة توتة
ألف شكر على مرورك و تشجيعك
____________
نيرفانا
ياااااااااااااه
أنتي فين ؟ وحشتينا و وحشتنا كتاباتك و تعليقاتك
أتمنى نشوف قلمك في علّي صوتك من تاني ،، إفتقدناكي بجد
_____________
إسلام يوسف
شكراً على تعليقك يا إسلام ،، بخصوص موضوع الجنود أنا ما قصدتش الجنود نفسهم أنا قلت " صورة الجنود " يعني المقصود بيها يد السلطة الباطشة
إنما الجنود نفسهم دول فوق راسنا ،، وربنا يتمم أيام جيشك على خير إن شاء الله
______________
KING TOOOT

واحد من الناس said...

والله يابني انت جامد طحن
ربنا يحميك لشبابك

بعدك على بالى said...

والله ياريت فعلا يكونوا بطلوا يخافوا

تحياتى على الاسلوب والتحليل