Pages

لبنـان الجميلة

بيقطعوك يا آرز تاني !!ه
زي ماتكون الحياة أستخسرت فينا الأغاني
و الأماني
و الزينات
و الفرح و الدكاكين و الفاترينات
و الحمرا و الروشة و جعيته
و كأن لبنان الجميلة صبحت لقيطة
من غير لا عيله و لا بيت و ناس
و كأن في عنينا أنزرع حتة أزاز
بدل الدموع
و كأن على جبيننا أنكتب
عار الركوع
و كأن ما جالناش محمد أو يسوع
دلوقتي لبنان الجميلة
مرمية عريانة و مريضة
ضفايرها مجدولة و شريدة
نظرتها لينا بتتهم فينا الفريضة
بس أحنا مش متألمين
علشان بقينا ع النخاسة متعودين
بعنا ماسة بعد ماسة
العراق و قبل منها فلسطين
و باقي مين
مافضلش حد
ممكن يحب الناس بجد
مافضلش واحد عنده قلب
عنده دين
مافضلش واحد فينا حافظ درس من سورة ياسين
مافضلش واحد فينا لسه مابياكلش تراب و طين
ما فاضلش واحد مش سجين ؟
معقوله مافاضلش بصحيح ؟
مافاضلش أنسان فينا
عايش مش جريح ؟
لبنان يموت
وقبل منه بتتخرب
كتير بيوت
و بعد منه حاتتخرب
كتير بيوت
و تلفنا خيوط عنكبوت
تخنق وطننا و حلمنا
تعصرنا فينا
تمحي في عقولنا التاريخ
تمسح ماضينا
و أندل الأندال هناك
فوق الكراسي متربعين
و كأنهم كروش جعانة
فايحة من بين جلدهم ريحة العفانة
ريحة الخيانة
من بين سنانهم دم سايل
و بين شفايفهم كلام
أكاذيب عن الخير و السلام
و الأحترام و التوافق و الوئام
و الكلام بيجيب كلام
بس فعل الندل فاضح
كل حاجة
فاضح الصفقة الخسيسة
فاضح اللعبة الرخيصة
فاضح السم أللى دايب
في الهريسة
----------------------
نشرت فى
قول علشان حلمك ما يموتش

8 comments:

shady said...

لبنان يموت
وقبل منه بتتخرب
كتير بيوت
و بعد منه حاتتخرب
كتير بيوت



على العموم بيتنا اتخرب من زمان
جامد كالعادة يا كينج

nardeen said...

جامد جدا الشعر دا

عمر said...

كلامك حلو اوووى بيفكرنى باحمد فؤاد نجم

KING TOOOT said...

شادي
صحيح بيتنا أتخرب من زمان و أحنا أللي خربناه بسكوتنا و خوفنا
شكراً يا كبير على التشجيع و أنتظر رأيك في عدد المجلة يوم 5 سبتمبر
_____________________
ناردين
شكراً يا ناردين جداً
_____________________
عمر
ألف ألف شكر يا عمر ،، بس أنا فين و أحمد فؤاد نجم فين ،، ياريتني أكون ربع موهبته حتى
_____________________
KING TOOOT

عمر said...

مساء الفل يا كينج ان شاء الله ححضر بوست لعلى صوت وانا سعيد جدا بمعرفتك .بس ادينى يومين كدة احسن اخوك مزنوق فى الشغل اووى

Anonymous said...

عزيزى كينج توووت

وصلت الى مدونتك بالصدفة ولكنها اجمل واحلى صدفة

قصيدتك رائعة واحساسك خلاب

اتفق مع الاخ الذى قال انك قريب من روح احمد فؤاد نجم

فبالتوفيق يا عزيزى ومن نجاح الى نجاح

لك ارق التحايا

KING TOOOT said...

عمر
في أنتظار إبداعاتك يا باشا و سعيد جداً بموافقتك
_______________
جينا
هي أجمل صدفة بالنسبة لي بالتأكيد أن تكوني زائرة عزيزة و دائمة بإذن الله لمدونتي المتواضعة ،، أتمنى أن أحمل ربع موهبة أحمد فؤاد نجم و روح قلمة البديعة
أرق التحيات ولكي جزيل الشكر
KING TOOOT

Anonymous said...

Very nice site! Ms wheelchair texas Adult account adult merchant online Can bextra be taken for kidney infection sm Zyrtec + heartburn Order fioricet overnight 1998 chevy venture minivan minivan . alle marken