Pages

حضنك شــال

حضنك شـال
بيلف كتافي في ليل الشتا بمتين موال
و ترن المواويل في وداني
تملاها حنان و أمان و أغاني
تسكت .. لكن ترجع تاني
تفرح مع رنة أقدامك
أمُات خلخال
و صهد الأرض بيجري عليكي
يبوس رجليكي
و يحاول يتشعبط في أديكي
بس المسكين عمره ما طال
و آدي له سنين على آدى الحال
أما أنا يا حبيبتي خلاص حسيت
بالدفا من أول يوم حطيت
أحاسيسي في حضنك
قلبك بقى وطني و قلبي أنا وطنك
أحاسيس بتشد ف ظهري و ظهرك
و تعلق صورتك جوه عيوني
من كتر جنوني
بيزورك قلبي فين ما تكوني
و بيجري يداري نفسه معايا
يقطف من قلبك ورداية
يشبك طرفها جوه في حضنك
على طرف الشال

4 comments:

Haitham said...

حسيت بالدفا .. احساس جميل أوى نفسي أحس بيه

voice of love said...

من غير حسد المرة دى .. تحفة فعلا

غادة الكاميليا said...

حلوة أوي القصيده دي
والمدونه كمان هايله
مبروك على الجمال ده

KING TOOOT said...

هيثم
أجمل أحساس في الدنيا ممكن تحس بيه هو الدفا
_______________
فويس أوف لوف
أنتي بالذات تحسدي براحتك يا فندم
_______________
شوباش
شكرا ً فحت
_______________
غادة الكاميليا
ألف شكر و يارب دايما ً تعجبك كلماتي
_______________
حاول تفتكرني
تحياتي و شكري العميق
_______________