Pages

عيون حبيبتي



عيون حبيبتى طيبيين

مليانين حب و كلام

كلام حنين

و كلام سلام

و رموشها من تحت الجبين

زى أسراب الحمام

متعلقين

على غصن ورد

و غصن تين

العنين المفتوحين

مافيهمش برد

بيدمعوا مية مورد

بيدمعوا على أى حد

عايش حزين

منها تنزل دمعتين

سرحانين على كل خد

مرة جذر و مرة مد

زى موجة فى وسط بحر

تغسل الأحزان بجد

كأنة سحر

تدى الأمان للمحتاجين

من أى مله و أى دين

تفرد شراع مركب نجاه

تكفى كل الغرقانين

وسط أمواج الحياة

العيون الطيبين

مليانه فجر

شقشقت جوا العيون

شمس أغصان الزتون

بددت ظلمة ليالى

مليانه هجر

و حبيبتى بعيونها الجميله

تروى كل العطشانين

ميه ندى

تحكى قصة حب كان

يوم أبتدى

بينها و بين كل البشر

حب مليان بالأمان

مافيهوش حذر

مافيهوش خطر

مافيهوش ضماير ميتيين

أصل الضماير صاحية دايما ً

فى العيون الطيبيـن

7 comments:

shady said...

أيوه فعلاً
الضماير صاحية دايماً
فى العيون الطيبين
ايه الحلاوة دى ياراجل ياطيب

هوميروس said...

انا سعيد ان انا زرتك
كلامك صافي

eskandarany said...

يا سلام عليك وحشتني بقالي كتير ما عدديتش على البلوج وعشان كده أنا حاسس اني خسرت كتير بس أوعدك وأوعد نفسي ان افضل متابع ...مبروك الانتاج الجديد

ياسمين حميد said...

رائع

زى موجة فى وسط بحر

تغسل الأحزان بجد

voice of love said...

ايه الجمال ده كله
احساس عالى جدا جدا جدا

karakib said...

you have a nice bolg :)

KING TOOOT said...

شادى
ألله يخليك للشعب يا باشا
و للعيون الطيبين
__________________________
نيرفانا
ألف شكر و السلام وصل
__________________________
هوميروس
و انا سعيد اكتر انك زرتني
__________________________
روز
أصل الحاجات الطويلة دى بتبقى مكتوبة بمزاج بقى
__________________________
اسكندراني
أنت رحت فيين يا راجل
وحشتنا
__________________________
ياسمين حمد
شكرا ً جدا ً على التعليق الرقيق
__________________________
Voice of love
شكرا ً جدا ً و اتمنى دائما ً أن اكون عند حسن ظنك
__________________________
كراكيب
ألف شكر
__________________________

KING TOOOT