Pages

أفتكرتك


أفتكرتك ,, لما كنا صغيرين
لما كنتى معايا عالبحر من سنين
يومها كان عقلك بيحلم جنب كتفى
يومها كانت ايدك أنتى حاضنه كفى
يومها كنتى معايا بتحاربى فى صفى
و المعانى مليانه طيبه
والمشاعر كانت رهيبه
مليانه سحر
يملى بحر
و المد يفرش بساط حصير
حصى و موج
لكن خطير
على كل قلب يعيش يحب
نفس المكان
نفس الحكاية هى هى
نفسها حصلت زمان
و بتحصل الأيام دى تانى
و كأنها عقرب دقايق
أو ثوانى
و كأن ساعة الحب قررت الفراق
و كأن هجر الحب بقى عله و داق
و هو مين فينا مادقـش
بس مين فينا أللى فاق
و مين ما فاقش

29 / 6 / 2005

مين يستجرى

مين يستجرى يطفى الشمس
مين يستجرى يصد النيل
مين يستجرى يشد الأمس
علشان يمنع حلم جميل
ييجى و شابك أيده ف بكره
ييجى و شايل حمل تقيل
علشان يلمع لنا بالذكرى
و ينور لعقولنا دليل
علشان يفرش لينا الأرض
علشان يهدى ألينا بجد
حريـــــــة و معـــانى كتير

العتاب المر


هو أنت خليت حد غيرك يوم يعيش ؟
هو أنت خليت للطيور أى ريش ؟
هو أنت حتى حاولت تمنع الخريف
مايعرينيش ؟
هو أنت حتى سترت جسمى ؟
هو أنت حتى أتذكرت أسمى ؟
هو أنت عمرك نمت زىّ
على طين و خيش ؟
تفتكر ممكن فى يوم تبقى أنت حلمى ؟
تفتكر ممكن تحس فى يوم بهمى ؟
تفتكر ممكن تشوفنى مره واحده
و ما تنسانيش ؟

مصرى و بس

مع أنى أصلا ً مصرى أبأ ً عن جد جد
و عايش حياتى وراضى ولا عمرى مره بأشت
ورغم أن الجوع كسّر عظامى و ظهرى
تلقانى دايما ً بأبنى و عمرى يوم ما بأهد
و عجبى
ــــــــــــــــــــــــــــــــــــــــــــــــــــــــــــــــــــــــــــــ
كوكب الأرض العجيب فيه سته من القارات
ثلاثه منهم نظيفه و فيها حريات
وأثنين من الباقيين بيحاولوا ياخدوها
وقارة واحده باقيه صبحت من الأموات
وعجبى
ــــــــــــــــــــــــــــــــــــــــــــــــــــــــــــــــــــــــــــــ
مع أنى باكل عيشى ياصاحبى بالتيـله
صابروساكت على عيشه منيله بنيله
لكن بأفكر دايما ً فى عيالى و ف بكره
يمكن لمستقبلهم ألاقى توصيله
وعجبى

مقدمة هامه

أيمانا ً منى بأن الحياة جميله بدون أن يكون لهذا الجمال داع ٍ أو سبب
و أحتراما ً منى لناموس العصر و قانون القرن الحادى و العشرون وهو قانون الغضب
و أعترافا ً منى بأهمية كل الناس على سطح هذا الكوكب عجما ً كانوا أو عرب
أقدم لكم هنا ما قد يكون مفيدا ً من فنون و ثقافه فى كل مجالات السياسة و الأقتصاد و الأدب
و أرجو منكم أن تكون التعليقات( ان وجدَت) على المستوى المقبول
و أن لا يكون فيها ما يدعوا الى الأحباط واليأس و القفول
و أن تكون مليئة بالمعانى الجميله و الألفاظ الرقيقه و الزهور
حتى لا يغضب علينا حفاروا القبور
وحتى لا تأتى يد من المجهول لتقذف بنا الى المجهول
حيث لا طائر ولا هاتف ولا جسور

KING TOOT Posted by Hello

مرحبأ ً بالعربى

أنها المرة الأولى التى أقرر أن أقتحم مجال النشر عبر الأنترنت و أنا أعترف أن هذا جنون جدا ً , و الجنون ليس بسبب أننى قررت أن أكتب أفكارى و أنشرها هنا على شبكة الأنترنت ولكن الجنون أن أقرر أن أكتب أفكارى أصلا ً و أ ن أسمح لأحد أن يطـّلع على ما يجول بداخل رأسى و أن يعرف ما أفكر فيه و ما أعتقده وما أؤمن به وما أرفضه . هذا هو الجنون بعينه فى وجهة نظرى
طبعا ً هناك فوائد كثيرة يمكن أن أحصل عليها من هذا الموضوع , وطبعا ً هى فوائد معنوية ليس الا ولكن فى أعماق ضميرى من الداخل أقر و أعترف أننى أفعل فعل الجنون الآن و أنا أكتب على شبكة الأنترنت و أعلم أن ما سوف أكتبة سوف يراه الناس بعد قليل عن قصد أو صدفه