Pages

حكمة و كتاب

حكمة و كتاب

غابت مابين أيد الغضب

زى السراب

و كأن فكر الحر معمول من تراب

و كأنه مش دارى و فاهم

و كانه كان طول عمره واهم

و كأن قلبه كان مرض

و حنينه غاب

ماباقاش خصامنا فيه عتاب

بقى فيه بارود

و كأننا أتحولنا فجأة

لصفوف جنود

و مادام جنود يبقى أحنا حرب

و طيش و ضرب

و بلاد تعيش فى دمار و كرب

و صراخ و محنه

فيه ناس فى وسط النار بتنفخ

وهى لابسة ألف سِحنه

بتبيع بلادنا

و تبعنا أحنا

و تبيع سنين من بكره

لسه يوم ماجاتش

وتبيع فى مستقبل عيالى

أللى لسه ماتخلقش

الناس دى مين ؟

الناس دى زى الصيادين

بيصيدوا أى كلام عبيط

و يمسكوا ف ديل أى خيط

ينفع يشعلل نار صراع

ينفع يكون لمركب الأكاذيب

شراع

ينفع يكون أنياب لديب

ينفع يعيّـش مصر فى

إرهاب رهيب

من بين حياة كل البشر

يخطف حياتنا

علشان فى ناس من بره

بتعيش من مماتنا

عشان فى ناس من جوه

تتنفس سكاتنا

الناس دى عايزة ميلاد و مينا

يمسكوا فى خناق حسين

و حسين يجيب محمود و خالد

و تبقى عاركة مابين نصارا

ومسلمين

مع أنهم من فرقة واحده

مش فرقتين

و كأنهم همّا أللى سرقوا

و كأنهم همّا أللى نهبوا

و كأنهّم هما الللى فتحوا

باب بلادى ع الضرفتين

ونسيوا أن دى لعبه واضحة

مش حقيقة

كل لما الناس تفوق

تشوف حريقة

فتخاف تدوق

ماتشوفش غير بس الفروق

ماتعيشّى غير بين الشقوق

و فى وسط دا تنسى المطالب

و الحقوق

13 comments:

shady said...

وفى وسط دا ننسى المطالب والحقوق
جميله كالعاده يا شاعر الوحده الوطنيه

KING TOOOT said...

شادى
أنا سعيد جدا ً بتعليقك و سعيد أكتر بموضوع شاعر الوحدة الوطنية ده " ويارب يفضل عندنا فى مصر وحدة وطنية " إن شاء الله
KING TOOOT

خجل said...

علشان فى ناس من بره

بتعيش من مماتنا

عشان فى ناس من جوه

تتنفس سكاتنا


..الحته دي حلوه عجبتني

ويا ريت تكملها ب حكمه وكتاب غابت ما بين ايد الغضب زي السراب وكأن.........الى نهايته وهيك تدور بالنص الدائره ولا ينتهي

KING TOOOT said...

خجل
نفسى الدائرة تتفتح مرة و نهرب منها كلنا و نعمل واقع جديد فى عالم جديد
يا ترى ممكن ده يحصل فى يوم من الأيام ؟؟

KING TOOOT

mindonna said...

انت وطني يا كينج توت

أنا معنديش الإنتماء الوطني للأسف
انت معملتش السبعة أشياء ليه ؟، شوكير بعتلك دعوة

KING TOOOT said...

ميندوننا
الوطن مش كلمة تتقال باللسان
الوطن فعل مربوط بالناس و المكان
و الفعل لو كان خير حايعيش لأولادنا
و الفعل لو كان شر حايروح مع النسيان
و عجبى
________________
أنا عملت السبع أشياء أول واحد يا ميندوننا بس عملتهم فى الرد مش عندى فى البلوج
أفتحى البوست أللى عند شوكير و حاتلاقينى فى الرد قايل السبع حاجات
أنا أقدر أتأخر على أبو حميد صديقى ؟؟
طبعا ً مش ممكن
KING TOOOT

mindonna said...

أنا كتير بكره نفسي لعدم الإنتماء

صدقني مش إحساس حلو بإنك تتمني ترجع لأرض

بس مش عارف فين هيا!!

.......
عجبتني أوي الأشياء اللي عادة تقولها:)

allfollowsome said...

جميل جدا يا كينج توت
واقع مرير فعلا
وعاوز يتلحق

KING TOOOT said...

ميندوننا
لو عايزة تشعرى بالأنتماء ,, الموضوع بسيط جدا ً و مش محتاج مجهود
عيشى مع تفاصيل حياة الناس و شوفى قد أيه فيها طيبة و بساطة
أتفرجى ع الناس فى الشارع و شوفى أللى راكبين الأتوبيس و اللى ملمومين على عربية فول فى الشارع و بياكلوا و كأنهم عائلة واحدة مع انهم مايعرفوش بعض قبل كده
أسالى أى واحد فى الشارع عن الساعة أو عن عنوان و شوفى حايعمل معاكى أيه
توقفى بعربيتك فى أى شارع من شوارع مصر و أفتحى غطاء الماتور بس و شوفى كام واحد حاييجى يساعدك و يمكن ينام تحت العربية يصلحها لك
أبكى و أترمى فى حضن أى أم مصرية ماتعرفيهاش حاتحسى أن حضنها هو حضن أمك الحقيقية
المشاعر دى و أكتر مليون مرة مش موجودة فى أى مكان فى العالم غير عندنا يا ميندوننا ,, يمكن عندنا حاجات كتير بتخنقنا و بتدايقنا فى الحياة فى بلدنا لكن مشاعر الناس و الدفء أللى فيها هو أللى بيخللى عندنا أنتماء مهما كانت المعوقات أو مسببات المشاكل
طولت عليكى بس عايز أقول لك حاجة أخيرة
جربى تتفرجى على الناس و تصرفاتهم فى مصر حاتلاقى أحاسيس تانية ماعرفتيهاش قبل كده
________________________________
طاهر
شاكر جدا ً تعليقك و أهتمامك
فعلا ً الواقع مرير بصورة مخيفة بس تفتكر ممكن نلحقة
أن شاء الله لازم نلحقة و إلا نقول على بلدنا السلام
________________________________
KING TOOOT

mindonna said...

شكرا علي التعليق الحلو ده يا توت

تصدق ان الحاجات اللي بتتكلم عنها دي هي اللي بتخلي الوَحشة عندي بتزيد!!

المصريين حلوين جدا و عشريين جدا
المشكلة ان انا مش عارفة أعمل زيهم
الحكاية دي عندي قديمة أوي
من زمان يا توت إحساس عدم الإنتماء ده
في الحقيقة لا أحاول معالجتها كثيراً
يمكن أساس المشكلة ان انا مش من مواليد مصر(اليابان) ، و مقضتش طفولتي هنا
رجعت علي رابعة ابتدائي كده
كنت فاكرة ان 12 سنة فترة كافية للتأقلم

أعتقد ان علاجها ان انا أمشي من البلد:)

Anonymous said...

عيد مبارك ونظيف وشريف
و مليان سرور وكمال وجمال
مع تحيات الحزب الوطنى
وبالعند فيكو هه؟

Ahmed Shokeir said...

دايما .. السهل الممتنع .. عند كينج تووت

KING TOOOT said...

أحمد
دايما ً رافع معنوياتى يا باشا
KING TOOOT