Pages

وسط الأختلافات

فى حياتى نور و نار و ضل
و كلام و عقل
أحاسيس بتتبدل يوماتى
بألف شكل
و سلام وحرب
و فرح و هم و غيم و كرب
و نسيم و حب
و خوف و قلب يخاف يطب
و حلم مات
و حلم حى
أحساس بيبعد و هو جاى
و حوار عبيط
و موز و كفته و قرنبيط
و حاجات جنون
و بدله لون زهر الريحان
و بالطو لون ثمر الليمون
و عيش محمص مغمسينه
جبنه و زيتون
و سفر و ليل
و بلاد تحط و بلاد تشيل
و مطار جميل
و غربه مافيهاش الحبيب
ولا الخليل
و لا حتى فيها شىء بديل
و المعضله
أنى بأعيش فى الأختلاف
من غير شعور بالمشكلة


16 comments:

Ahmed Shokeir said...

كل دى متناقضات عايشه جواك ، كل دى أحاسيس متقلبه عندك .. الله يكون فى عونك

التعبير كالعاده أكثر من رائع

KING TOOOT said...

أحمد شقير
أنا بيتهيألى أن كلنا جوانا الحاجات اللى عكس بعضها دى
على فكرة يا أحمد
البلوج بتاع الصور بتاعك تحفه, و طبعا ً حكاوى آخر الليل هو كمان من أحسن المدونات
ربنا يوفقك دايما ً يا رب علشان يبقى عندنا كاتب ساخر من النوع الثقيل زى محمود السعدنى مثلا ً ,, أو يمكن أحسن كمان ليه لأ ؟
KING TOOOT

mindonna said...

اني بعيش في الإختلاف
من غير شعور بالمشكلة

أكيد احنا حاسين بالمشكلة جدا ، لكن المسألة ان احنا بنهرب منها دايما

علشان منتجننش!!
:)

KING TOOOT said...

صدقينى يا ميندونا ناس كتير جدا ً مش حاسين بالمشكله
لا و مش حاسيين أن فيه مشكله من أصله
يمكن أنتى حاسة بالمشكله لكن صدقينى ناس كتير تانيين مش فى دماغهم خالص
KING TOOOT

بنت مصرية said...

جميل أوى يا كينج، بس انا حسيت انى محتاجة اقرا تانى.. يعنى حسيت انها اتقطعت فجأة.. كملها ، قول تانى

KING TOOOT said...

بنت مصرية
أحساسك صحيح و ليها باقيه بس مع الأسف ماتنفعش تتنشر على الناس
KING TOOOT

KING TOOOT said...

بنت مصرية
دى حته من الباقى
__________________
من غير شعور بالأئتلاف
من غير شجاعة
أحساسى خاف
من كتر ما أتعلم و شاف
من ذكريات
فيها فى الشارع بأبات
و البرد موت
و الثلج نازل فى بلاد غريبه
جنب السكوت
وحده رهيبه
بأحس بيها
و شوف حياتى
بعيون بلادى
و عيون حبيبه
أنا تهت فيها
______________________
آسف أنى مش قادر أكمل باقى القصيدة
أصل الكلام أللى جاى مش للنشر
آسف مرة تانية
KING TOOOT

Anonymous said...

يا كينج توت مالك يابيه
كلامك مليش تعليق عليه
حلو ومنظم وعال العال
كل كده جاى منه فيه
*******
بس اسمحلى اقولك حاجة
انا ماشفتش احساس بسعادة
هو كده انت بتوصف نفسك
ولا قصدك تدى افادة
*******
ياخى ماهو كله محصل بعضه
انسى اللى فات وشوف ايه بعده
والله دا الدنيا هم كبير
واللى يطنش دا يوم سعده
*******
زى ما قلت حوار عبيط
وموز وكفتة وقرنبيط!!!!
وعيش محمص مغمسينه
وعلشان القافية معاه سميط

allfollowsome said...

يا عم بلاش حزن وهم
لخبطتنا من كتر الغم
ودخل كده طاهر طهور
والعملية ما حتتلم

KING TOOOT said...

طاهر
و طاهور
الحقيقة بيتهيألى انكم واحد ,, يعنى طاهر هو طاهور و على العموم بخصوص الغم و النكد فده مش دايما ً يعنى
برده عندى قصائد كتير فرايحى و أن كان الحزن أكتر فيمكن يكون لأن الحزن فى حياتنا أكتر من الفرح ,, أو يمكن حياتى أنا أللى الحزن فيها أكتر من الفرح مش عارف ,, بس الحقيقة أنا بأكتب عن حياتى أنا و بالتالى فالحزن شىء غالب
و أخيرا ً شكراًجدا ً على الأهتمام و التعليق
KING TOOOT

Ghada said...

جميل أوي

أجمل ما في شعرك إنه تلقائي أوي

KING TOOOT said...

غادة
دى شهادة أعتز بيها و أتمنى دايما ً أكون عند حسن ظنك
بقالك كتير ما زرتيش البلوج هنا ,, يا ترى كنتى غايبة عننا فين ؟
KING TOOOT

islam yusuf said...

حزن..حزن...حزن انا مش عارف حياتنا كلها بقت مدهونه بالحزن كده ليه انا متهيألى ان انت انسان مغترب ليه ألإحساس بالغربه ده انت أكيدمش فى مصر

خجل said...

اسلام : انا شايفه الحكايه في ان دايما الواحد مش بيحتاج يطلع احساسه على ورق الا لما يكون زعلان..اما في الاوقات العاديه واوقات البهجه والسرور حضرتك فهو بيكون عنده ألف طريقه وطريقه يطلع بيها احساسه ده من ضمنهم الكتابه ...


كنج توووت : كتابتك لذيذه بس في حته ضاعت مني وانا بقرأها..يعني دخلت في احساس تاني غير المتوقع فجأه ..صحيح مش فجأه اوي لكن يعني الى حد ما...

احساس بيبعد وهو جاي
وحوار عبيط
وموز وكفته وقرنبيط
...
..... .
.......

KING TOOOT said...

خجل
المقصود بالبيتين دول هو أحساس دايما ً بيجى داخل الأنسان و هو فى عز الحزن و الزعل و فى منتهى الجدية و الثورة العاطفية بييجى على مخ الأنسان فجأة و لمده بسيطة جدا ً يمكن ثانية,, تفكير فى أى شىء اهبل بره الموضوع خالص
يعنى مثلا ً يكون حزين جدا ً و بيبكى و فجأة يلفت نظرة لعبه فى محل أو عجلة راكبها واحد فى الشارع و يلاقى نفسة تاه مع الحاجة دى و ركز معاها جدا ً و سط كل أللى بيحصل حواليه و بعدها يرجع تانى للموود أللى كان عليه
و دى علميا ً حسب ما أعرف هى حيله للمخ و الجهاز العصبى لحماية الأنسان من الأنهيار العصبى و الدخول فى الأئكتآب النفسى و الحاجات دى
البيتين دول بقى تعبير عن اللحظة دى و علشان كده هما تحسى أنهم مالهومش موقع من الأعراب فى وسط القصيدة لكن فى نفس الوقت من نفس النسيج مش شاذيين عنها
شكرا ً على أهتمتمك و أتاحة الفرصة لى لكى أشرح الموضوع
KING TOOOT

KING TOOOT said...

إسلام يوسف
الغربة معانى كثيرة فى هذا العالم
KING TOOOT