Pages

رمضان كريم


رمضان فى مصر له طعم تانى
مليان حكاوى تملاك معانى
أصوات أذان
و أصوات أغانى
تملى الودان
و فجر مليان بالأمان
سهران ليلاتى
أصل الليالى لها شكل تانى
ف رمضان بلادى
وناس كتيرة
و فرن فيه ريحة الخميرة
و فانوس عيال
مليان خيال
و بتاع كنافه بيلف دور
و وراه يلف ألف دور
وناس بتتخانق عشان حق التابور
و عم جرجس أبو أبراهيم
يدخل يهدّى ويقول خلاص
رمضان كريم
يديله عم تهامى حته
من الكنافه
و يقوله فى غاية اللطافه
كلام سليم
وولاد كتير قبل الفطار
مقسمين بينهم فريق
و بيلعبواالكورة الشراب وسط الطريق
رمضان فى مصر له طعم تانى
مليان حكاوى تملاك معانى
فى كمان هناك على الرصيف
جنب الجوامع
و فى الشوارع
ناس بتعمل لناس فطار
لحمه و خضار
و كام رغيف
مساهمة من واحد شريف
و صلاة تراويح
بتخللى الناس تسرح فى الله
و تقول الله
على عظمة شهر بيجى معاه
كل التفاريح

4 comments:

shady said...

رمضان فى مصر فعلاً شكل تانى نوع تانى من الحياة بطقوس واخلاق وعادات جديده ومختلفه ولكنها بالتاكيد جميلة رمضان المصرى ليس موجودا فى اى دوله اسلامية اخرى ومن جربه خارج مصر يعلم هذا جيدا

KING TOOOT said...

عندك حق يا شادى
أى حاجة فى مصر لها طعم و شكل تانى
مش رمضان بس
مصر نفسها لها طعم و شكل تانى
كل عام و مصر كلها يا رب بألف خير
KING TOOOT

mindonna said...

الله عليك يا تووت

رمضان كريم :)

Ahmed Shokeir said...

والله ياتوت صورة دقيقه ومعبرة جدا عن رمضان المصري
إنت فعلا بتكتب السهل الممتنع

ورمضان كريم عليك