Pages

سوسو عضلات




سوسو عضلات يا حضرات
عامل نفسه واد عضلات
با با كمان يا حضرات
جابلو حاجات
جابها عشان يا حضرات
الواد بات
بات زعلان
طيب ليه زعلان من ايه ؟
لما الواد راح يتخانق
ومعاه العربية الرولز
أصل في بيتهم عربيات
والعربيات زي الرز
لم صحابه فى كل مكان
بعربياتهم هما كمان
جابوا معاهم كل سلاحهم
فرد وآلي وطبنجات
وراحوا يتخانقوا في الكيت كات
بات مضروب , وواحد مات
وأتدغدغت العربيات
وأطـّبخت الكوسه بسرعه
والبركه في شغل الحصانات
والحصانات دى حاجه عجيبه
نسمع عنها كتير حكايات
نسمع ان ساعات بتفووت
هم تقيل أوي م المطارات
وأنها ممكن تحيي خلايق
وبتجعل ناس من الاموات
هي كمان بتحدد دايما
مين المجني عليه من الجاني
ومين الشعب ومين أسياد
ومين بيرووح في التكييف
ومين يتشعبط في مواصلات
ومين بيشد حزام على بطنه
ومين يتعشى ثلاث مرات
ومين بيروح القصر العيني
ومين بيروح طب البوتيكات
ومين يقدر يضرب ويبرطع
ومين ياخد كل اللكمات
وبعد كدة مين يخرج منها
ومين وسط التخشيبه يبات
نرجع تاني يا حضرات
نعرف حال العربيات
الرولزات والبويكات
والهوندات والمرسيدسات
نلقى كل العربيات
باظوا تماماً ياحضرات
والتصليح محتاج ألوفات
ودى كلها مصاريف تفاهات
كام ميت ألف من الجنيهات
من ألي بابا نهبها زمان
من مشاريع الأفشخانات
الى مشاريع بيع القطاعات
الى بدلات البرلمانات
والأكلات والعمولات
وكام ميت ألف من الرشوات
ألي واخدها بالدولارات
في ممارسات ومناقصات
للمشاريع القوميات
الي أعداد المؤتمرات
تحت رعاية
ماما فلانه وبابا فلان
وكله عشان
الشعب المطحون بالذات
ولأن الشعب المقصود
قلبه أسود مليان أحقاد
فبينكر كل التطوير
وبينسا كل الحسابات
والتحسين والطفرات
وكمان يدعي أنه فقير
وانه مع كل التدبير
الراتب من قلة بخته
ما يسدش أي أحتياجات
لأصحاب البيت والبقال
ومدارس علشان الأولاد
تلتينه للنور والميه
والباقي بيروح في أقسات
ودى طبعا كلها أكاذيب
للتضليل وأفتراءات
لأن الحكم تمام وكويس
وحكومته كلها بركات
وبتسعى للشعب العامل
وتحقق كل الرغبات
وبتشغل كل الرجاله
وبتاخد حق الستات
نرجع تاني يا حضرات
نكمل قصة سوسو عضلات
بعد ما رحرح
قلبه أتزحزح
عرف أنه مالوش في الخناقات
طاب يتسلى في ايه يا أخوانا
نزل الشارع
ماشي يعاكس في الستات
وان قلتله كده عيب يا أفندي
يصرخ ويقول لك لعنات
علشان أحنا شعوب مطحونه
وحاقده وكل قلوبنا سواد
وبنسطعبط وبنستهبل
لكن عارفين الفروقات
أزاي بتقوله يا أفندي
وأحنا الشعب وهما أسياد
عمك سوسو وهو بيشتم
ممكن تسمع أسم أبوه
لو حصلت لازم تتصمر
خوف من بكره علي الأولاد
تمشي بسرعه ودوغري تروح
لحسن تدخل في الأزمات
وتشوف بعنيك الداخلية
والأقسام والمعتقلات
والتفتيش والتهويش
والتلطيش والبيادات
أسمع مني كلمه أخيره
علشان تفهم الفروقات
أحنا بتوع النبض الشعبي
وهما بتوع البرلمانات
أحنا بتوع الفول والعدس
وهمه بتوع كل الأكلات
أحنا بتوع الميكروباصات
وهما بتوع العربيات
أحنا بتوع الجوز جنيهات
وهما بتوع المليارات
والبورصات والشركات
لازم نعرق أحنا ونتعب
علشان يبقوا مليونيرات
أفهم بقى وبلاش تتغابه
لو ما فهمتش تبقى جماد

7 comments:

Ahmed Shokeir said...

كتروا أوى بتووع سوسو عضلات اليومين دوول
المرة الجايه بأه كلمنا عن سوسو مواصلات .. طبعا معروفين وكتروا برده..:)

KING TOOOT said...

احمد
عارف يا أحمد سوسو عضلات دول كتروا ليه اليومين دول
علشان باباهاتهم و ماماهاتهم هما كمان ,, ياى ,, بقوا مليين البلد
أوه لا لا
KING TOOOT

shady said...

هما مين واحنا مين
احنا الشعرا الحلوين
وهما مخاخ فيها طين
يا جمالك يا عم توت خساره فعلا ان الشعر ده ما ينتشرش

KING TOOOT said...

شادى
يا عم يتنشر أيه بس خلينا كده جنب الحيط
أى ,, دا الحيط باين عليه و قع
ههههههههههههههههه
KING TOOOT

Nour said...

!!رائعة يا توت

KING TOOOT said...

نور
ميرسى يا نور
KING TOOOT

eskandarany said...

شكلك طول النهار في الشارع عشان كدة بتلاقي حاجات كتير تكتب عليها ....... كل يوم باتعلم منك اكتر وخصوصاً الحالة اللي بتعيشها ودوبانك فيها عموماً اكتب اكتر علشان الناس تتعلم تقرا أكتر وتفكر أكتر.