Pages

هو مين فينا أللى كان


هو مين فينا اللى كان
ضيع اللأحلام زمان
هو مين فينا أللى فرّط
هو مين فينا أللى خان
ما أنتى عارفة كل حاجة
يوم ما بان ناب الخواجة
يوم ما قطعولى اللسان
يومها كونتى بتنهضى
حزينة عالأبن أللى فارق
أللى سابك فى المفارق
ساب وراح وسط السكوت
هو كان زيك حزين
كان أبن موت
ورجعتى وحدك تنهضى
و تنفضى
حمل السنين و تكملى
و أنتى حزينه عاللى سابك
و أنتى خايفة من اللى جالك
و أللى جالك كان يبيع
حتى ف عيالك
من يوميها و أنتى عايشة تحلمى
بيوم وفاتك
لجل ما يخلص عزابك
لجل ما يقفل كتابك
لجل ما تخلص حياتك
من الهوان
بس أنا كنت أعمل أيه
ما أنتى شايفه بيعملوا
فالحلم أيه
ما أنتى عارفة بيدبحوا
أفكارنا ليه
هو مين ممكن يقول
هو مين بيننا رسول ؟
غمضولى خلاص عنيا
ربّطونى من أيديا
كممونى خلاص كمان
مع أنهم من يومها
قطعولى اللسان
بس أنا كنت اعمل ايه ؟
ما أنتى عارفة كل حاجة
حا أقول لك أيه
هو ده شىء يتحكى
أحكى أنى بقيت ذليل
أحكى أن صباح نهارى
قلبوه لليل
أنتى عارفة من زمان
أنا مش جبان
بس لازم أنحنى
علشان عيالى
لجل ما يكلوا الحلال
لجل يجروا يعيدوا
يوم الهلال
علشان حياتهم بأنحنى
زى الجمال
طاب حا أعمل أيه
لازم يعيشوا و يكبروا
يمكن ساعتها يفكروا
أو يقدروا
يحققوا أحلام زمان
ويمزعوا صدر أللى خان
يمكن ساعتها يقدروا
يبقوا بنى آدمين كمان
فاكرة لما أبويا كان
والصول خميس
ومعاهم العريف حسين
واقفين هناك
على أرض سينا
متجمعين
كان يومها واحد من عيالك
مات بدالك
لجل ما يحمى التراب
من حس بومة
او صوت غراب
يومها أبويا كان بيبكى
زى ما كان ليه يحكى
كان صوت بكاه
مكتوم حزين
كأنه غارز وسط طين
يومها قال الصول خميس
للى مات
ماكتوبالك يا عريس
و مافيش حداد
حبه و العريف حسين
قال للجماعة الموجودين
سيد سلامة مات شهيد
مات شهيد
كانت عيونو بيضحكوا
و هيا غرقانة بدموع
و كأنه عيد
أصله كان نفسه فيها
كان ما نفسوش الرجوع
يومها أبويا قام و قال
تار ما بات
والله ليهون الممات
لجل ما تار العيال
يرجع تمام
لجل ما تملى الكهارب و الزينات
كل الشوارع و البلاد
فاكرة يومها عملوا أيه ؟
قعدوا يومها يخططوا
و معاهم الظابط فؤاد
خدوا ناس كتير من العدو
ماتحملوش التار يبات
نام أبويا ليلتها شاف
سيد سلامة بيشكرة
رد عليه أبويا قاله
وحذرة
أوعك يا سيد يوم تخاف
عمرحد فى يوم ما ينسى
عرق الكتاف
بس أديكى نسيتى أهه
هما كمان نسيوا خلاص
نسيوا ناس
دفعوا يوم من دمهم
ثمن الخلاص
و أما رجعوا لقوكى شارده
زى ورده
كانت زمان متفتحة
بس دبلت م الفساد
ملاقوش كهارب
ملاقوش زينات
ملاقوش بيوت متزوقة
ملاقوش فى بيتك غير خراب
و عيون كتير
مايملهاش غير التراب
كل أحلام الجنود
غرقت فى بحر من العتامة
و الواد فريد
ابن الشهيد سيد سلامة
هاجر وساب
راح يدور على أى مطرح
أو أى أرض تكون بتطرح
من غير عذاب
و عب عزيز
أبن بنت الصول خميس
سافر معاه
يمكن يلاقى هناك دواه
و أللى مستنيى هنا
زى أنا
عايش علشان يشوف ضناه
يمكن يكون هو الأمل
وسط الحياه
شفتى كان أهلينا فين
و أحنا فين
هما كانوا يموتوا بس بيفرحوا
و أحنا حزانا مكسورين
مستنيين
عيالنا يمكن يطرحوا

22 comments:

shady said...

الله الله ايه الجمال ده يا عمنا انا بسمع مين احمد فؤاد نجم الصغير ولا مين ده
برافو يا كينج ما اروعك بس عاوزين حاجه فيها تحدى وثوره اسخن شويه كده عاوزين حاجه جامده
انشاء الله فى امل وفى نور
واللى صبر سنين حيجى عليه يوم ويثور

KING TOOOT said...

شادى
مش عارف أقول لك أيه بعد المجامله الجامدة دى و تشبيهى بالشاعر العبقرى أحمد فؤاد نجم و أتمنى حتى أكون ربعه
بصراحة يا شادى أنا دايما ً كنت شايف أن فيه أمل بس مش عارف أحساسى اليومين دول مش متفائل خالص
يمكن تكون حاله نفسية
يمكن تكون أضطرابات من أكل الملوخية
يمكن تكون أنتفاخات من الفول و الطعمية
بس أنا حاسس أن ف مصر حاجة أصبحت مش مصرية
KING TOOOT

Nour said...

So touching.. So true..

Haitham said...

لا ياتوت مش مفروض نستنا عيالنا لما يكبروا ..احنا موجودين

KING TOOOT said...

nour
so nice so thanks
KING TOOOT

KING TOOOT said...

هيثم
طيب أحنا موجودين بنعمل أيه ؟
أنا مش بأتكلم عنى أو عنك أنا بأتكلم عن جيل آبائنا هما أللى حاربوا فى 73 و حرروا سيناء و كانوا أبطال بس أحنا الزمن خلانا مش زيهم أبدا ً يمكن أكون متشائم بس الحقيقة أنا شايفها كده
صحيح ممكن بيننا نلاقى ناس عندها أستعداد للتغيير و عندها أستعداد تتعب و تغير الواقع من حواليها بس دول مش كتير
انما الغالبية العظمى ..... مشكله
KING TOOOT

ROMANTIC ROSE said...

تحفه يا كينج .. احساسك كان عالي قوي .. بس اسمحلي اختلف معاك .. عمر العيال ما هيكبروا شادين عودهم فاردين صدورهم و هما شايفين ابوهم و امهم محنيين علي نصين .. و ان كبروا و رعرعوا عمرهم ما هينسوا منظر الاهانه و دوس الكرامه .. احنا المثل و القدوه .. اهالينا بيقولونا انتوا جيل خايب واخد كل حاجه ع الجاهز لانهم هما اللي دفعوا تمن حريه الارض .. ساعتها ما بنقدرش نرد .. لكن ابنك لو كبر و حبيت تقوله انت خايب هيقولك و انت عملت ايه يا بابا ؟ خلفتني علشان اورث ذلك و احساسك بالغربه في بلدك ؟؟

KING TOOOT said...

رومانتيك روز
طبعا ً الأختلاف فى الرأى لا يفسد للود قضية
و أنا بأكون سعيد دايما ً برأيك و أختلافك كمان مع رأى
بالنسبه لأبنى أنا الحقيقة مش عايز أقوله أنت خايب خالص
أنا الحقيقه عايز أقول له
ماتكونش يا أبنى خايب زينا
فرّحنى بيك و أعمل غير ما عملت انا
ما أنا أصلى ماتعلمتش أجرى و أشب
و حتى المشى أتعلمته ف سنه
و عجبـى
KING TOOOT

ROMANTIC ROSE said...

ميرسي علي سعه صدرك يا كينج .. بس ابنك يوم ما هتقولوا عايزك ما تطلعش زيي هيقولك و اطلع زي مين يا بابا ؟؟ زي اللي بسمع عليهم ف كتب التاريخ و اشوفهم ف مسلسلات التليفزيون و بس .. فين القدوه يا بابا ؟
اتعلمت المشي ف سنه .. مممممممممم .. يبقي اكيد سننت بدري !!
:)

KING TOOOT said...

رومانتيك روز
أنا طبعا ً كالعادة مختلف معاكى فى الموضوع ده لأننى مش مؤمن بموضوع القدوه و المثل الأعلى الذى لن يتحقق أبدا ً بين البشر
يا روز أنا عايز أبنى يعيش حلمة هو , يغلط و يتعلم من غلطه , يعيش و يعرف و يشوف و يفكر و يقع و يقوم ويقع و يقوم تانى
الأنسان كده فى كل مكان فى العالم ماعادا عندنا
عندنا بس اللى الشاب أو الشابه بيفضل فى الحضـّانه لغاية ما أهله يموتوا ,, حتى لو ماتوا وهو عنده خمسين سنه
بيفضل فى الحـضـّانه الأسرية دى لغاية خمسين سنه
أنا مش عايز أبنى يعيش الحياة دى ,, لا ,, أنا عايزة ياخد الدنيا بالحضن و يجرى ,, يروح على المكان أللى هو يختارة و دورى أنا بس أنى أبنى جواه المبدأ و القيمة و الدين و العقل و بعد كده يعمل هو أللى هو يختارة
صدقينى يا روز أحنا جيل سىء للغاية و صحيح فيه ظروف خليتنا كده بس كمان أحنا ما قاومناش الظروف دى و ده خطأنا أللى لازم أولادنا مايدفعوش ثمنه و بلاش يشيلوا عقدنا و يمشوا بيها زى أحدب نوتردام
KING TOOOT

ROMANTIC ROSE said...

بكلامك ده ماعتقدش اننا مختلفين يا كينج .. انت قلت ان دورك انك تبني في ابك "المبدأ و القيمة و الدين و العقل " يعني هتقوله لازم يكون عنده مبدأ .. طيب يعني ايه مبدأ يا بابا يعني كذا .. طيب انت صاحب مبدأ يا بابا ؟ هتقوله ايه بقي ساعتها ؟؟ ايوه انا صاحب مبدا .. اللي هو كذا كذا .. كونه بقي يتفق معاك ف المبدأ او يختلف مش القضيه .. المهم انه فهم يعني ايه مبدأ لما لقي باباه او مامته بتتمسك بيه و بتمشي عليه ولا تحيد ابدا .. اما لو انت مش صاحب مبدأ و حبيت تعرف المبدأ لابنك و تقوله انت لازم يكون عندك مبدأ هتقوله ايه ؟؟ ابسط تعبير علي كلامي يا كينج ان فاقد الشئ لا يعطيه .. و ان اعطاه هيكون مبتور و ناقص لانه قائم علي تجارب الغير .. و اللي سمع غير اللي شاف اكيد .. ولا ايه ؟

KING TOOOT said...

رومانتيك روز
مش عارف يا روز مين قال لك أنه لازم علشان الولد يكون عنده مبدأ أن لازم يكون أبوه عنده مبدأ ؟ طيب ما هو ممكن يكون الأب ماعندوش أى حاجة خالص و الأبن يطلع عنده مبدأ و ممكن يكون الأب مليان مبادىء و الأبن يطلع ماعندوش مبادىء أصلا ً ,, الموضوع فى رأى مالوش علاقة متلازمة زى كده
أحنا فى ثقافتنا عندنا أن الأبن ده أمتداد لحياة ابوة و افكار ابوة و أخلاق ابوة ,, و مش عارف مين أللى قرر كده
مع أن فى أغلب الأحيان مابيكونش زى أبوة و يمكن بيكون عكسة على طول الخط و مع ذلك لسه بنقول أن الأبن زى ابوة و الكلام ده
الموضوع ببساطة أن الأبن ده عرف معلومات من ابوة عن الحق و العدل و الأخلاق و القيم و المبادىء و الدين و الحاجات دى بس المعلومات دى مش موجوده عند الأب بس
دى موجوده فى المدرسة و الجامع او الكنيسة و الشارع و عند القرايب و الجيران و المجتمع اللى حوالين الأبن و لأن الأبن الصغير بيكون ماعندوش عقد فبيأثر و يتأثر مع الحاجات دى كلها و بالتالى بيتعلم و يغلط و يعرف من غلطة الصح
الأب و الأم فى هذا الزمن ماباقوش مصدر المعرفه
لا
بقى فيه التليفزيون و الدش و الأنترنت و ميت ألف حاجة تانية بتشكل و عى و فكر الأبن ده
لكن أحنا كالعاده بنفكر بأثر رجعى
ماشيين فى المكان و فاكرين أننا بنقطع أميال ورا أميال مع أننا فى نفس المكان ما بنتحركش خطوة واحده
و أحنا أغبياء و تافهين لدرجة أننا فاكرين أننا نقدر نشكل و نأثر فى أبناءنا و مش شايفين قد أيه هما غيرنا خالص
هما أحسن بكتير ,, هما ليهم رأى و طلبات مابيتنازلوش عنها
أحنا كنا نقول حاضر من أول قلم هما لا
أحنا كنا نمشى ننام لمجرد بصه هما لا
هما مابيخافوش ,, مابيسكتوش ,, مابيرضوش بقليلهم ,, بيغيروا حياتهم و مصيرهم لو لزم الأمر
هما طايرين فى السحاب بطموح و أفكار وهما لسه أطفال
يا روز أحنا ماحيلتناش غير أننا نعيش فى الأوهام أنما هما بيحولوا الأوهام لحقيقة و هما لسه فى حضانه
مابالك بقى لما يخلصوا جامعة ؟
KING TOOOT

ROMANTIC ROSE said...

طيب و ايه رايك لو اقولك ان الدش و الانترنت و المجتمع و ال 600 الف حاجه اللي بتحكي عليهم دولا هما اللي بالذات بيخربوا عقول الاطفال .. و ايه رايك لو اقولك ان كون الاطفال ما بيخافوش و ما بيسكتوش و ما بيضوش بقليلهم و بيطيروا ف السحاب دولا من اسوأ الطباع يا كينج .. يعني ايه ما يبقاش فيه سلطه رادعه .. يعني ايه ابن يمشي كلامه علي اهله .. يعني ايه يصمم رايه و يصر علي رايه و هو لسه ما بيفهمش و ما يعرفش .. و بعدين انا مش مختلفه معاك ان .. ممكن .. يعني استثناء ان الاب يكون وحش و يجيب ولد كويس او العكس و الا انا اتجوز راجل طبعه وحش و اخلاقه مش كويسه و مش متدين و اعتمد علي انه يخلق من ظهر الفاسد عابد او انك تتجوز واحده جاهله و ست شلت ولا تربيه بيت غير كريم و تقول ما انا هسيب الدش و الانترنت يربولي ابني .. ولا ايه ؟

KING TOOOT said...

رومانتيك روز
طبعا ً مش ده أللى أقصده خالص
أللى أنا أقصدة أن الأبن او البنت لازم يشعروا بالحرية و بمسؤليتها لأنك زى ما حاتسيبيه يختار مش حاتساعديه لو أختيارة طلع غلط و بالتالى حايكون مسؤل أمام نفسه أولا ً وده أللى أنا أقصده
أنما موضوع الدش و النت فأنا عايزك تعرفى أن كل حاجة ليها وجهها القبيح و وجهها الجميل و الأنسان هو أللى بيختار
يعنى مثلا ً أنا و أنتى نعرف بعض من النت و أتكلمنا من النت و بنقول رأينا على النت و بنسمع رأى الآخرين على النت
يبقى النت مش كله وحش بس الموضوع مرتبط بالأنسان نفسه لأنه هو أللى ممكن يختار يكون وقته بيمر فى موقع مفيد أو موقع بظرميت
معلش القافية تحكم
KING TOOOT

ROMANTIC ROSE said...

طيب ممكن تقولي يا كينج انت لحد ما عرفت تدخل علي النت و لحد ما عرفت تاخد قرار و تتحمل عقباته و لحد ما بقيت شخصيه مستقله قادره علي خوض الحياه .. مين علمك و مين لفت نظرك و مين اتناقش معاك و مين و مين و..... ومين ؟؟
و فيه حديث صحيح عن الرسول عليه الصلاه و السلام بيقول ما معناه " لاعبوهم سبع و ربوهم سبع و صادقوهم سبع ثم اترك الحبل ع الغارب" او كما قال .. يعني من عمر 0-7 بنلاعبهم و من عمر 7-14 بنعلمهم و من عمر 14-21 بنصاحبهم و بعد كده خلاص .. انا متفقه تماما علي كده .. و في العمر بتاع التعليم ده بقي اللي هو بدايه المراهقه و اسوأ اعمار البشر علي الاطلاق .. ابسط شئ الولد هيقوله انت ليه مش كده .. لو ما قالهوش ف وشك هيقوله من وراك ف سره .. مازلت مصره علي وجود القدوه و علي ان الولد اللي بيطلع وحش و هو متربي ف بيت محترم ده استثناء و الولد اللي بيطلع كويس و هو متربي غير كريم برضه استثناء .. و كلاهما ليس اساسا للتنشئه.

Ahmed Shokeir said...

مش معقووول كده تعليقاتكم على بعض نستنى أنا كنت عايز أقول إيه
وبعدين هو أنا لازم أقول لإبنى إنتوا جيل خايب عشان يقولى وإنتوا عملتوا إيه ؟؟
مافيش داعى لصراع الأجيال ده
عموما أنا أعيل من عيالى

تحياتى ياكنج
بقولك إيه ..هو كله شعر كده مافيش شتيمه ...!!؟

KING TOOOT said...

رومانتيك روز
زى ما قال سعد زغلول
مافيش فايدة
-------------------
أحمد شقير
ربنا ما يجيب شتيمة يا عم
بس ممكن تريقه
KING TOOOT

ROMANTIC ROSE said...

كينج .. الفايده يجيبها ربنا من عنده .. دماغك ناشفه .. برج الحمل ؟؟

احمد شقير .. من بدري عايزين حد يحضرنا و الله و يفض الاشتباك ف وجهات النظر .. جيت بعد لما قال "مفيش فايده" !!
:)

KING TOOOT said...

رومانتيك روز
لا مش الحمل
برج العذراء
أيوة جه بعد ما خربت مالطا
هههههههههه
KING TOOOT

ROMANTIC ROSE said...

تعرف الذ شئ ان النقاش بينا كان نقاش هادئ و لم يفسد للود قضيه و الحمد لله و مع ان محدش فينا اقنع التاني بوجهه نظره بس اعتقد ان كلامنا مع بعض هيفضل معلق ف راسنا و هنقيس عليه مواقف هتقابلنا ف حياتنا بعد كده ان شاء الله ..

برج العذراء .. ممممممم .. اول مره اعرف ان بتوع العذراء عنديين .. اللي يعيش ياما يشوف.
:)

KING TOOOT said...

رومانتيك روز
النقاش الواعى الناضج عمره ما ينقلب لعصبية و الأختلاف الهادىء الديموقراطى عمره ما يفسد للود قضية
أنتى عارفه أحنا أختلاف وجهات نظرنا ما أفسدتش النقاش بيننا ليه ؟؟
علشان أحنا الأثنين ماحدش فينا أعتبر أنه بيملك الصح المطلق أو الحقيقه المطلقة و بالتالى ماحدش فينا حاول يفرض وجهة نظرة على الآخر
وعلى فكرة أنا من متابعتى ليكى و لكتاباتك و تعليقاتك لاحظت أنك يمكن متدينه شوية أو نشأتك نشأه دينية محافظة الى حد ما
ورغم أنى ممكن أكون مختلف جدا ً مع الأتجاهات المحافظة و لى آراء فيها يمكن مش أيجابية كفاية بس الحقيقه رغم أختلاف التوجهات لكن سعيد جدا ً بالحوار معاكى
الموضوع مش صعب و ممكن ببساطة كل الناس تكون كده
ممكن و سهل كل المناقشات تبقى كده
ممكن أى حد ولد أو بنت ,, رجل أو ست ,, ممكن يكونوا كينج توووت أو رومانتيك روز
الموضوع مش صعب بس عايز شوية تواضع مع الذات و وداان كتيير علشان نتعلم نسمع
و عقل علشان نفكر
و أجازة للأنانية
وبس
KING TOOOT

ROMANTIC ROSE said...

انا متدينه مؤخرا و لست متحفظه و تربيتي مش دينيه من الصغر زي ما انت متخيل .. انا تربيه عمرو خالد من 3 سنين بس .. الحمد لله رب العالمين .. و مع ذلك كلامك مظبوط تماما في تفسير عدم اختلافنا اثناء النقاش و الحمد لله علي كده.