Pages

كنتى بعيدة


كنتى بعيده
كنتى بظهرك بس عرفت
أن أنتى وحيدة
وأن أنتى كمان
مش عايشة سعيدة
مش حاسة أمان
كان شعرك يغزل خيط أحزان
يغزلك توب
يتلف يخلى قلوب و قلوب
تغرق و دوب
ويعزب فيا ضمير أنسان
كان يوم محبوب
كان يومها النيل بالليل عطشان
ولقيتك على الشط بترويه
و النيل فرحان
بيقول موال يتغزل فيكى
و أنتى كمان تتغزلى فيه
كان يومها الدنيا بتشتى عليه
و أنتى فى حضنك بتدفيه
ما أعرفش أزاى أنا شفت عنيكى
من غير ما أشوف
كان جوا عنيكى حنين ملهوف
و كلام محفور على شجر الخوف
و سحاب مليان
ميه ورد و طيف من برد
و خيط دخان
و رموشك كالعادة بتتحده
تنزل فى دموعك تتوضى
تغفر بصلاتها ذنوب الناس
من كتر ما فيها من أخلاص
من احساس
تنزل دمعة تسيل عالنيل
و فى لحظة يزيد
و يفيض بالخير
على كل الزرع و كل الطير
فى أى مكان
بس أنتى فى عز دا كله وحيدة
مش زى زمان
مش عايشة سعيدة

3 comments:

ROMANTIC ROSE said...

عزيزي كينج .. يسعدني اني اكون اول المعلقين علي قصايدك الرقيقه .. بجد بكون سعيده و انا اقرأ اعمالك جدا لانها بسيطه و معبره .. اجمل بيت عجبني في القصيده دي "كان يومها النيل عطشان و لقيتك واقفه بترويه" .. مش معقول ان النيل يكون عطشان لان هو اللي بيروي المصريين بالميه لكن يمكن يكون عطشان حنان و تكون بترويه من حنانها الفياض اللي مكفي كل اللي حواليها و زاد فراحت تروي النيل !!
اتمني يكون تفسيري للجزء ده صحيح.
عاوزه اطلب منك تقولي لما تكتب حاجه جديده من فضلك علشان اقراها "طازه" ممكن؟

KING TOOOT said...

رومانتيك روز
أنا أللى فعلا ً سعيد أن فيه حد بيقرأ اللى أنا بأكتبه أصلا ً و صدقينى أنا يكون ليا الشرف أنى أقول لك على أى جديد فى البلوج بس الحقيقة مش عارف أقول لك أزاى
أنا ما أعرفش الميل بتاعك و لا حتى البلوج الخاص بيكى
على العموم ممكن ابقى أبلغك فى تعليقات جريدة بنت مصرية
ما أنتى و هى و أسكندرانى و صيدلانى و علاء و غادة أنتم بس أللى رديتوا على أللى أنا بأكتبه
على العموم حا أحاول بكل وسيله ممكنه أنى أبلغك بأى جديد أكتبه
أما بالنسبه للقصيدة دى و الأبيات أللى عجبتك فهو المقصود زى ما أنتى قلتى بالظبط أنه اذا كان النيل بيروى كل الناس يبقى أللى تقدر تروى النيل ممكن يكون عندها أيه و حنان و حب و خير قد أيه
أنا بأشكرك مرة تانية على أهتمامك بالتعليق و أرجو أنى أكون دايما ً عند حسن ظنك
KING TOOOT

ROMANTIC ROSE said...

انا ايميلي موجود ف البروفيل بتاعي يا كينج.. و لو هتبلغني علي بنت مصريه يبقي كويس برضه..