Pages

مصريين


مصريين

عايشين على شط النيل

بقالنا سنين و سنين

نضحك مع أن القلب جريح

جريح بصحيح

أنما بندمع فى التفاريح

الحزن فى شخصيتنا أصيل

بس الحزن بتاعنا غريب

حزن جميل

نخرج من بيتنا الصبح مافيش

نطلع عالرزق و نجرى صاروخ

و ساعات م الجرى نقع و ندوخ

نزحف بشويش

علشان ما نحصل لقمة عيش

لجل الأولاد

و ساعات بنلف بلاد و بلاد

و ننام عالخيش

مننا ناس بتكون أسياد

وناس أموات

وناس صاحيين

وناس رجليها بتحضن رمله

و ناس غرقانه ف زرع و طين

قطن و قمح و نخل و تين

و ترعة و بحر

و شمس بتغرب زى السحر

و قمر بيطل

ينور بعد النور ف السر

و زرع و ليل

و طيف ألوان

و برد الفجر و صوت كروان

و طمى بيطلب أيد الساقية

عشان عطشان

و مصنع بالعمال مليان

ف شبرا الخيمة أو حلوان

و جرس فى كنيسة

و صوت لأدان

و مدخنة بتطلع دخان

و لبان و هريسة

و عيال بتشغبط ع الجدران

ترسم أحاسيس

و موظف متشعبط ع الباب

برة الأتوبيس

و بنات ماشيين

حضنين كراريس

شايفين نفسيهم جوا عيون

كل الشبان

و تابور ستات

ملمومة هناك على فرن العيش

و شباب فى الجيش

و بيادة و ميرى و لاشينكان

هو ده أحنا المصريين

وش بيضحك

بس فى جوفه قلب حزين

4 comments:

بنت مصرية said...

لو كنت اعرف امسك افصص قصيدة وانقدها نقد فنى كنت عملت،

بس معنديش غير إحساسى.. واحساسى بيقولى ان الكلام جميل والمعانى حلوة

اوعى توقف كتابة
اكتب وتطور نفسك

بقول لنفسى كده كمان :)

KING TOOOT said...

يكفينى أحساسك الجميل
و أنتى كمان أوعى توقفى كتابه و مهما حصل ما توقفيش جريدة بنت مصرية الرائعة
ياريت أقرأ ردك على باقى القصائد
KING TOOOT

ROMANTIC ROSE said...

مينج .. انت فين يا باشا .. حرمتنا من وجودك ليه ف بنت مصريه .. المجله طالعه ناقصه حاجه .. لعل المانع خيرااااااا

KING TOOOT said...

رومانتيك روز
أنا موجود و القصائد أللى موجودة فى البلوج بتاعى متاحة لجريدة بنت مصرية أنها تنشر منها ما تشاء
أنا موجود فى الردود و التعليقات و كمان رديت على موضوعك بتاع الحب من طرف واحد و هل هو حب أم عذاب
KING TOOOT