Pages

المصرى عجيب


المصرى عجيبه من الأعاجيب
بيحس بمليون ألف حبيب
و يطب فى قلب الليل و يغيب
يطلع مع صبح الأفراح
زى شجر فل و تفاح
و ف عز البعد بيبقى قريب
و ساعات بيطيب
و ساعات يفشل جدا ً و يـخييب
لكن بيحول خيبته نجاح
و ف لحظة بيملى الدنيا براح
و كأنه ما شافش فى عمره جراح
و كأنه طبيب
و يمد الفجر بشكل عجيب
و ينور كل الليل و يـجييب
قرآن و أذان و جرس و صليب
علشان يفرشوا ع الدنيا صباح
بعدها يقعد هو و يرتاح
من غير ما يحس بأنه غريب
مع أنه عجيبه من الأعاجيب

4 comments:

Aladdin said...

من أين اتيت بهذه الصورة الرائعة؟ موحية ومعبرة بالفعل.

KING TOOOT said...

شكراً جدا ً يا علاء الدين و سعيد جدا ً أنها عجبتك و أتمنى أسمع رأيك بأستمرار
KING TOOOT

sydalany-وش مكرمش said...

ملحوظة:


غير لون الخط ف باقي القصايد عشان مش باين من الأسود

وللعلم أنا برضه بكتب عامية
تاني جامعة إسكندرية

تبقى تبص بصة ع البلوج بتاعي

ملحوظة2:
حبقى أقرا قصايدك و أفصصها على رواقة
و من القراية الأولى عارف بتعمل إيه
و بتلعب على الموسيقا العالية بالقافية مع ثبات التفعيلة

بص أنا لازم أسيك دلوقتي
أكلمك بعدين
add me
sydalany@yahoo.com
sydalany@hotmail.com

KING TOOOT said...

صيدلانى
أولا ً شكرا ً جدا ً على رأيك و تشجيعك و أتمنى أنى أسمع رأيك دائما ً ,, أما بالنسبه للألوان فى الحقيقه روح الكلام هو أللى بيفرض لون معين بس طبعا ً مش دايما ً بيكون الأختيار موفق و أوعدك أنى حا أكون أكثر أهتماما ً بالموضوع ده أما بخصوص طريقة الكتابه فأنا زى ما انت ممكن تلاحظ بأكتب فى موضوعات متعدده و بأساليب مختلفه و مش ثابت باسلوب واحد فى الحقيقه
شكرا ً جدا ً على ملاحظاتك الهامة و أتمنى أسمع رأيك دائما
ملحوظة
البلوج بتاعك جميل و كتاباتك فيه دمها خفيف جدا
KING TOOOT